請問需唔需要食事後丸

你好呀
已經食左yaz避孕藥4個月,一路都有準時食。
今日22/8, 1700左右有進行過性行為,全程都有戴安全套,男朋友未射精。
但之後拎安全套去入水,睇下安全套有冇穿個陣,發現個安全套底部(尖端)有滲水情況。
跟上個月經期,應該聽日會黎m。
請問依個情況,需唔需要睇醫生食事後藥?
唔該哂!

Hello你好!

如果你呢4個月嚟有準時食藥,冇漏食同埋冇嘔吐嚴重腹瀉呢啲症狀,其實你嘅身體已經慢慢適應咗避孕藥,建立咗穩定嘅避孕功效啦。因為避孕藥當中嘅人造荷爾蒙會抑制排卵、改變子宮內膜嘅環境同埋增加子宮頸液嘅粘稠度,從而達致避孕嘅功效。所以你哋嘅性行為懷孕風險係好低嘅,唔需要服用緊急避孕藥。 :relaxed:

避孕藥有避孕功效,但唔能夠好似安全套咁減低性病傳播或者其他感染(例如尿道炎、念珠菌感染、陰道細菌感染等)嘅風險,所以你哋之後再發生性行為,即使有服用避孕藥,都可以繼續配合埋使用安全套呀。見你哋有講安全套尖端可能破裂,可能係因為配戴安全套嘅時候冇擠走儲精囊入邊嘅空氣,因為磨擦導致破裂。關於正確佩戴安全套嘅方法,可以參考:https://www.instagram.com/p/B4EX0FVFLUf/?utm_source=ig_web_copy_link