食左兩年Yasmin，一直好準時食，冇漏左食藥。 最近開左新一盒，到尋日（第九日）食藥先發現第七同第八日唔記得食藥，所以一次過食左兩粒。但係第八日曾經發生性行為係體內射精。今日發現又黎m，但係兩星期前已經黎左一次。咁嘅情況下懷孕嘅機會大唔大？洗唔洗食事後丸？
Hello~ 首先如果發現漏服多於一粒嘅避孕藥時，建議立刻向醫生查詢返接下來嘅服藥安排。因為一次過補服兩粒藥丸有機會擾亂左荷爾蒙水平，亦都有機會係短期內出現兩次月經嘅原因，所以唔建議喺未諮詢醫生意見下服用。
至於懷孕風險方面，因為第八日並未補服藥丸，令藥效降低，所以當日嘅性行為係有懷孕嘅風險嘅。如果擔心嘅話，建議去睇醫生領取緊急避孕藥，佢分為單一荷爾蒙同黃體激素受體劑兩種，前者嘅服食時限係性行為後嘅72小時內，愈遲服用失敗率愈高，而後者就係120小時內，服用時限唔會影響藥效。
不過留意只有單一荷爾蒙嗰隻先可以同避孕藥一齊服用，所以如果決定服用嘅話，建議盡快見醫生領取，並且向醫生說明你正服食緊避孕藥。
緊急避孕藥喺香港係法例規定必須經醫生處方嘅藥物，所以建議你去家計會、母嬰健康院或者私家診所領取。如果想了解多啲相關嘅資訊，可以瀏覽以下嘅網頁: 緊急避孕 - 香港家庭計劃指導會