復必泰月經問題

(1) 本人服用yaz 避孕藥兩個月,無漏服 (最多相隔兩小時服用),上次月經正常,26/7 為最後一粒白色藥,但只出現兩日少量粉紅色血 (唔係正常月經量同顏色),23/7 我打左復必泰第二針疫苗,請問咁樣算月經已經黎左定叫其他情況出血?

(2) 20/7 為最後一次內射性行為,27/7 驗孕並無懷孕,請問懷孕機會大唔大? 因為月經唔正常好擔心疫苗影響藥效 🥲

你好呀 @agag :wave:t2:

(1)暫時都未有太多嘅研究話疫苗同避孕藥有咩好明顯嘅關連或者影響,雖然你一直有食開避孕藥,月經可能維持得比較穩定,但係因為疫苗都係一啲影響免疫系統嘅藥物,所以都有可能會影響到荷爾蒙嘅變化,因此打完疫苗之後果個月經週期都可能會出現血量少咗,甚至係日子嘅變動,外國都有個案係即使無食避孕藥,子宮都有點狀出血嘅,都唔洗太擔心嘅。通常啱啱開始食避孕藥頭三個月都會係適應期,再加埋你打疫苗,月經嘅情況有變動都係好正常嘅,如果好擔心嘅話,都可以帶埋你食緊嘅避孕藥,搵返開藥畀你嘅醫生,睇下佢有冇啲咩建議,如果之前都冇見下醫生,都可以去家計會度見醫生架。

(2)懷孕嘅風險非常低,好似上面咁講,疫苗會影響到荷爾蒙嘅變化,但係避孕藥嘅藥效暫時未有研究顯示有好明顯嘅關聯或者影響,所以藥效一直都有生效,暫時唔洗擔心住。同埋你係性行為7日後都有驗孕,初步結果都係無懷孕,如果真係好擔心,都可以係31/7再驗多一次,結果就會比較準確同可信架啦。