我17/7日黎m ，正常都係7日 ，經期每個月早1or2日，23號3點左右性行為 ，有帶套，但中間穿左加內射左 ，第二日11點到食事後藥，想問懷孕機會大唔大？
同埋乳房有d痛係事後副作用定有左？
Hello
如果你哋性行為過程中安全套有破損而有體內射精，咁精液同尿道球腺液（陰莖喺受到刺激嘅時候會分泌嘅透明嘅液體）當中嘅精子都有機會進入體內導致懷孕。但係如果你喺72小時／120小時內已經服用咗緊急避孕藥，咁懷孕風險係好低嘅。不過要提返你，喺香港緊急避孕藥係要經醫生處方嘅藥物，如果你唔係食由醫生俾嘅藥，咁就相對比較難去確實咁判斷藥效。
卵子受精著床通常需要6－9日嘅時間，當受精卵著床之後身體就會開始分泌hCG呢一種荷爾蒙，而驗孕嘅原理係去檢驗尿液中是否含有hCG。所以如果你真係好擔心，你都可以自行驗孕，喺性行為嘅7日後（7月30號）驗孕，會得到初步結果，而11日後（8月3號）進行驗孕，就會得到較為準確嘅結果。 
而乳房脹痛呢樣嘢係其中一個常見嘅服用完事後藥嘅副作用，同時亦有機會有其他原因導致。但係距離你發生性行為未夠6日，即係話唔會係因為懷孕而產生呢種感覺。同埋懷孕症狀每人唔同，甚至有啲人懷孕初期冇任何症狀。所以我哋唔能夠單憑呢個症狀去判斷自己係咪懷孕。 
另外見你有提及月經週期呢樣嘢，都想同你解釋返，月經同埋排卵係好容易受到其他因素影響嘅，例如荷爾蒙分泌、飲食習慣、休息、壓力、藥物等等。即使你平時嘅月經週期都好穩定，但唔代表每個月經週期都一定會一樣。正如你嘅月經週期都唔係每個月都係28日，你之前嘅週期都會有1－2日嘅浮動。如果你今個月經週期身體狀況有改變，可能排卵日期同月經週期都會受到影響㗎。而正正因為排卵同月經好容易受到影響，無論喺月經週期嘅邊一日，只要陰莖分泌物同陰道有接觸，咁都會有一定嘅風險嘅。不過如果你已經服用咗經醫生處方嘅事後藥，風險會好低嘅。 
同埋都想你有定心理準備，因為你今個月經週期服用咗緊急避孕藥，之後嘅1－2個月經週期都可能會受到影響，而月經嘅流血量、流血日子、經痛程度等等呢啲因素都可能會受到影響而同平時唔同。所以如果你嚟緊發現月經相比起平時嘅平均日期遲咗，唔需要太過緊張嘅。
最後，見你有講話安全套破裂，可能係因為潤滑不足或者冇將儲精囊嘅空氣擠出等原因，關於可能導致安全套失效嘅原因，可以參考：https://www.instagram.com/p/CM4ereiDmIl/?utm_source=ig_web_copy_link
日後避免呢啲情況，就可以更加安心啦～ 
我係醫生處方的，另外想問下我個幾日都算係經期既後期，都有機會懷孕？係咪72小時水食事後都有機會可以避孕？
hello 你好啊 ，依照你嘅情況，如果確實喺性行為發生後72小時內服用，相信食後藥都喺身體發揮作用～ 想確認一下你提到經期會唔會影響事後丸嘅功用，意思即是擔心服用事後丸嘅時候，與經期嘅排卵日子重疊咗，因而擔心會唔會影響事後丸嘅效用？如果喺呢個意思嘅話，其實都唔需要擔心，因為就算已經排卵，緊急避孕藥可以干擾卵子受精或者干擾受精卵著床。所以只要係醫生處方之下係指定時間（72小時內、或120小時內）食咗藥，基本上都可以發揮到效用做到緊急避孕。另外，都想提一提你，因為服用事後藥後嘅其中一個副作用喺令下一次嘅經期提早或廷遲，都有機會改變血量。所以如果下一次嚟經，同以往嘅週期不一樣，都唔需要太擔心 
～ 如果你想了解多d，可以參考家計會網頁：緊急避孕 - 香港家庭計劃指導會
最後，如同上面@ ching 所講，月經週期受好多內在同外在因素影響，例如生活習慣轉變、生活壓力、情緒因素、服用藥物（例如抗生素）等等。就算以往嘅月經週期穩定，都唔代表下一次來經嘅日子都喺一樣。就算經期後期，發生性行為仍然都有懷孕風險。更重要嘅喺，往往等下一次月經嚟到，至能夠推算確切排卵日日子。都有機會月經同排卵期重疊，所以如果你同伴侶都喺未計劃下一代，發生性行為嘅時候盡量使用安全套就就更為可靠 
，令大家安心～ 希望可以幫到你。 