Hello 同男友係14號做左 事後都有裝水check安全套有冇穿 本身應該23號黎m但冇黎 係28號驗孕驗左2次都顯示冇中 平時啲m都好準 最多遲1-2日 但今次遲一個星期 搞到我好擔心 驗孕結果係咪準
Hello
驗孕方面，其實驗孕係去檢測體內有無hCG呢一種荷爾蒙，而hCG係喺受精卵著床之後身體先會產生嘅。而卵子受精著床需要大概6－9日，所以，喺性行為嘅7日後驗孕會有初步結果，而11日後驗孕會有相對比較準確嘅結果。如果你14號發生過性行為，28號如果有根據驗孕棒包裝指示驗孕，咁你嘅驗孕結果應該係準確可靠嘅。而且現時市面上嘅驗孕棒都有好強嘅特異性（specificity）同靈敏度（sensitivity），所以喺正確使用嘅情況下準確度係好高嘅。如果你真係好擔心嘅話，聽日可以再驗多一次，不過可以設立個目標俾自己，如果驗孕結果都係陰性嘅話，就要嘗試相信個結果，話俾自己知「我冇懷孕」。 
而關於月經呢樣嘢，都想同你解釋返，其實月經係有身體幾個繁複嘅系統互相影響而形成嘅，所以好容易受到唔同身體或者環境因素影響。例如荷爾蒙分泌狀況、飲食、作息、壓力、生病、藥物等等。即使你平時嘅月經週期都比較穩定，週期長度只有1－2日嘅差距，但唔代表每次嘅月經狀況都一定係完全一樣。你最近會唔會休息得唔好？飲食習慣有冇改變？或者有冇食過藥打過疫苗？ 
呢啲因素都可能會影響月經㗎。甚至你擔心懷孕嘅緊張情緒都會影響㗎。所以單靠APP或者日曆嘅紀錄並唔可以好準確咁推斷究竟幾時月經會出現，因為APP／日曆唔會知道你身體嘅其他狀況。但係有紀錄月經嘅習慣都係好嘅，可以方便自己清楚了解返，同埋如果日後真係因為月經／其他婦科問題睇醫生，都可以話返俾醫生知道你嘅月經情況。 
不過如果持續幾個月經週期嘅情況，例如月經週期長度、流血量、流血日數、經血顏色質地、經痛情況等等，都有好明顯嘅變化，咁都可以考慮睇下醫生，了解返自己嘅身體情況，睇下有無啲咩特別原因（例如荷爾蒙分泌問題、子宮／卵巢問題等等）導致呢啲浮動嘅出現。如果有需要，可以去家計會診所／母嬰健康院／部分專科診所預約睇醫生呀。 
建議你放鬆下心情，耐性等待下，月經會出現嘅。 
個肚好脹又冇谷m既感覺搞到日日都諗住幾時黎聽完你講安心左 感謝你既回覆