一路都有食開Yaz 28粒嘅，想問下如果4/8有性行為但係冇內射，但係5/8停咗藥會唔會有事，因為上網睇話避孕藥係可以推遲或者提早月經嚟，咁我過多幾日係咪應該會嚟M定係會有咗，好驚會有咗
Hello @adcyhbfh 
想了解一下呢款避孕藥係從幾時開始服用嘅？而今次你所指嘅停藥，係咪指比原定嘅服用白色藥丸（非含活性成分藥丸）提早左停止服用避孕藥？而今次停藥嘅原因係D咩？上一次係幾時來經？
一般黎講，如果你之前都有持續依指示定時服用避孕藥，咁4/8當日藥效依然會持續發揮嘅，所以該日性行為會導致會懷孕嘅機會唔大。雖然5/8開始停藥，不過因為本身你嘅身體會因為避孕藥藥效嘅緣故，而抑制左排卵** 同埋令精子難以同卵子結合及著床，所以無需太擔心4/8當日嘅性行為會導致懷孕 
。不過始終提早左停藥的話，都會打亂左本身28日的月經週期，建議考慮依家開始，直到服用新一盒避孕藥嘅第7日果日為止，都配合番阻隔式避孕工具（安全套） 
。同埋因為今次提早停藥，所以今次嘅月經都有機會提早黎。
之後可以留意番以下情況，都需要再次配合阻隔性避孕工具 使用， 持續7天 ，因為藥效有機會消失，需要重新建立，避免期間有懷孕風險。
服藥期間曾經漏服藥，有補食藥丸
服藥期間曾經漏服藥，無補食藥丸
曾經停藥（不包括Yasmin七天無藥期）
如果擔心的話，都可以於性行為11日後進行驗孕， 到時嘅驗孕結果都已經會係準確及可靠嘅。因為一般受精卵著床需要6-9日，所以性行為7日後驗孕就可以得到初步驗孕結果，而性行為11日後進行驗孕結果就會較準確及可靠 。
最後，都提醒番雖然避孕藥係能夠唔同嘅服用方式，而推遲或提早來經，不過好視乎日子嘅差距係幾多。一般說明書可能都有提及延遲3-5天來經嘅服藥方式，不過如果係想提早/延遲來經的話，都建議先及早諮詢醫生嘅意見啊
我上個月開始食，每日都好準時食，上個月係食第三粒白色藥丸嘅時候嚟，今個月因為一啲原因要停食(唔關身體狀況事)，所以係大約食咗12粒嘅時候停咗，好驚因為咁而會有BB
如果你呢段時間每日都有準時食藥，冇漏食，亦無嘔吐或者肚瀉狀況嘅出現，咁你嘅身體會有穩定嘅避孕功效。所以如果你8月5號停藥，8月4號嗰次嘅性行為懷孕風險係好低嘅，唔使擔心。如果你依然擔憂嘅，你可以考慮驗孕，係性行為嘅7日後（8月11號）驗孕會有初步結果，而11日後（8月15號）進行驗孕就會有相對比較準確嘅結果。
都有幾樣嘢都想提返你：
- 停咗藥之後，就會冇避孕功效，所以8月5號之後再發生性行為都要使用安全套
- 因為之前有避孕藥當中嘅人造荷爾蒙抑制排卵同埋控制月經，但係而家停咗藥，身體可能需要啲時間去建立返荷爾蒙分泌系統同埋自行排卵，恢復時間長短因人而異，同時都受你本身服用咗幾耐藥影響。所以可能你嚟緊嗰次月經會相對平時有比較明顯嘅唔同，例如相對比較遲嚟。
- 如果你之後想再食返避孕藥，係要開新一包有第一粒開始食嘅。同埋建議再次服藥之前睇下醫生，檢查下身體狀況係咪適合繼續服用yaz呢一款藥。你可以去母嬰健康院／家計會診所／私家診所等睇醫生配藥。
