好驚有咗點算好宜家大家中六

男:之前排卵日同女朋友有着衫褲上咗床
之後我除咗先之後
我用過右手翻開包皮有似沾有上啲透明液體(唔知係尿道球腺液定前列腺液
我輕輕抹左喺張被到,之後隻手有摸下佢面
之後再錫咗一陣仔,隻手喺佢安全褲到磨咗幾下
然後摸直接下面,發現入面唔係好夠濕用舌頭舐咗一下
之後用手指插入去,再之後有錫咗陣再用口幫佢
之後佢有掂過我但冇射,佢話唔記得有冇再摸下面
好驚有咗我好愛佢好驚傷害佢
聽日就預測嚟m
佢唔緊張但我好驚

我女朋友話平時嚟m之前
都會面生小小粒同食多咗嘢同埋唔覺個肚有咩問題
但係我好驚係懷孕前期症狀
佢呢兩日都早瞓咗

hello 你好啊 :smiling_face_with_three_hearts:,首先計算排卵日或者經期並唔喺準確可靠嘅方式避孕。因為經期受好多內在同外在因素影響,例如荷爾蒙分泌、飲食習慣、休息、壓力、藥物。所以就算以往嘅經期喺準時,都唔代表往後嘅經期都會按照週期出現。其實係要等月經出現之後先可以推算返排卵日係幾時,除非每日都用排卵試紙去測試,否則我地可能準確咁知道究竟邊一日會排卵。所以就算聽日伴侶都未嚟經期,都唔代表必定因為懷孕導致。可以放心少少先~

而依照你分享嘅情況,懷孕嘅可能性比較微。因為精液都冇直接接觸過陰道。過程當中都喺用手愛撫局多,而陰莖喺性興奮嘅時侯會流出尿道球腺液,同埋高潮嘅時候會射精液。尿道球腺液或者精液暴露喺空氣後,好快就會死亡。所以如果接觸到尿道球腺液或精液嘅手,冇接觸過對方嘅陰道,其實懷孕嘅可能性好微。都建議你地下次再進行親密行為嘅時候,都可以儘量全程使用安全套,減低意外懷孕嘅可能性。 :smiley:

但係我驚我自己隻手掂過興奮分泌嗰啲
然後隔咗一陣又摸咗其他嘢
之後又入咗去會有

我上網睇前列腺液經過布料磨擦會加快速度死亡,我有輕輕抹過喺被度之後有掂過佢個身再掂安全褲唔知會唔會磨走。
我再有舐咗一下唔知會唔會俾返温度,存活空間,但我上網睇一啲又話唾液酶會殺死精子

但我手有掂過前面嗰啲但冇精液
但好似我之前咁講我手有經過少少磨擦同舐過
再插入去一至兩個手指節位
然後再有用口交

今日已經係第三十一日
佢平時周期都係28至31左右
上網睇又話遲7日都正常

Hello
首先想同你解釋返,你所講嘅透明液體係尿道球腺液,陰莖喺受到刺激嘅時候會分泌嘅透明液體,當中有機會含有少量精子。前列腺液係組成精液嘅其中一部分,所以理論上,你係唔會單獨見到前列腺液嘅。 :blush:

精子離開咗身體暴露喺空氣中其實好快會死亡,因為精子需要媒介提供養份先生存同埋移動到,而呢啲媒介就係精液同尿道球腺液,喺空氣中呢啲液體會好快乾,精子就唔會生存到,而你又有接觸過被、衣物等其他地方,更加唔會令精子可以存活到。同埋口水中嘅化學物質加上口腔嘅環境並唔適合精子存活。而當精子死亡之後,即使俾返相對適合佢生存嘅環境,佢都唔會因此可以重新生存或者移動,所以唔會出現你所講嘅「我再有舐咗一下唔知會唔會俾返温度,存活空間」。 :x:

而懷孕係因為卵子同精子相遇、受精、著床而形成,而你哋個次嘅性接觸當中,性器官之間冇直接接觸過;過程中精液同埋尿道球腺液亦冇接觸到陰道/陰道口,所以精子同卵子係唔會接觸到,變相亦唔能夠導致懷孕嘅。 :relaxed:

之前都有解釋過,月經同埋排卵係好容易受到其他因素影響嘅,例如荷爾蒙分泌、飲食習慣、休息、壓力、藥物等等。所以,唔係每個月經週期都一定會一樣,即使女朋友平時嘅月經週期都係28-31日,如果佢今個月經週期身體狀況有改變,可能月經週期都會受到影響㗎。而坊間所講嘅月經周期長度範圍21-35日只係一個平均數值可以作為參考,唔代表唔喺呢個範圍內就係唔正常。例如青春期期間有啲女仔荷爾蒙水平唔係好穩定,所以月經週期都好浮動,又例如有啲人可能因為壓力問題,或者轉變咗飲食習慣,甚至過度減肥,而導致2-3個月先有一次月經。正如女朋友其實都唔會準確咁提前預知邊次月經週期係28日,邊次會係31日,所以我哋都好難準確咁知道究竟邊日排卵或者月經會出現。會唔會女朋友呢排休息得唔好?或者比較緊張情緒壓力比較大?呢啲因素都會有機會影響到月經㗎。而之前都遇到個案係中六學生有應考壓力,所以月經都相對唔穩定。建議女朋友放鬆下心情,月經會出現嘅。 :wink:

不過女朋友有紀錄月經嘅習慣係好嘅,方便佢如果將來需要做一啲婦科檢查嘅時候可以清楚咁話俾醫護人員聽佢嘅月經情況;或者如果連續幾個月經週期嘅情況(例如月經週期長度、流血日數、流血量、經痛程度等等)都有好大嘅轉變,都可能值得留意去搵醫生檢查下身體。

如果你真係好擔心,你可以同女朋友商量要唔要進行驗孕。驗孕係檢驗尿液中嘅hCG水平,hCG係卵子受精著床之後身體會產生嘅一種荷爾蒙,而卵子受精著床需要大概6-9日嘅時間。所以,喺性行為7日後驗孕會得到初步結果,而11日之後就會得到相對比較準確嘅結果。你可以計算返日子,距離你哋嗰次性接觸過咗幾多日。可能你親眼見到個結果之後,會安心啲。

你哋下次可以考慮使用口交膜/口交套,或者即使唔係發生陰道插入式嘅性行為,都可以考慮使用安全套,去避免體液直接或意外地接觸到身體,咁就可以更加安心啦!或者你哋都可以考慮,當心理上未準備好發生性接觸嘅情況下,就唔好發生任何形式嘅性接觸,直至你哋雙方都覺得準備好,先再進行性接觸呀。 :smiling_face_with_three_hearts: