琴日同男朋友性器官互相摩擦，冇插入，磨磨下佢係我陰道附近射左（射嗰陣冇直接接觸到我任何部位）
男朋友冇用套，我仲係處
我啱啱嚟完M 3日，但14日前開始嚟M（平時嚟M都唔準）
咁樣會唔會有機會有左架
處女懷孕機率係咪好低
唔該曬解答
懷孕係因為卵子同精子相遇、受精、著床而形成，而如果你哋嗰次嘅性接觸當中，性器官之間冇直接接觸過；過程中如果精液同埋尿道球腺液（陰莖喺受到刺激嘅時候會分泌透明嘅尿道球腺液，當中有機會含有少量精子）亦冇接觸到陰道／陰道口，精子唔會經陰道口進入並遊向子宮，所以精子同卵子係唔會接觸到，變相亦唔能夠導致懷孕嘅。 
但係，如果過程中陰道口／陰道同陰莖／陰莖分泌物有接觸，無論係喺月經週期嘅邊一日，都會有一定嘅懷孕風險。因為月經同埋排卵好容易受到其他因素影響，例如荷爾蒙分泌、壓力、飲食等等身體狀況，所以我哋好難準確咁知道究竟幾時排卵、幾時月經出現，尤其你話你本身月經週期都比較浮動。懷孕風險同係唔係「處女」係冇任何關係嘅。同埋都想你思考返究竟點樣為之「處女」？發生過陰莖陰道插入式性行為？定係有其他界定嘅方法？即使冇發生過插入式性行為，陰道前膜（俗稱「處女膜」）本身都唔係完全封閉嘅；如果唔係，經血同埋分泌物都唔能夠流出體外；而即使唔係性行為，做運動呢啲行為都有機會令到陰道前膜損傷。所以即使從來冇陰莖插入，陰莖分泌物有接觸到陰道口都會有一定嘅風險。
最後，建議你哋可以考慮即使唔發生插入式嘅性行為，都可以考慮使用安全套，避免陰莖／陰莖分泌物同陰道口有接觸而有風險。關於安全套嘅使用方法，可以參考：https://www.instagram.com/p/B4EX0FVFLUf/?utm_source=ig_web_copy_link
或者如果你哋唔考慮使用安全套，建議你哋射精嘅時候避開陰部附近嘅位置，例如下腹、大髀內側、大髀底部等位置，避免精液接觸到陰道口嘅機會。 
1個讚
唔該晒你詳細嘅回覆
我哋係陰道口同陰莖直接接觸…
冇插入陰道嘅行為
你提到有一定嘅風險…我唔想有左，係咪應該48小時內食事後丸？
如果你嘅陰道口同陰莖前端（龜頭）有接觸，咁都有一定嘅風險嘅，但相比起插入式嘅性行為，風險會相對低啲；而如果陰道口冇同陰莖前端有接觸，風險會相對更加低。
如果你真係好擔心，想食緊急避孕藥，你可以喺性接觸後72小時／120小時內睇醫生進行緊急避孕。因為緊急避孕藥喺香港係處方藥物，一定要有醫生處方，而且醫生要評估你嘅情況是否需要同埋你嘅身體是否適合食藥。現時家計會診所、母嬰健康院、部分私家診所都有呢個服務，如果你細過26歲，可以去家計會嘅青少年保健中心：青少年保健 - 香港家庭計劃指導會 。如果有需要，就盡快去預約睇醫生攞藥呀。 
而如果你衡量完風險，覺得唔想食藥嘅，而你又擔心，你都可以自行驗孕。發生性行為嘅7日後驗孕會得到初步結果，而11日後會得到相對比較準確嘅結果。你可以等到7日／11日後驗孕呀。 