我一向都比較容易濕，享受sex既過程
近呢半年，我就成日都感染尿道炎，食完抗生素又搞到有念珠菌
今個月我仲開始覺得下面好乾，就算男友做足前戲，而家都唔會好似以前咁濕
所以性交時會覺得痛，特別一開始時…用gel先好少少
但都大大影響到我，冇以前咁享受呢個過程，甚至性慾都下降，亦好擔心自己出現左咩事
我食左一年yaz，唔知同食避孕藥有冇關係呢？仲有咩其他原因會導致我性慾下降呢？希望你地可以解答我既問題。thanks！
你好呀 @jelly 
都明白依家同以前好大對比，令你好不安，不過你性慾下降都唔係無原因嘅。 
性慾下降、分泌物分泌不足的確有機會係由避孕藥引起。原因係因為避孕藥入面嘅人工合成激素（synthetic hormones），有機會刺激體內正常嘅激素平衡，而影響性慾以及性反應。陰道分泌物亦會因此而減少，性行為過程中有機會因陰道分泌物不足而產生疼痛／痕癢感覺 。 
因為你嘅情況已經服用咗避孕藥一年，而避孕藥嘅副作用一般會隨著身體慢慢適應藥物而消退，突然出現副作用嘅機會係比較少，所以依家都較難證明性慾下降及分泌物分泌不足嘅情況係由避孕藥所引起 。 
不過因為都有好多人食完避孕藥出現咁嘅情況，你考慮下會唔會繼續食呢個牌子，試下會唔會換一隻牌子比較好啲，當然最好都係要問下醫生嘅意見啦。 
你有提及你成日感染尿道炎，其實尿道炎都會有影響分泌物嘅情況，有可能會導致分泌物減少嘅。另外你都提及食完抗生素都有念珠菌出現，建議你見返開抗生素俾你嘅醫生，睇下佢會唔會有第二隻藥俾你，因為抗生素都非常影響荷爾蒙嘅變化嘅，有可能因為荷爾蒙增加或者減少而令分泌物有所減少。 
另外你都可以留意下係咪每次性行為後都有尿道感染嘅情況，同埋有無係開始性行為之前清潔性器官，同埋完咗之後都有去小便幫助排走啲細菌。如果發現真係比較多情況係完咗性行為之後有感染嘅話，可能就要搵買伴侶一齊去檢查啦，因為除咗自身嘅念珠菌增生以外，都有可能係伴侶感染咗念珠菌而唔知道（因為男性念珠菌增生係唔會有病徵嘅，而念珠菌係一直都存在係大家嘅性器官度，只係因為有時比較熱或者清潔得唔太足夠而導致增生同埋有感染），導致係性行為之後交叉感染，有可能因此而不斷復發。雖然你有食開避孕藥，但建議你可以試下下次性行為用安全套，因為安全套可以減少念珠菌交叉感染嘅情況，睇下會唔會好啲。 
如果發現都係無分別又或者唔係特別係性行為後出現，都可以試下去私家診所做一啲種菌嘅測試，因為有啲朋友仔都曾經有咁嘅情況，不斷食藥，之後做咗種菌測試先發現原來感染咗一啲比較唔常見嘅細菌，例如陰道感染咗大腸桿菌之類。所以有可能一直食開嘅抗生素都唔能夠針對返果隻細菌。 
同埋留意返，係有感染嘅情況下，要盡量避免有性行為呀，一定要好返先可以做呀。
見到你地都有嘗試使用潤滑劑，係一個好好嘅方法嚟，其實都好建議平時都使用潤滑劑，因為單靠分泌物好多情況下都唔足以支撐到成個性行為完成嘅，所以可以用潤滑劑去輔助，一嚟可以加強潤滑，二嚟都可以減少因為太乾而造成摩擦嘅疼痛。
除此之外，性慾及分泌物量仲有機會係被其他原因影響。
性慾方面 ，有機會因為最近壓力過大、與對象關係缺乏新鮮感、與對象關係出現問題、年齡增長等，而出現性慾下降嘅情況。 
分泌物量方面 ，除左一般常見嘅壓力過大、身體疲倦、經期等原因外，都有機會因為服用過藥物，或者懷孕同生BB導致荷爾蒙有所轉變，導致暫時性陰道較乾嘅情況。性慾及分泌物之間，互相亦都可以有所影響。例如分泌物不足，會令性行為過程中變得唔舒服，減低性慾。性慾下降嘅時候，分泌物亦好大機會相對少左。 
所以，都可以回想一下最近呢兩個月，有無以上嘅其他原因出現過，都有機會影響性慾以及分泌物量啊 。 