想請問食D mannose會唔會影響事前避孕藥的避孕效果? Thank you
Hello
D-mannose（D-甘露糖）係一種類似葡萄糖咁嘅單糖，佢本身已經天然存在喺唔少蔬菜水果入邊，例如蘋果、桃、椰菜同埋番茄；而且人體本身亦可以用其他糖份製造出D-mannose，即係話其實你平時唔係食緊營養補充劑嘅時候，身體已經會有呢種物質，所以原則上呢隻化合物係唔會影響避孕藥嘅功效嘅。如果你擔心嘅話，你可以錯開食D-mannose同避孕藥嘅時間，例如相隔2小時。 
不過都想提返你，有啲人腸胃相對比較敏感，食完營養補充劑可能會肚瀉；亦有研究發現攝取過高劑量嘅D-mannose有機會影響消化系統。所以如果你有肚瀉嘅情況嘅話，避孕藥嘅功效係有機會受到影響嘅，你可以考慮發生性行為嘅時候使用安全套作為額外嘅安全措施。 
同埋如果你唔介意，都想了解返你點解要食D-mannose？作為日常保健嘅營養補充劑？定係身體出現咗一啲唔舒服嘅情況，想通過D-mannose舒緩或者改善？ 
其實每人嘅身體狀況唔同，營養補充劑嘅效用因人而異，甚至食咗唔適合自己身體嘅保健品反而會增加身體嘅負擔，有反效果。所以建議都可以考慮食之前資詢下營養師嘅專業意見嘅。而如果你本身身體有一啲狀況，就更加要睇返個人情況，建議睇下醫生先，以防延誤咗治療，記得睇醫生嘅時候講自己有食邊一款避孕藥呀！
而的確有部份藥物係會影響避孕藥藥效嘅，例如部分種類嘅：抗生素、抗抑鬱藥、消炎藥、助眠藥等，而貫葉連翹（st John’s wort）同埋黃豆異黃酮素（Soy Isoflavone）呢啲比較常見同易買到嘅營養補充劑亦有機會會影響避孕藥藥效。所以如果需要服用呢啲藥物之前記得要諮詢返醫生意見呀！ 
