卵巢囊腫 & 驗孕棒假陽性 / 排卵問題

想請教一下,上網見到有啲資訊會話卵巢囊腫有機會導致家用驗孕棒出現假陽性結果,
究竟係所有種類嘅卵巢囊腫都會導致假陽性,定係只有少部分罕見嘅類型先會?

如果以往有卵巢囊腫嘅病歷,但已經做過微創切除囊腫,又會唔會有影響呢?
切咗之後,又會唔會有機會影響排卵問題?

感謝!!! :bowing_woman:t2:

Hello 明白你嘅擔憂啊! :smiling_face_with_three_hearts:

其實卵巢囊腫(ovarian cysts)都有幾個種類嘅,甚至有啲係唔需要特別醫治都會自行消退,如果有身體狀況方面嘅疑慮,或者出現咗同平時唔同嘅身體狀況,都要盡快詢問返醫生意見呀! :blush:

卵巢囊腫可以大致分為兩類,第一種係「功能性卵巢囊腫」(functional cysts),再分為卵泡囊腫(follicle cysts)同埋黃體囊腫(corpus luteum cysts),而呢一類嘅囊腫係隨住月經週期卵巢排卵現象而造成,多數冇明顯病徵或者特別唔舒服,所以通常係唔需要治療,幾星期至3個月內就會自行消失。而會導致驗孕出現假陽性嘅,就係黃體囊腫(corpus luteum cysts)呢一種。所以如果你之前嘅卵巢囊腫病史並唔係呢一種,就唔需要擔心驗孕結果受到影響。而如果你擔心嘅話,都可以搵醫護人員檢查下你有冇出現新嘅卵巢囊腫,或者用其他方式進行驗孕。 :wink:

而第二種卵巢囊腫就唔係因為月經週期導致,而係因為有異常嘅細胞增生,咁就要視乎情況同埋醫生嘅診斷同建議睇下需唔需要手術或者藥物治療。呢一類又可以大概分為3種:囊腺瘤(cystadenomas)、皮樣囊腫(dermoid cysts)同埋子宮內膜異位囊腫(endometriomas)。呢一啲卵巢囊腫就唔會影響驗孕結果嘅。不過如果細胞增生情況嚴重、囊腫尺寸較大嘅話,係會導致明顯嘅不適嘅。 :confounded:

參考資料:https://utswmed.org/conditions-treatments/ovarian-cysts/

https://www.qhms.com/health-article/ovarian-cysts.aspx?lang=tc

理論上完成咗手術治療,係唔會影響正常排卵嘅。不過有啲個案係會有手術後依然有返發卵巢囊腫嘅情況。所以建議你可以定期做盤腔檢查,同埋如果覺得有異常嘅身體狀況,例如下腹腫脹或者痛楚、經期有明顯嘅變化、或者排尿不適,就要盡快搵醫生檢查下啊! :woman_health_worker:t2: :man_health_worker:t2:

感謝詳細嘅解說! :bowing_woman:t2: