上個月開始食yasmin避孕藥
最近開咗新嘅一盒，食到琴日第六日，遲咗一個鐘食
而琴日係有同男友發生咗幾次性行為，無套外射
到咗今日遲咗幾個鐘冇食到，諗住補番嗰陣
發現盒藥唔見咗!!仲要冇備用嘅，只可以等聽日出門補買
想問下如果琴日係有發生性行為，外射無套，但今日漏服，會唔會有機會中？
好擔心
同埋想問下yasmin停藥咗7天後開始新一盒，係咪要等7天先再有藥效，定第一日已經有藥效？因為之前係食開28粒嘅yaz，係keep住食，所以就算新一盒藥效都係繼續有
Hello
都想了解返多啲資訊先，你之前食咗幾耐yaz呀？有冇啲咩特別原因你要轉食yasmin？同埋你轉食藥之前有冇睇過醫生先？ 
雖然避孕藥好容易自己買到，但係市面上每一款避孕藥都有唔同成份同劑量，所以都建議第一次服用或者想轉藥之前要睇下醫生，等醫生評估下你嘅身體係咪適合食、同埋適合食邊一隻藥。如果你之前食藥都冇睇過醫生就食，你都可以盡快預約去家計會診所／母嬰健康院／部分私家診所睇下醫生，記得同醫生講清楚你食咗幾耐同埋食過邊幾款藥呀。 
因為你之前有服用yaz，而yasmin你都已經服用完1包，如果你轉食yasmin之後身體冇特別唔舒服，咁應該已經適應咗呢款藥，同埋有建立相對穩定嘅避孕功效，所以如果你尋日遲咗一個鐘食，唔會有太大影響，但係建議之後都要準時服藥呀！而因為你身體有建立藥效，所以尋日發生嘅性行為導致懷孕嘅機會好低嘅。 
但係因為你今日冇食到藥，聽日要盡快買返去食返。根據yasmin網站所講，漏服時限為12小時，即係話如果你喺本應食藥嘅12小時內食返就可以，然後再依照你平時食藥時間食返之後嘅藥物（例如你本身應該今晚10點食藥，你要盡量喺聽朝10點前食返今日應該食但冇食到嘅藥，然後聽晚10點再食你聽日應該服用嘅嗰粒藥），但如果你唔能夠喺12小時內買到藥服用，都要盡快買到然後食，但就要喺之後嗰7日內如果發生性行為嘅話要配合安全套。 
yaz同yasmin嘅服用模式唔同，yasmin喺7日停藥期內都會有避孕功效嘅，正如食緊yaz嗰4粒白色非活性藥丸一樣。
見你又講到話遲咗食藥，建議你可以設定鬧鐘提醒自己，或者而家有啲專門提升食藥嘅app，可以設定提醒時間同埋記錄服藥情況，你都可以考慮使用啊。同埋都建議你要記得準備定至少一盒備用藥物，以防不時之需。你可以聽日買嘅時候買多一盒。或者如果你之前一直都無睇過醫生，建議你不妨去家計會診所睇醫生配藥，一嚟藥嘅價錢相對平啲，二嚟可以一次配幾盒，咁就可以避免你唔見咗一包藥就冇藥食啦。 
yaz食咗兩、三個月，轉藥係因為揾咗好多間都缺貨，上網話要keep住食，所以先轉yasmin
同埋我冇睇醫生
做性行為嘅隔天冇食到藥，唔知咁樣懷孕機率大唔大？
hello 你好啊 
，就如同上面 @ching 所講，決定轉藥嘅時候最好都問問醫生嘅意見，如果單純因為藥房缺貨而轉藥，都可以預約去家計會診所、母嬰健康院、部分私家診所求診。以下喺家計會嘅網址：e-服務預約 - 香港家庭計劃指導會
至於意外懷孕風險方面，如果漏服事前避孕藥，到目前為止又冇緊急避孕嘅話，依然會有某程度上嘅懷孕風險 
，因為性行為當中，陰莖喺性興奮時通常會流出透明黏稠液體，即喺俗稱嘅尿道球腺液，當中有機會含有少量精子。 雖然相比直接喺陰道內射精嘅數量，但仍然有機會導致懷孕。所以按照你嘅情況，就算並非內射，陰莖喺抽插嘅過程中已經有會分泌尿道球腺液。另外，超過咗12小時冇服用到有效成分嘅避孕藥丸，身體等同即時回復生育能力，所以都會有某程度上嘅風險。詳情你可以參考翻Yasmin嘅官網：YAZ®優悅 - 避孕藥常見問題
按照你分享嘅情況，你都嚟得切透過緊急事後丸進行緊急避孕 
。事後丸喺香港屬於處方藥物，你可以家計會、母嬰健康院、婦女健康中心、婦科診所或私家診所求診。事後丸又分為單一荷爾蒙（黃體酮）同黃體激素受體劑兩種，前者喺進行性行為後72小時，而後者喺性行為後120小時後服用。所以建議你可以服用黃體激素受體劑。你可以求診嘅時候，同醫生講解翻以往嘅身體狀況同今次求診嘅原因。因為部份事後丸唔能夠同事前避孕丸一同服用，因為都見你服用事前避孕丸一段時間，有機會減低咗事後丸嘅效用。所以記得同醫翻生提提你以往嘅身體狀況。 
最後，都提提你因為服用事後丸嘅其中一個副作用令月經提早或廷遲，所以如果你下次經期比預計中遲嚟，都唔需要太擔心～ 希望可以幫到你～