事前想要停藥如何停?

女朋友食左事前避孕藥幾個月 然後就想聽 但呢個7月30號咩完 仲有5粒左右 咁應該點停藥?定食埋下個月?

想首先了解返,你所講嘅「7月30號咩完」係指乜嘢?發生完性行為?
如果女朋友每日有準時服藥,冇漏食,食完亦冇嘔吐或者肚瀉,其實身體係食藥呢段期間已經有穩定嘅避孕功效。如果期間有發生過性行為,懷孕風險都係好低嘅。

如果想停藥嘅話,原則上係食完呢一包藥,唔開下一排藥繼續食就已經可以。不過想提返你哋,停藥之後身體會漸漸恢復自然排卵,而因為本身女朋友食咗幾個月藥,避孕藥中嘅人造荷爾蒙成份抑制咗排卵,亦會令到月經週期喺藥物影響下變得好穩定規律,如果停咗藥,身體係會需要時間去慢慢建立返荷爾蒙分泌同埋自然排卵,所以,有機會停藥後嘅月經週期會比較浮動。而呢個恢復嘅時間因人而異,亦會受食咗幾耐藥影響。同時之間,停藥之後身體就冇咗避孕功效,如果未有懷孕打算,發生性行為嘅時候就需要使用安全套,咁就會更加安心啦。 :blush:

本人停左藥一個月,上個月21/7 第一日黎m 到依家都未黎m,正唔正常,中間性行為有用套,除左剛剛完m個日無用,但無內射

Hello 首先想了解返你停藥之前服用咗避孕藥幾耐?有冇因為啲咩特別原因而停藥?你停藥嘅時間係完成咗一整包藥,定係未食完一包藥就已經停咗? :face_with_monocle:

原則上,你停咗藥就已經失去咗避孕功效嘅,所以如果冇懷孕打算,發生性行為嘅時候要記得用返安全措施呀!即使冇內射,陰莖喺受到刺激嘅時候會分泌透明嘅尿道球腺液,當中有機會含有少量精子,所以無論喺月經週期嘅邊一日,喺冇使用安全措施嘅情況下,陰莖同陰道/陰道口有接觸,都會有一定嘅風險。如果你擔心嘅話,你可以進行驗孕。發生性行為嘅7日後驗孕會得到初步結果,而11日後會得到相對比較準確嘅結果。 :blush:

排除咗懷孕之後,就可以安心咁耐性等待月經出現。都想同你解釋返,避孕藥係通過服用人造荷爾蒙抑制排卵,喺停藥之後身體需要重新建立返荷爾蒙分泌同埋自然嘅排卵,而身體需要幾耐恢復都因人而異,而且受到你之前持續服藥嘅時間長短影響嘅。所以有機會你停藥初期嘅經期會比較唔穩定。而服藥期間你可能發現自己嘅經期好規律,其實係因為喺藥物控制下,呢種出血現象只係「撤退性出血」,同冇避孕藥影響下因為體內荷爾蒙水平變化同埋排卵而出現嘅月經唔同。所以之後你嘅月經就會受到其他身體因素影響,例如荷爾蒙、飲食、作息、壓力、生病等等,如果你發現自己之後嘅月經同服用避孕藥期間相比變得唔規律,都唔需要太過擔心呀。放鬆下心情,俾啲時間身體,月經會出現嘅。 :relaxed:

最後一包藥食完先黎m,之後就無再食下一包,依家月經已經黎左