上個月開始食避孕藥(yaz 28粒, 24+4嗰種)，月經黎第一日開始食，岩岩食到第23日，但係月經今日早咗黎
咁我係咪可以繼續食剩低嗰5粒，跟著再開一包？
因為本來應該食曬28粒先M黎，但早咗所以有啲擔心，唔知咁樣個cycle會唔會亂，因為變左唔係M黎第一日開始食粉紅色藥丸
感謝解答
Hello
首先想了解返你食避孕藥之前有冇睇過醫生先食？雖然避孕藥好容易自己買到，但我哋都建議第一次服用之前要睇下醫生先。因為唔係每個人嘅身體狀況都適合食避孕藥，而且市面上有好多款唔同嘅避孕藥，每款有唔同嘅人造荷爾蒙成份同劑量。所以第一次服用之前，可以俾醫生檢查下你嘅身體狀況係咪適合食、同埋適合食邊一款避孕藥。如果你之前未睇過，不妨都去母嬰健康院／家計會診所／私家診所等預約睇醫生。 
如果你暫時食緊呢一排藥都冇一啲明顯嘅唔舒服，咁去睇醫生之前嘅呢段時間都可以繼續每日一粒咁服用嘅。本身yaz呢一款藥係有24粒含有人造荷爾蒙活性成分嘅粉紅色藥丸，同埋4粒不含荷爾蒙嘅白色非活性藥丸，當身體適應咗藥物之後，就會喺服用白色藥丸期間，因為荷爾蒙變化而出現月經。而因為你今次係第一次服用，身體需要啲時間去適應呢隻藥，所以未食到白色藥丸已經有月經出現係有機會出現嘅，你係可以繼續服用嘅。 
建議你可以盡快預約睇醫生，如果搵醫生檢查完身體，認為你身體係適合嘅，你就可以俾啲時間身體去適應呢隻藥，慢慢有規律穩定嘅經期。適應時間因人而異嘅，通常為1－3個月，甚至有啲人可能需要再耐啲例如6個月嘅。 
另外「M黎第一日開始食粉紅色藥丸」係唔一定嘅，因為有機會食緊白色藥丸期間月經出現，去到下一粒粉紅色，都已經唔係經期第一日。同埋通常家計會會建議第一次服藥係喺經期第5日開始食第一粒，所以都未必係「M黎第一日開始食粉紅色藥丸」。
感謝答覆～