唔知點做好

我哋一齊咗10年,已經講緊談婚論嫁嘅階段。

外人睇落去好美好,好登對,但其實我呢10年嚟,都好辛苦。

我哋唔係無試過分手嘅,咁多年只係試過一次,我提出嘅,原因係我頂唔順佢啲脾氣。依家想分手嘅原因,都係因為佢啲脾氣,又唔完全係嘅…

其實佢平時都好好,只係每次嚟m前會比較暴躁,每次都係咁,成日都會講啲好難聽嘅說話,我知道女仔嚟m比較辛苦,所以我都好遷就,果段時間咩都係我錯,我咩都會就曬佢,就算幾唔合理,就算明明我無做,我都會認錯,果段時間佢開心就好。

佢開始嚟m情況就會好啲,就會好好,對我真係非常非常好。呢個就係我一直糾結嘅位,基本上每個月都會有10日左右嘅時間俾人鬧,要小心翼翼過活,之後就會好啲,雖然有時嘈交都會話自己係女仔,唔可以讓下佢咩,一出呢句我都基本上會讓佢,無論嘈緊咩都會完結。

於是呢10年,我都係咁樣度過,我明白,女仔有時嚟m,荷爾蒙會有改變,情緒會有變動,其實有無辦法可以改善?試過叫佢做運動,但係佢唔鍾意,已經發過脾氣話唔做,亦都有傾過食避孕藥可唔可行,佢只係話發一陣脾氣唔可以讓下佢,竟然要佢食藥,都解釋過副作用其實好細,但佢依然唔想食(佢本身就比較怕食藥)。都試過勸佢一齊見輔導員,但佢覺得浪費錢,同埋佢覺得無事,所以佢唔會去見。

一個禮拜後就準備過大禮啦,我唔想以後都係咁,每個月都要忍10日,而呢10日係非常難受,無論做咩都會俾人鬧,坐係度都俾人話樣衰,所有嘅關懷都係錯。其餘20日就好好,而佢都陪我走過好艱辛嘅日子,以前住劏房嘅日子,到依家有自己層樓,好多嘢都係因為佢先至可以捱過。

我一直說服自己,佢對我好好,所以果10日就當俾佢放鬆下,我自己就算啦,唔緊要。但係我覺得我近來越嚟越唔正常,覺得自己好無用,又會失眠,唔開心嘅時間多咗好多,就算自己鍾意嘅嘢都唔想做,有時一坐就幾個鐘,成日喊,覺得自己好陌生,我唔想放棄佢,但好似開始頂唔順啦,點算好…

你好愛你嘅伴侶,佢亦都俾咗好多支持同陪伴你,你哋互相支持咗對方咁多年,大家都係對方重要嘅人,所以可能深愛嘅人傷害你,你會覺得更加唔舒服唔開心。即使好愛對方,都唔代表你要完全遷就對方已委屈自己,甚至呢排你自己嘅情緒都有波動,咁樣並唔係一個健康嘅相處模式同健康嘅關係,你哋都可以去改進下相處嘅方式而令大家都覺得舒服。 :blush:

而家你都面臨緊好多困擾同懷疑,不妨趁呢個機會好好同伴侶講下呢件事,大家各自講下自己嘅感受、需要同期望。亦都請伴侶講下,佢係咪有啲嘢收埋咗冇一個渠道去講出來,積聚著喺心入邊,導致每個月都藉住經前去發洩出嚟?你可以俾佢知道,你會諒解佢經前不適,但同時都希望佢可以一齊諗下辦法去面對同解決呢一種情緒變化。或者問下佢希望你用咩方式陪伴佢度過每月呢幾日,例如係想你多啲語言上嘅關心?行動上嘅嘢?定係佢反而想要多啲私人時間同空間?傾好一個共識,可能會令你哋雙方都舒服啲! :relaxed:

經前有唔舒服同埋情緒相對唔穩定係常見嘅經前綜合症(premenstrual symdrome, PMS)症狀,通常喺月經前出現,隨著月經出現會消退。但亦有比較嚴重嘅情況,有時稱為經前不悅症(premenstrual dysphoric disorder, PMDD),經前不適嘅徵狀更為嚴重,甚至對日常生活、工作、社交同埋人際關係造成影響。而PMDD喺情緒方面嘅症狀較為明顯同埋影響較大,例如有明顯嘅情緒波動、易怒、憂鬱或者焦慮,伴隨著其他身體症狀例如易疲累、胃口改變、睡眠狀況改變、壓力應對能力改變等等。如果你伴侶經前不適嘅情況都比較嚴重,都可以建議佢去睇下醫生檢查下。有PMDD唔代表佢做錯嘢,或者佢唔夠堅強,而係佢嘅身體因為某啲問題適應唔到荷爾蒙週期變化,體內嘅一啲同情緒相關嘅化學物質唔平衡,所以令佢出現明顯波動嘅情緒,甚至可能佢都會覺得情緒唔受控令佢好困擾好沮喪。如果睇咗醫生,經過治療都可以有好大改善嘅,甚至有啲人未必需要藥物治療,靠食療、運動、輔導等方法都可以漸漸有改善。而如果睇完醫生係無事嘅,都係一種心安,可以再去睇下你哋之後會點樣面對呢啲事。

見你都有講有建議佢試吓食避孕藥或者見輔導,而佢都會比較抗拒。其實某啲避孕藥的確有改善經前不適同埋經痛嘅功效,同時亦可以避孕。如果你哋暫時冇計劃要生育嘅話,其實都可以嘗試換個角度去建議伴侶食避孕藥。不過都想提返你,雖然避孕藥好容易買到,但係並唔係每個人都適合食,而且市面上唔同牌子嘅避孕藥有唔同嘅荷爾蒙種類同劑量,所以建議食之前去睇下醫生,檢查下佢嘅身體係咪適合食同埋適合食邊款。
而見輔導呢件事,唔係一定要有問題先要見輔導,反而有時專業人士幫助我哋梳理返情緒,都不失為一件好事。或者你都可以同佢講,唔係因為佢做錯啲咩而要見輔導,而係因為你都有情緒同困擾,你想同佢一齊見輔導去處理返呢啲情緒。

任何感情關係都應該係平等嘅,即使係屋企人之間,都唔係話一定要「奉旨」包容對方所有嘢。你哋即將結婚,可能對於你哋來講意味著你哋嘅關係甚至人生都進入咗新嘅一個階段,喺步入新階段之前,都值得將呢件事講清楚。都可以俾女朋友知道,你講呢件事唔係話要怪責佢或者唔體諒佢經前唔舒服,而係都想佢知道呢件事唔單止係佢嘅事,同時都對你做成影響,甚至可能佢身邊其他人都有受影響。大家都想喺一段關係入邊成長,同埋嘗試成為更加好嘅人有更加好嘅生活。正如佢陪住你由劏房捱到有你哋自己嘅屋企,你都會想佢可以有改變。或者換位思考,等佢明白,如果你每個月都發佢脾氣,佢都未必可以頂得住。或者如果你返工壓力大,成日搵佢發洩然後叫佢體諒下你,咁佢都會覺得好受傷。可能咁樣講完之後,佢會意識到問題,然後你哋先可以再諗下問題嘅解決方法。

知道你好想照顧佢,唔想「放棄」佢,但係同時都要記得要好好照顧自己嘅情緒同需要呀! :smiling_face_with_three_hearts: