七月下旬在一交友APP認識了一個30歲的香港女仔。由於大家有共同興趣，都傾得幾投契，自第一日起平均每日都有十來個對話來回。由興趣至工作，甚或少許家庭瑣事都會講下。我以為有機會和她做到現實世界的朋友，係當她八月中開始問我對愛情的一些看法。我知道她想同「人」保持距離，這亦是她和之前男朋友分開的原因之一。然後有一天，她在「息怒」 (自認識一星期後我們開始用這通訊軟件溝通）已讀不回接近48小時。之後回覆SORRY。這證明她想同「人」保持距離。這句SORRY之後，我們又談了娛樂圈中的愛情事。我以為機會又來，便乾脆約她吃飯，誰知她回應 “I did not imply anything”。我就感受到她可能只想認識網友。然後，她再有一兩個娛樂圈愛情事的訊息，加了晚上一句good night，我都選擇了已讀不回，直到現在。我想交朋友，她可能只想交網友，這種分歧，我覺得繼續對話已沒意思。我只想看看各位對以上內容觀點有咩睇法？特別係約一餐飯可以代表到甚麼「男女朋友關係」？謝謝
hello 你好啊 
，首先好感謝你信任我地，願意討論關係上嘅煩惱。的確，社會上唔同嘅個體嘗試喺交友app上面，都可以有唔同嘅目的、期望同感受。某d人主要想尋求身體上嘅快感、某d人主要用嚟打發時間，同陌生人傾下計，某d人嘗試一下開展嘅親密關係嘅可能性。所以經歷唔同生命階段、又或者生活近期發生嘅事伴、價值觀、生活習慣都會唔多唔少影響喺交友App嘅經驗，人與人之間嘅不同、又或者分歧唔會因為網上世界而變得唔同。 
依照你分享嘅情況，對方或者依家未必喺一個可以接受、開展新感情、新關係嘅階段。所以當你想行前一步嘅時候，主動約食飯，對方未必應承。而「約一餐飯」其實喺唔同關係嘅處境當中嘅定義都未必一樣，可以喺雙方踏出一步嘗試，都可以喺純粹將網絡世界轉為現實，睇下雙方喺真實嘅情況下相處會唔會變得唔同。唔同人，喺唔同階段同處境可以截然不同嘅定義，都要根據唔同嘅對象。
最後都想提提你，因為喺網上世界傾計同相處，未必可以了解到對方嘅身體語言、表情 
等等，所以未必能夠好透咁掌握到對方嘅諗法。如果未必好清楚對方嘅意思嘅時候，都不妨可以直接問下對方 
，例如：「想發展一個點樣嘅關係？」由此避免誤解到對方抽象嘅意思，影響大家嘅關係。當有唔肯定嘅時候，都可以直接了當咁問對方，保持雙向有效嘅溝通～希望可以幫到你。