食避孕藥時間不穩/想轉

我知道食避孕藥要時間固定嘅原因係想荷爾蒙波動穩定啲,會少啲不適。

因為我自己食藥有時唔係咁方便,唔想比阿爸阿媽知。番工個陣食固然冇事,但放假係屋企就要匿埋一邊趁佢地睇唔到個陣食,仲要睇個個鐘數係咪出街之類,係就可能會遲/早食。早個排就有一粒早左四個鐘頭食。

我想知,如果比原定時間早左例如一至兩個鐘食會唔會有問題?同埋如果我想轉時間食,係咪等停完藥開下包先轉會好啲?

牌子食緊安意避,暫時食左個半月,除左頭兩個禮拜試過頭痛同埋心情低落之外冇咩問題。

hello 你好啊 :smiling_face_with_three_hearts:,事前避孕藥主要分為單一荷爾蒙同混合荷爾蒙兩種,依照你嘅情況,服用嘅喺安意避,屬於混合荷爾蒙,依類避孕藥嘅服藥時間相對無咁嚴謹,所以如果你想早少少,一至兩個鐘之前服用,其實唔會影響藥效,唔需要太擔心。所以如果你真喺想轉時間嘅話,其實都可以轉。最重要嘅喺,確定當日冇漏服就可以~ 如果你想轉時間的話,其實唔需要等到開一包新嘅避孕藥,anytime都可以轉~ :wink: :wink:

而你都提到感受到避孕藥嘅副作用,例如頭痛或者心情低落,都喺屬於避孕藥嘅常見副作用之一,因為事前避孕藥當中含有嘅荷爾蒙會影響到身體荷爾蒙分泌,所以會引致情緒波動同其他身體反應。 :pleading_face:

另外,都見你提到服用避孕藥嘅原因喺想穩定荷爾蒙,唔知你第一次領取事前避孕丸之前,有冇問問醫生意見? :face_with_monocle:因為醫生檢查下你嘅身體狀況,睇下你適唔適合食避孕藥、同埋適合食邊一款藥。同埋都建議你可以每一年都覆診睇下醫生,了解身體狀況,同埋仲調唔適信持續服用避孕丸。希望可以幫到你~ :revolving_hearts:

1個讚

我係去家計會配藥嘅所以當然係問左醫生啦:smiley:拎之前都有睇清楚家計會網講有咩副作用,同男朋友商量過之後再去配嘅。除左頭兩個禮拜mood swing真係勁左,其他時候同冇食個陣嘅感覺差唔多,因為我本身都係M到前後都會頭痛同埋有一兩日會特別易炆。

因為醫生有建議過最好固定時間食,我諗係純粹怕唔記得食?上網就話時間不定可能會導致荷爾蒙波動不穩,但我個次早食左4個鐘又咩事都冇。

不過仲有個問題係,睇過話食藥會經量變少。但對上個次個量好似同原本差唔多,日數仲反而變長左由五日變七日。個量係頭兩日都好少而且係啡,第三日就血色好似平時咁多,第六日先變番少量啡。而原本通常係頭兩日血色,二三日最多,第五日就少啡到幾乎冇。

hello你好,其實你講得啱啊 :laughing:,醫生建議定時服用都系主要想令人建立每日服藥嘅習慣,避免初時服用事前避孕丸嘅女性會唔覺意漏服咗。但系因為你服用嘅安避意屬於混合荷爾蒙,時間限制比較少,所以就算唔系每日同一時間服用,藥效都唔會因此有太大嘅影響,可以放心先。 :laughing:

而另外你提到情緒嘅波動,同埋服藥初時月經嘅血量變得唔穩定,突然變多或者變少都系屬於正常副作用嘅。一般而言,身體初期都需要一段時間(一般而言唔超過3個月)嚟適應事前避孕藥嘅藥效 :face_with_monocle:。副作用都會隨住時間而慢慢消失。但如果你除此之外,都冇其他嚴重嘅不適情況發生,例如嚴重嘅痾嘔、又或者強烈頭暈頭痛,都可以慢慢適應~ 希望可以幫到你。 :smiling_face_with_three_hearts:

1個讚