請問知唔知衛生署衛生科男性同女性都會抽分泌物去驗性病外，會唔會驗到有其他菌例如念珠菌等等架？？
同揾衛生科三個星期先有報告，如有咩事係咪頭一個星期會收到電話？同樣家計會要兩星期先有報告，有咩事會幾耐預先收到電話呢？？
好驚好驚，不過本人（女）第一次性行為，照道理我自身唔會帶有性病啦？？？
hello你好啊 
，首先都想你明白到社會上對性傳染疾病有好多污名同迷思，其中一個就喺患上性病同發生性行為嘅次數有關（例：若經常發生性行為，就會更加容易患上性病）。其實，每次性行為有冇同伴侶有足夠嘅共識，使用安全措施保障大家、又或者平日清洗性器官嘅生活習慣更能影響患上性病嘅機會。所以未開始回應你上面嘅問題之前，好希望你明白到有冇固定嘅性伴侶、性行為發生嘅次數、同性工作者進行親密行為會唔會更大機會導致性病等等，呢幾項原因同患上性病嘅機會率其實冇直接關係。所以如果你真喺第一次發生嘅性行為，以你所知對方發生性行為嘅次數比較少嘅話，其實感染嘅機會不大。但如果你未必太了解/確實知道對方以往發生性行為嘅經歷，可能都會有小程度上嘅嘅風險。所以發生性行為1次 VS 發生性行為10次，但1次喺冇使用安全套，同埋10次都有使用到安全套，當然果1次會比較高風險。確實未發生過性行為就當然唔會自帶性病，但需要視乎對象以往嘅性方面嘅經歷，至知道屬唔屬於有風險。 
→ 性病嘅傳染方式
性病嘅傳染方式，通常都喺透過高風險嘅體液，例如精液、腸液、尿道球腺分泌（Pre-cum）、陰道分泌、血液，直接接觸到身體上開放性嘅傷口（例如淌血傷口）、又或者同較簿同脆弱嘅黏膜組織進行磨擦，有機會擦傷，例如肛門、直腸、口腔、陰道、眼睛、鼻腔等等接觸，就會有機會傳染到性病。都希望你可以了解性病傳染嘅原理。
→ 檢測原因？
衛生署衛生科提會提供社會衛生科診所提供梅毒、淋病、非淋菌性尿道炎、生殖器皰疹、生殖器疣、陰蝨、衣原體感染和愛滋病毒/愛滋病檢測，檢查形式主要包括驗血、拭子和外觀檢查。而念珠菌本身並非屬於性病，所以都想了解一下你點解想進行性病檢測/念珠菌測試，喺進行咗唔安全嘅性行為？還是身體出現咗某d症狀而擔心自己有患上念珠菌嘅機會？ 
如果你果前發生性行為，但有正確地使用安全套嘅話，都唔會有太大嘅風險。相反，如果你擔心自己有感染念珠菌嘅風險，就可以直接去婦科診所檢查～ 
→ 檢測服務
同埋都想分享其實唔同嘅性病都有一定嘅潛伏期同空窗期，潛伏期代表身體就算受到感染，距離身體體徵及症狀有明顯的表現中間嘅時間；空窗期代表身體受感染，距離身體抗體／病毒量可被醫學檢驗偵測中間嘅時間。而唔同性病有唔同時間嘅潛伏期同空窗期，而唔同機構/ 檢測方法，即使是同一種性病，都有不同空窗期時間。所以因應唔同嘅個案，又或者出報告當日至知道檢查後再取得嘅報告有幾耐。所以都好建議你可以直接打電話俾相關機構中心，得出最可靠嘅回覆。 
可以考慮去衛生署嘅社會衛生科（合資格人士費用全免亦毋須預約）、家計會或者坊間有提供免費測試嘅機構（機構嘅服務有時會限制係某啲群體先可以使用，事前都要自己上網了解一下先）。而如果經濟上你能夠負擔得到，有好多私家診所都有提供有較短空窗期嘅測試，亦會有唔同嘅package可以做全面嘅檢查可以俾你選擇。希望可以幫到你。