同男朋友係以下日子都有性交
- 每次做都有帶套+完事後用水檢查有冇破裂，全部冇破裂）*
7月9（排卵期前9日）
7月14（排卵期期間）
7月20 （排卵期最後一日）
呢一個月做左4次
本應該係週期32嚟M，即7月31
雖然28-29號已經有胸脹、腹瀉、少少M痛
但截至今日8月2
都未嚟M
週期已經34
遲左3日 但月經症狀都keep住有
唔清楚係因為太緊張會中咗同個一排太夜訓（凌晨3:00-5:00先瞓）搞到亂咗
知道有做好安全措施 但係都係好驚
我應該點算好 我會唔會有咗
另外呢幾日未嚟 都去咗自慰（陰蒂）高潮後都會M痛，痛得幾勁。同埋分泌物同平時冇分別
Hello
如果你每次發生性行為都有全程正確使用安全套，而且安全套冇破裂冇漏，其實懷孕風險係好低嘅，唔需要太擔心。 
如果你擔心嘅話，可以自行驗孕。因為卵子受精著床通常需要6－9日嘅時間，當受精卵著床之後身體就會開始分泌hCG呢一種荷爾蒙，而驗孕嘅原理係去檢驗尿液中是否含有hCG。所以，喺最後一次性行為嘅7日後（7月27號）驗孕，會得到初步結果，而11日後（7月31號）進行驗孕，就會得到較為準確嘅結果。所以你可以考慮聽日著進行驗孕，已經會得到準確嘅結果，可能你親眼見到個結果，你都會覺得安心啲。 
另外見你有提到「排卵期」呢樣嘢，都想同你解釋返，排卵日其實要等月經出現咗之後，先可以推算返邊日排左卵。而月經同埋排卵係好容易受到其他因素影響嘅，例如荷爾蒙分泌、飲食習慣、休息、壓力、藥物等等。所以，除非每日都喺醫生嘅指導下用排卵試紙測試著有冇排卵，否則我地好難知道究竟邊日排卵。如果你今個月休息得比較少，或者壓力比較大情緒緊張，可能都會影響月經嘅。或者你今個月有冇一啲其他嘅身體變化？例如病過或者食過藥？呢啲因素都有機會會有影響嘅。即時你平時嘅月經週期都比較穩定，都唔代表之後每次月經週期都一定係一樣嘅。所以單憑app嘅紀錄估計或者日曆推算係唔能夠好準確咁預計到經期同埋排卵期嘅，因為app係唔會計算到你休息嘅情況、情緒、飲食等等呢啲身體因素嘅。 
建議你放鬆下心情，耐心等下月經出現。不過如果你連續幾個月經週期嘅長度／流血日數／流血量／經痛程度等情況都有比較大嘅浮動或者轉變，咁都建議可以去睇下醫生，檢查下有冇一啲病理性嘅因素（例如荷爾蒙分泌問題，卵巢／子宮問題等）導致呢個情況出現。同埋月經週期比平時平均長咗3日並唔算好大嘅轉變，唔需要太過擔心。 
而你講到嘅「胸脹、腹瀉、少少M痛」，呢啲都係常見嘅經前不適症狀，因為體內荷爾蒙水平變化同埋子宮充血腫脹導致。但係同時都可能有其他原因導致呢啲症狀嘅出現，所以我哋都好難單憑呢啲症狀去判斷自己幾時嚟m。而刺激陰蒂高潮後腹部不適嘅情況都可能要再留意觀察下，睇下會唔會同自慰姿勢同埋強度相關，定係有其他因素導致自慰後腹部脹痛。 
如果你對安全套嘅避孕功效唔放心嘅話，你都可以考慮配合使用埋荷爾蒙避孕法：避孕針或者避孕藥。避孕針要等醫生評估完你嘅身體狀況適合使用之後注射；而避孕藥雖然好容易買到，但建議第一次食之前要睇下醫生，睇下身體狀況係咪適合同埋適合邊款避孕藥。如果有需要，可以去家計會診所／母嬰健康院／部分私家診所預約睇醫生。 
不過荷爾蒙避孕法只可以避孕，唔可以好似安全套咁，減低性病或者其他感染（例如尿道炎、念珠菌感染等等）嘅風險，所以可以配合埋安全套一齊使用。而避孕藥亦有調節月經、慢慢令月經變得規律，同埋減少經痛同經前不適嘅作用，所以你都可以根據需要去選擇適合你哋嘅安全措施～ 
但係我之前係經期間都有自慰過 高潮後都會痛 而平時冇 不過去到今日第四日仲未嚟M真係有啲擔心
冇呀 冇食過藥 只係有熬夜同緊張
hello 你好啊 
，依照你之前分享嘅情況，如同上面回覆一樣，意外懷孕嘅機會其實好微，真喺唔需要太擔心。月經週期受好多內在因素同外在因素影響，如同你分享嘅熬夜，即喺生活習慣轉變，同埋緊張，即喺情緒波動都有影響身體嘅荷爾蒙分泌。所以，女性週期並不能夠100%同以往嘅經期一樣，之前經期準確可靠，都唔代表下一次嘅週期喺一樣。所以今次就算遲咗4日，都唔一定喺懷孕導致 。如果你真喺對意外懷孕好擔心，如同上面回覆都好建議你嘗試驗孕。如果你最後一次嘅性行為發生喺7月20日，喺性行為發生後11日驗孕就可以得出準確同可靠嘅結果。所以如果你好想知道答案，其實你依家就可以驗孕 
，只要跟足驗孕棒嘅指示，就可以放心相信結果。希望可以幫到你。 
8月3晚 有少少啡色分泌物 好似平時嚟M前會有嘅 8月4都有但得好少好少 但冇血 有M痛&肚痛 今日週期已經36日 我係咪有咗 好驚
啱啱先send完 即刻嚟M
真係好突然
嚟咗月經終於都可以放下心頭大石啦。
好似上面咁講：
月經週期受好多內在因素同外在因素影響，如同你分享嘅熬夜，即喺生活習慣轉變，同埋緊張，即喺情緒波動都有影響身體嘅荷爾蒙分泌。所以，女性週期並不能夠100%同以往嘅經期一樣，之前經期準確可靠，都唔代表下一次嘅週期喺一樣。所以今次就算遲咗4日，都唔一定喺懷孕導致。
所以有無嚟月經未必係檢驗係咪懷孕嘅唯一標準架，月經未嚟又擔心懷孕嘅話，如同上面回覆都好建議你嘗試驗孕。始終驗孕棒都係科學實證，相對上比較客觀，有檢查就唔洗擔心啦～