朋友中咗疱疹

佢分手之後進行咗一次唔安全性行為就中咗疱疹,而家生理上好痛,心理上都好痛苦。覺得自己唔會再搵到男朋友,更加無可能結婚生仔,仲話好想死。

我可以點幫到佢…

明白你嘅朋友好擔憂,你嘅陪伴其實可能已經好幫到佢,而除咗陪伴之外,陪佢去搵適切專業幫助都係好緊要嘅! :smiling_face_with_three_hearts:

疱疹係由HSV病毒所引起嘅,生殖器官會有水泡出現,亦會產生痛楚,甚至小便時都會痛。但如果盡快去求醫嘅話,醫生都會俾到舒緩症狀嘅藥物嘅。社會衛生科可以提供治療服務,而合資格人士係可以免費得到社會衛生科嘅醫療服務嘅。 :woman_health_worker:t2: :man_health_worker:t2:

生理上嘅痛苦可能都相對比較容易受控,但內心嘅痛苦可能都需要時間慢慢去治癒。疱疹雖然暫時唔能夠根治,但係喺積極嘅治療下係可以收到藥物控制,甚至可以將體內病毒水平控制到唔會傳染嘅水平。所以,喺有做好安全措施嘅情況下,佢將來係可以發生性行為同埋有親密伴侶嘅!而生育方面,只要有提前告知醫生曾經嘅感染情況,醫學上都有方法保障到胎兒嘅安全嘅! :relaxed:

所以都要你嘅朋友梳理返情緒,然後去接受治療,令到佢嘅身體康復返。如果佢嘅情緒壓力真係比較大,可能都可以建議佢去搵下輔導員(社會衛生科亦有提供輔導服務)或者其他專業人士去幫佢疏導返情緒方面嘅痛苦。 :blush:

因為社會文化對於性嘅觀念同埋態度依然相對比較保守,甚至唔少人覺得性係一種禁忌、對於感染性病嘅人有污名同埋偏見。喺呢一種社會環境下可能每人都或多或少受到性別觀念嘅影響,尤其感染性病嘅人更加可能因為覺得難以啟齒/覺得尷尬/怕求助嘅時候被批評等等原因而延誤咗去求助。有時我哋食錯嘢會有腸胃炎,或者流感高峰嘅都會有呼吸道感染嘅狀況,呢啲時候可能我哋都唔會特別去怪責自己,而係會盡快去睇醫生希望可以快啲健康返。而事後我哋就會學識多咗點樣更加好咁保護自己,例如要多啲洗手,食嘢之前要清潔好等等。同樣道理,如果性器官病咗,我哋都應該快啲去接受治療,唔好不斷怪責自己住。但係都要記得下次要用返安全措施去保障自己。 :wink:

將來嘅嘢冇人可以估計到,可能總會有個適合嘅人等緊同你嘅朋友相識相戀呢,唔好咁快絕望呀。 :sparkling_heart: