我係食開YAZ 28粒大半年⋯一直好準時食，經期都好準⋯直到第22粒，我誤食咗一粒白色非活性藥，第23粒又食錯白色非活性藥⋯⋯咁我應該停藥定食返食剩果3粒粉紅色⋯⋯⋯
Hello @KarenP 
如果依家發現已經跳過左三粒含活性成分避孕藥，建議可以繼續如常咁服用新一盒嘅避孕藥，無需停藥。不過因為始終都有少少打亂本身28日的月經週期，都建議考慮依家開始，直到服用新一盒避孕藥嘅第7日果日為止，都配合番阻隔式避孕工具（安全套） 
。同埋都可以有定個心理準備，因為今次提早左幾日服用非活性成分藥丸，所以今次嘅月經都有機會未必係服用非活性成分藥丸期間出現，可能開新一盒避孕藥嘅時候先黎，唔需要太擔心。
平日如果唔肯定自己之前有無漏服，首先可以留意番以下情況，都需要再次配合阻隔性避孕工具 使用， 持續7天 ，因為藥效有機會消失，需要重新建立，避免期間有懷孕風險。
服藥期間曾經漏服藥，有補食藥丸
服藥期間曾經漏服藥，無補食藥丸
曾經停藥（不包括Yasmin七天無藥期）
所以有無漏服，或者唔記得有無漏服的時候，都先建議持續7天使用額外嘅阻隔式避孕工具（安全套）。而有無需要即時補食避孕藥，則可以視乎是否已經過左漏服時限。例如參考番YAZ官網，Yasmin的漏服時限為12小時。如果記得係大概12小時內漏服，一記起嘅時候就儘快補食番，下次就按番正常時間服用。如果已經超過12小時，咁避孕藥本身嘅藥效可能就已經降低左，補食該粒避孕藥嘅幫助不大，無需刻意補食，配合阻隔式避孕工具來減低懷孕風險較為重要 。
如果都已經係隔左好多日先發現自己有機會漏服/誤服，建議回顧一下由漏食/誤服當天起計，有無發生無使用安全套嘅性行為，因為呢段時間藥效有機會降低，可能有懷孕嘅風險。建議呢個情況下，可以去家計會／母嬰健康院／普通科門診／婦科診所／急症室睇醫生（事後丸喺香港係屬醫生處方藥物 ），先諮詢醫生嘅意見，及視乎情況攞埋事後丸（事後丸最長服用時限為120小時）或進行驗孕 。咁就可以確保將懷孕嘅機會減到最低。
參考 <YAZ - 避孕藥常見問題>
https://www.yaz-hk.com/cn/faq.php
如果未來怕自己有機會誤食左非活性成分藥丸的話，建議可以嘗試預先在避孕藥包裝上每一格都寫上日期，有助自己掌握有無漏服/誤服到避孕藥啊 
。同埋下次都記得粉紅色藥丸先係含有效成分嘅藥丸，一盒藥之中要食曬粉紅色（含有效成分藥丸）之後先好服用白色藥丸（非活性成分藥丸） 
。
請問我星期二有性行為，星期三正常食粉紅色，星期四/五誤食白色，星期六今日開一盒新食第一粒粉紅色，懷孕機會率高嗎？我每天習慣是早上8點服藥
hello 你好啊 ，依照你分享嘅情況，星期四/星期五誤食白色嘅非活性藥丸，當中又冇喺12小時嘅漏服時限補服嘅話，為咗安全起見都建議你呢未來嘅7日都使用阻隔性嘅避孕工具。因為一旦漏服，又冇喺12小時內補服嘅話，身體等同即時恢復咗生育能力。所以依然會有一定程度上嘅懷孕風險，所以同上面@Sze 所建議，先建議持續7天使用額外嘅阻隔式避孕工具（安全套），如果進行性行為都可以降低懷孕風險～ 
而星期二果次嘅性行為確實喺有小程度上嘅懷孕風險 
。因為都見你已經服用咗避孕藥一段時間（大半年），所以都相信身體已經建立咗一定嘅藥效。依影你嘅情況，發生性行為嘅時候如果冇使用到安全套、或進行其他避孕措施，精子可以喺陰道生存2-3日，所以如果星期二發生性行為，而星期四、五服用非活性避孕藥，都喺有某程度上嘅懷孕風險，但不大。
如果你真喺好擔心，建議你可以發生性行為後7-11日進行驗孕，性行為發生後7日（7月27日）驗孕可以獲取初步結果，性行為發生後11日（7月31日）進行驗孕可以獲取準確可靠嘅結果。當中嘅原理喺透過檢測尿液中嘅HCG(人絨毛膜促性腺激素)含量嚟判斷有無懷孕，因為只有受精卵成功著床嘅女性身體先會會開始分泌HCG，通常著床時間就會係6-9日。所以你可以跟足驗孕棒嘅指示嚟完成步驟，希望可以幫到你啊～ 