你好 同男友愛愛前有些按摩油環節 增加情趣
中途怕按摩油會帶入陰道 我哋都好小心處理 盡量不捉碰安全套 直至完成後取出 我哋照平常檢查安全套 例如放入空氣擠壓
如事我哋用手上有油既手試 頭兩三下擠壓都冇事 突然第三四下呯一聲個套爆左 個下好驚同上網搵先知安全套係唔適宜同按摩油一齊用 (油性) 所以都好擔心會懷孕 我大概兩日前經期尾 擔心求解答 謝謝
油性嘅物質的確會令到乳膠安全套破裂，所以唔建議用油性產品作為性行為嘅潤滑劑，保存同埋使用安全套嘅時候亦要避免接觸到油性嘅物質。 
如果你哋嗰日嘅性行為當中，觸摸安全套嘅時候雙手冇按摩油，亦冇用按摩油接觸陰道同埋陰莖，過程中安全套冇穿冇漏，咁理論上懷孕風險係好低嘅。同埋如果如你所講「頭兩三下擠壓都冇事 突然第三四下呯一聲個套爆左」，咁應該係因為射精後，因為安全套接觸到按摩油，所以先會破損。
但係如果你唔能夠肯定安全套有冇喺性行為過程中穿或者漏，或者你依然好擔心懷孕風險，你都可以考慮使用緊急避孕。喺性行為嘅72小時內／120小時內可以服用緊急避孕藥（事後藥），因為係處方藥物，所以要睇咗醫生，醫生認為你嘅身體適合使用先會俾藥你。而如果你嘅身體並唔適合食緊急避孕藥，喺性行為120小時內，都可以由醫生置入子宮環作為緊急避孕嘅方法。如果你想進行緊急避孕，就盡快去家計會診所／母嬰健康院／部分私家診所預約睇醫生啦。 
如果你衡量完覺得係唔需要進行緊急避孕，而你又擔心嘅，你都可以考慮驗孕。喺性行為7日後驗孕會得到初步結果，而11日後則會得到較為準確嘅結果。
最後想提返你哋，下次如果性行為之前會使用按摩油按摩嘅，記得使用安全套之前清潔好雙手同埋性器官，確保冇淨餘嘅按摩油，咁就可以更加安心啦。或者你哋都可以考慮使用PI或者PU物料製嘅安全套，不過按摩油進入陰道係有機會破壞陰道嘅酸鹼平衡影響陰道健康，所以都係要清潔好按摩油先呀！同埋而家都有啲潤滑劑產品係可以當按摩油咁嚟用嘅，當中唔會有油性成分，你哋有需要都可以去選購下，記得睇清楚成份哦～ 