我係咪有機會有咗。。。

我同男朋友一向都係無套+外射
不過成日都好驚佢未射之前有啲精留咗喺入面
幸好早幾個月都有m
直至今個月,本應9月2日嚟m
等到今日9月6日都仲未有一滴
我好驚睇咗好多懷孕前期嘅徵兆
有啲係我一直都會有嘅症狀,我唔敢作準
1.子宮痛
我係好似m痛咁但又唔係好痛
因為2號之前都痛咗幾日我仲以為要嚟m
2.頻尿
唔知係咪飲水多嘅影響
我可以半個鐘去兩三次廁所
不過好似係胎兒比較大先會有嘅情況
所以都一樣係好confused…
3. 陰道分泌物增加
冇m嘅呢幾日keep住有會黐住底褲嘅分泌物
應該都係平常嘅量,但我就係會好擔心
4.情緒不穩
雖然我平時都有呢個問題
但前幾日同男朋友出街直程喊咗出嚟
唔知係咪又係徵兆之一。。。
5.夜麻麻想食嘢
如題,想食甜野之類
男朋友覺得我係壓力大+淨食肉先冇m
叫我食多啲omega3之類催經嘅嘢
但之前我都係一樣嘅飲食習慣
壓力又唔覺多咗好多
準備呢兩日買支驗孕棒check (遲咗7日應該可以驗?)
唔知有冇有經驗之人可以答下我我係咪有機會中咗:sob::sob::sob:
真係好驚好唔想有bb​:pensive:

又或者話真係有咗,唔要bb
係咪去家計會最好:disappointed:我仲未成年
有冇人知程序係點

漏咗講,m期一向好準
早三四個月有食過避孕藥
食咗差唔多一個星期就停咗
跟住即刻嚟多次m
斷估咁耐以前應該唔會有影響:persevere:

首先,想你哋知道,陰莖喺受到刺激嘅時候,會分泌透明嘅尿道球腺液,當中有機會含有少量嘅精子,所以即使冇內射,但係陰莖同陰道/陰道口有接觸,咁都會有一定嘅風險。而且,射精有時好難控制,未必可以確保每次都係射精前抽出陰莖。所以,唔建議使用體外射精作為安全可靠嘅安全措施。 :confounded:
建議你哋下次再發生性行為嘅時候,全程使用安全套,喺正確使用嘅情況下,一嚟可以避免懷孕,二嚟可以減低性病傳播或者其他感染嘅風險(例如尿道炎/陰道炎)。關於正確使用安全套嘅方法,可以參考:https://www.instagram.com/p/B4EX0FVFLUf/?utm_source=ig_web_copy_link

而你所講嘅所有症狀,都唔可以作為判斷有冇懷孕嘅標準。至於你自己都有講,有啲徵狀你平時都有,而你講嘅腹脹痛可能係因為經前不適,多咗去小便可能同身體嘅水量同埋飲食相關,分泌物嘅量同質地亦會隨著月經週期/身體狀況有變化,情緒波動係同精神壓力相關,甚至你擔心懷孕呢種緊張嘅情緒都會令你有好大嘅情緒起伏,而最後食慾嘅變化,都未必同懷孕有關。其實即使真係有懷孕,有啲人成個懷孕過程都冇乜特別症狀,而有啲人懷孕初期已經開始有不適。所以唔可以單憑你講嘅嗰幾樣嘢,去判斷自己有冇懷孕。 :x:

與其自己估估下唔肯定,不妨去驗孕,睇下個結果。驗孕係檢驗尿液中嘅hCG水平,hCG係卵子受精著床之後身體會產生嘅一種荷爾蒙,而卵子受精著床需要大概6-9日嘅時間。所以,喺性行為7日後驗孕會得到初步結果,而11日之後就會得到相對比較準確嘅結果啦。你可以睇返你最後一次發生性行為嘅日期,計算返日子進行驗孕。 :blush:

如果驗孕結果係陰性,咁你就可以放鬆下心情,耐心等月經出現。月經係由身體幾個繁複嘅系統互相配合而形成,所以月經會受好多唔同身體因素影響嘅,例如荷爾蒙水平、飲食、作息、壓力、生病、藥物等等。即使你平時嘅經期相對比較穩定,但唔代表每次嘅月經情況都一定會一樣。如果你今個週期休息得唔好/病過食過藥/打過疫苗/特別大壓力等等都可能會對月經造成影響。因此,一啲app嘅紀錄或者日曆推算並唔準確,因為app通常係以你過往嘅月經週期pattern去估計你將來嘅經期,但係app並唔會知道你成個週期/將來嘅身體狀況,所以唔會一定好準確咁話俾你知究竟幾時月經肯定會出現。 :persevere:

而關於催經呢樣嘢,如果喺冇懷孕嘅情況下月經比平時嘅平均情況遲咗,建議要睇醫生,醫生會因應你嘅情況睇下需唔需要處方催經嘅藥物俾你。坊間傳聞嘅催經方法並唔係個個都啱用,甚至有啲都冇科學根據或者醫學證明,自行使用可能反而增加咗身體嘅負擔,甚至對健康有影響。服用omega-3呢啲油脂類嘅產品理應唔會對月經造成太大嘅影響,如果你係因為其他身體原因要服用,都建議可以諮詢返營養師或者專業人士嘅建議。 :relaxed:

