有無補救措施?

一直都有食開優悅事前避孕 大約兩年
4/9發現漏食一粒 應該係1/9漏食 而之後幾日都有食一粒 但未補食
3/9中午有進行性行為 無使用安全套
4/9已補食 (最後一粒有效藥丸)
5/9早上睇醫生 唔建議食事後 擔心荷爾蒙過多會好嚴重副作用
正常嚟講7/9會有月經
但係呢兩日仲係好擔心 風險大唔大?有冇補救措!

Please​:pray:t2::pray:t2:

如果你過去兩年內都有準時食藥,冇發生過漏食,呢段期間食藥之後冇嘔吐或者嚴重腹瀉嘅情況,係其中一日漏咗服藥冇補食,但因為你已經服用咗避孕藥2年,身體已經建立咗較為穩定嘅避孕功效,咁理論上風險都會比較低嘅。避孕藥係靠人造荷爾蒙去抑制排卵,同時亦會增加子宮頸黏液嘅粘稠度,令精液中嘅精子難以穿過進入子宮,同埋改變子宮內膜嘅狀況,令受精卵難以著床。而且醫生了解完你嘅狀況都唔建議你服用緊急避孕藥,證明風險都係好低嘅,所以暫時都唔需要太擔心。不過因為你服藥週期同平時相比多咗一日,所以有機會你今次嘅月經會同平時相比有唔同嘅。如果月經比較遲出現,你又擔心嘅,你可以考慮自行驗孕。喺性行為7日後驗孕會有初步結果,而11日後驗孕就會有相對比較準確嘅結果。 :blush:

如果你今後再發生漏食嘅情況,如果喺本應服藥嘅24小時內(優悅牌避孕藥嘅漏食補服時效係24小時),可以發現之後立即補食,然後再按照服藥時間食當日嘅藥。如果漏食超過24小時,就要諮詢返醫生建議,同埋有機會需要喺漏食嘅7日內,如果發生性行為,要使用安全套作為額外嘅安全措施。 :relaxed:

同埋,建議你可以嘗試設立鬧鐘提醒自己食藥,或者用一啲提醒服藥同記錄服藥狀況嘅APP,咁就可以盡量避免漏食藥嘅情況呀!同埋優悅牌避孕藥有內附日期貼紙,建議你可以每開一包新嘅藥就貼返適用嘅嗰行貼紙(例如你星期三開始食第一粒藥,你就可以貼好由「WED/三」開始嘅嗰張小貼紙喺嗰排藥到),然後每次食藥都可以檢查下嗰日期啱唔啱,咁都可以作為一個避免漏食嘅方法,同埋即使漏食,都可以盡快發現到可以補食返。 :wink:

但係如果你真係好擔心,希望有「補救措施」可以做,你可以考慮喺性行為120小時內,放置子宮環入體內作為緊急避孕嘅方法。子宮環係要醫生評估過你嘅身體狀況適合使用之後,由醫生放置入你嘅子宮內,除咗可以作為緊急避孕嘅方法,都可以作為長期嘅避孕措施。你可以去家計會診所/母嬰健康院/部分私家診所得到呢個服務,有需要就盡快預約啦。 :woman_health_worker:t2: :man_health_worker:t2:關於子宮環嘅資訊,可以參考:子宮環 - 香港家庭計劃指導會

麻煩你了:pray:t2::pray:t2: 咁夜都覆 真係辛苦晒:pleading_face:

1個讚