好驚有左呀

話說星期二晚六點幾同個男仔做左我第一次嘅性行為,對方好多經驗的。當晚佢冇帶套,最後係用口含完先睇住佢出面射的,事後發現自己原來係處於危險期,第二日中午即刻揾醫生攞事後藥食的,食完幾個鐘後分泌左一堆好似蛋白嘅鼻涕出黎,想問下我個情況機會大嗎?真係好擔心,一時太衝動。。。。
另外事後幾個鐘對方條JJ開始唔舒服,應該覺得好痕,但我當時完全無唔舒服冇分泌物,佢仲話我好乾tim,我懷疑係我有念珠菌所以搞到佢咁,而家大家都去check左但要等報告先知有冇菌,唉,我都唔知自己係咪有菌,邊個想傳染人架,但對方好似好怪責我點解唔知自己有咩菌咁,令到佢咁辛苦。。。
不過而家我擔心自己無M到囉…
唉,而家好似連fd都做唔成…

如果你性行為後72小時或120小時內食咗醫生處方嘅緊急避孕藥,咁懷孕風險會好低嘅。 :blush:

見你有提及「危險期」呢樣嘢,都想同你解釋返,月經同埋排卵係好容易受到其他因素影響嘅,例如荷爾蒙分泌、飲食習慣、休息、壓力、藥物等等。唔係每個月經週期都一定會一樣,如果你今個月經週期身體狀況有改變,可能排卵日期同月經週期都會受到影響㗎。而正正因為排卵同月經好容易受到影響,無論喺月經週期嘅邊一日,只要陰莖分泌物(精液同埋尿道球腺液,尿道球腺液係陰莖受到刺激嘅時候會分泌嘅液體,當中可能含有少量精子)同陰道有接觸,咁都會有一定嘅風險嘅。不過如果你已經服用咗經醫生處方嘅事後藥,風險會好低嘅。 :relaxed:

如果你真係好擔心,你都可以自行驗孕。卵子受精著床通常需要6-9日嘅時間,當受精卵著床之後身體就會開始分泌hCG呢一種荷爾蒙,而驗孕嘅原理係去檢驗尿液中是否含有hCG。所以,喺性行為嘅7日後(8月3號)驗孕,會得到初步結果,而11日後(8月7號)進行驗孕,就會得到較為準確嘅結果。 :wink:

同埋都想你有定心理準備,因為你今個月經週期服用咗緊急避孕藥,之後嘅1-2個月經週期都可能會受到影響,而月經嘅流血量、流血日子、經痛程度等等呢啲因素都可能會受到影響而同平時唔同。所以如果你嚟緊發現月經相比起平時嘅平均日期遲咗,唔需要太過緊張嘅。

而「食完幾個鐘後分泌左一堆好似蛋白嘅鼻涕出黎」,都想問返多啲資訊,呢啲分泌物有冇異味?或者特別嘅顏色,例如黃色/黃綠色?如果有異味或者顏色有變化嘅話,都建議睇下醫生檢查下有冇一啲感染或者發炎嘅情況。 :woman_health_worker:t2: :man_health_worker:t2:
而如果並冇異味或者特別顏色,咁就唔需要太擔心,荷爾蒙變化會影響分泌物嘅狀況嘅,事後藥中有高劑量嘅荷爾蒙,可能因此令你分泌物增多。

至於對方性行為後陰莖不適呢樣嘢,暫時未有醫生檢查報告都好難去判斷係咪真係念珠菌感染嘅。不過都可以同你講多啲關於念珠菌嘅資訊,念珠菌係一種人體中好常見嘅菌,本身已經有少量存在喺皮膚、口腔、消化道、性器官同埋其他身體部位到嘅,當身體狀況健康嘅時候係相安無事嘅,但係如果抵抗力不足、或者個人清潔冇做好,咁就有機會導致念珠菌大量繁殖造成感染嘅嘅。但係有時念珠菌感染未必有徵狀,或者症狀唔明顯嘅。念珠菌並唔係性病,不過可以經性行為傳播嘅。同埋原則上唔會係性行為後幾個鐘就即刻有不適嘅感覺,除非對方本身已經有其他感染。 :persevere:

而亦有可能對方唔係因為同你發生陰道插入式性行為導致佢不適,亦有可能係佢本身陰莖已經有細菌感染、佢同其他人嘅性行為導致感染,或者因為佢清潔不足等等。而好多時候陰莖有念珠菌而無症狀嘅情況更加普遍。或者口交時候口腔入面嘅細菌令到佢不適。亦有可能因為潤滑不足,摩擦令到陰莖痕癢(類似行路多/跑步之後有時大髀會痕)。但係我哋而家都唔清楚,所以建議你哋耐心等報告先。而即使報告顯示對方有感染念珠菌,都唔代表一定係你傳染俾佢,唔需要太自責。 :wink:

最後提返你,下次再發生性行為嘅時候,記得全程正確使用安全套,既可以降低懷孕風險,有可以減低性病傳播同埋其他感染嘅風險。關於正確使用安全套嘅方式,可以參考:https://www.instagram.com/p/B4EX0FVFLUf/?utm_source=ig_web_copy_link

而呢件事都係一次好好嘅提醒,性行為嘅每一方都有責任選用適合嘅安全措施,對自己同埋對方都有一份保障。你都可以同佢溝通返,唔應該係你單方面去承擔懷孕同埋感染風險,你哋雙方都有權同埋有責任去用商議用咩安全措施並達成共識。 :blush:

1個讚