另外服用避孕藥呢樣嘢,都想了解下當初食之前有冇睇過醫生?有冇因為啲咩特別原因停藥?避孕藥靠人造荷爾蒙去抑制排卵,同時亦會增加子宮頸黏液嘅粘稠度,令精液中嘅精子難以穿過進入子宮,同埋改變子宮內膜嘅狀況,令受精卵難以著床。即使你只係食咗一個星期左右,當中嘅人造荷爾蒙可能已經足夠對你嘅身體造成影響,導致荷爾蒙水平唔規律,出現你所講嘅「跟住即刻嚟多次m」嘅情況。而之後身體都可能需要一段時間(甚至有機會要幾個月,而期間嘅月經都有機會受到影響)去恢復返正常嘅荷爾蒙分泌系統。如果你下次再想食避孕藥,記得要睇咗醫生先,因為唔係每個人嘅身體狀況都適合食藥,而市面上現時嘅避孕藥有唔同嘅人造荷爾蒙成份同劑量。所以建議要經醫生醫生評估,睇下你係咪適合/適合邊一款避孕藥。如果有需要,可以去家計會青少年保健中心/母嬰健康院/部分私家診所預約睇醫生。如果你想停藥,都要諮詢下醫護人員嘅意見。如果係因為副作用,例如頭暈、作嘔作悶、胸部脹痛而想停藥,其實都可以嘗試俾身體多少少時間去適應避孕藥同埋建立藥效。通常1-3個月後副作用就會消退,有啲人嘅身體情況可能需要再耐啲,而亦有啲人有試幾款藥先搵到最適合自己嘅避孕藥。如果你係去家計會青少年保健中心見醫護人員配藥,一嚟比你自己去藥房買平,二嚟會有返記錄,同埋會俾2個月左右你試藥,2個月後會問返你嘅身體情況,試咗覺得適合嘅,就會繼續配俾你食,而如果唔啱,就會同你商量要唔要轉藥/或者試多一陣先。有需要就打去預約/用網上系統預約啦。

而如果驗孕結果真係陽性,其實都會有方法去應對。如果你決定唔生育,你可以去家計會青少年保健中心預約進行終止懷孕。香港合法可以發生陰道交(陰莖插入陰道)嘅年齡係女生需要年滿16歲,而唔係平日法定成年嘅歲數18歲。即使你係未夠16歲,而意外懷孕或者有其他生殖健康嘅事需要醫療協助,家計會都仍然可以為你提供服務。但要注意,家計會因為診所限制,只能夠處理懷孕10週以內嘅個案,求診者亦必需要身體健康,無任何長期病患或者家族病史。

去家計會尋求終止懷孕嘅流程係會有3次到診:第一次係有醫護人員了解同檢查你嘅身體,評估懷孕週數同埋講解你可以有嘅選擇,同埋講解避孕方法;而輔導員就會俾到情緒支援你,等你梳理返你嘅意願同埋了解你做嘅選擇。第2次到診,你做好決定之後就會幫你進行終止懷孕,或者如果因為一啲特別嘅身體狀況你唔可以喺家計會進行呢個程序,就會轉介你去公立/私家醫院(按照香港法例可以為有需要嘅人士係懷孕24週之內進行終止懷孕程序);而輔導員都會提供輔導服務。第3次到診,係術後覆診。由第一次見醫護人員同輔導員,去到終止懷孕嘅醫療程序中間都需要啲時間,所以如果驗孕結果發現有懷孕,就要盡快預約啦!理論上家計會唔會喺未經你同意嘅情況下通知家長,但係因為始終牽涉到醫療程序,會建議你同屋企人講,希望你會有多啲支援。

所以,如果距離最後一次性行為已經至少7日,都建議你驗咗孕先。盡早知道結果都可以盡快作出相應嘅安排。有可能發現其實只係虛驚一場,咁日後正確地使用安全措施就已經冇問題啦。無論個結果係點,我哋都會喺度陪伴住你嘅。如果你再有其他問題,好歡迎你隨時問返我哋呀! :sparkling_heart: :sparkling_heart:

多謝你咁詳細嘅回覆:pray:t2::pray:t2::pray:t2:
不過我今朝用咗支驗孕棒,兩條線:pensive:

都想知道你幾時發生咗性行為架?因為通常啲人都會話預計月經嚟嘅時間同埋預計月經後7日驗孕,但係其實都要睇埋發生性行為嘅時間嘅。驗孕係檢驗尿液中嘅hCG水平,hCG係卵子受精著床之後身體會產生嘅一種荷爾蒙,而卵子受精著床需要大概6-9日嘅時間。所以,喺性行為7日後驗孕會得到初步結果,而11日之後就會得到相對比較準確嘅結果啦。 :wink:

因為你都有食過一段時間避孕藥,都有可能導致月經週期嘅改變。其實月經係有身體幾個繁複嘅系統互相影響而形成嘅,所以好容易受到唔同身體或者環境因素影響。例如荷爾蒙分泌狀況、飲食、作息、壓力、生病、藥物等等。好似你呢排好擔心又食omega3咁,都會影響月經週期架。 :thinking:

唔洗擔心住,你可以每隔多幾日買電子嘅驗孕棒驗孕,因為電子驗孕棒唔單止容易啲睇到結果,亦都會顯示懷孕嘅週數。 :grinning:

再提多一次,體外射精並唔係一個安全可靠嘅安全措施!!!可以同伴侶商量下要使用邊一種安全措施,例如安全套定避孕藥,不過只有安全套可以避免性病嘅傳播架。 :blush: