性交好痛入唔到

尋晚同男朋友性行為,同呢個男仔第一次做,插極都插唔入,有幾下仲插得好痛嗌晒救命,陰道出面又好拿,前戲都有的但自己唔知點解好難濕,最後只插入左少少,自己又生痱滋幫唔到佢含,事後男朋友好似好失望雖然佢冇講出口,搞到自己好唔開心,好怕就因為咁樣影響左大家嘅關係。。

佢係咪插錯窿丫?正常唔會痛到入唔到
陰道同尿道2個窿黎

應該唔會啦對方都好有經驗

咁你呢?之前搞都會咁?

我叫做第二次,第一次同第二個搞都係好痛入唔到,今次又係咁,好乾入唔到,勁痛

前戲唔夠?可能你太緊張啵

自己用手指都緊緊入到咋,好驚唔知洗唔洗睇下醫生,究竟個洞係咪太細

Hello
首先想你知道,本身陰道喺受到刺激嘅時候會增長,而且陰道係好有彈性嘅身體結構。你可以根據我哋嘅建議再嘗試下,如果情況都係冇好轉,甚至痛楚嘅感覺更加強烈,咁都可以求醫去檢查下有冇一啲特別嘅身體狀況影響咗陰道嘅狀況,導致性行為過程中產生痛楚,睇下用咩改善嘅方法。 :woman_health_worker:t2: :man_health_worker:t2:

同埋都想你知道。即使對於發生過性行為嘅人嚟講,都未必係每次性行為都會好順利,每一對新嘅伴侶都需要磨合,因為每人嘅性器官都會唔同。而你之前發生陰莖陰道插入式嘅性行為嘅時候都有痛嘅情況,可能之前性經歷中嘅痛嘅感覺會令你對發生性行為呢樣嘢,有更加多緊張嘅情緒。而即使男朋友之前有比較多性經驗,但唔代表佢熟悉你所有嘅喜好同埋需要。所以對於你哋雙方嚟講,都需要多啲嘗試、探索同埋溝通,一齊去搵到令你哋最舒服嘅方式。性行為唔單止係身體嘅接觸,更加在於兩人嘅溝通、共識同埋配合,所以唔需要話自責或者內疚,不妨試下同男朋友多啲嘗試,過程中多啲溝通,令對方清楚知道你嘅感受同埋需要。 :relaxed:

有時陰道潤滑不足,或者比較緊張嘅時候,可能陰莖插入陰道嘅時候都會造成痛楚,而唔能夠順利咁插入。 見你都有講,覺得自己好似比較難濕。本身陰部喺受到刺激嘅時候,巴氏腺會分泌有潤滑作用嘅分泌物,但其實每人每次發生性行為嘅時候身體狀況都會有所不同,所以冇話唔濕就係唔正常,或者你哋嘅感情唔夠,可能只係嗰日比較緊張/比較疲累。都想了解下你本身嘅身體狀況,呢排有冇咩唔舒服或者食緊藥?有時一啲藥物都會影響分泌物嘅量同質地嘅。同埋見到你話「陰道出面又好拿」,有機會係因為磨擦或者其他原因導致陰道口有損傷,所以都會令你覺得痛。建議你呢段時間再觀察下,如果痛嘅感覺持續甚至加劇,咁都值得去睇吓醫生,檢查下有冇啲發炎/感染嘅情況。

你哋可以試下下次發生性行為嘅時候配合埋潤滑劑,可能喺比較多潤滑嘅情況下,減少咗磨擦產生嘅痛楚,會舒服啲,而喺過程中,有需要都可以補啲潤滑劑,等成個過程都足夠潤滑。建議使用水性/矽性/水矽混合性嘅潤滑劑;唔建議使用油性潤滑劑,因為油性成分會導致乳膠安全套破裂,亦有機會會破壞陰部健康嘅酸鹼平衡。關於潤滑劑嘅資訊,可以參考:

而放鬆嘅氛圍同埋心情都好緊要嘅!你哋都可以討論下有啲咩環境或者行為會令大家覺得舒服同埋享受。例如發生性行為之前互相幫對方按摩/播放你哋鍾意嘅音樂/一齊睇一啲影片/角色扮演等等。充足嘅前戲,例如親吻、愛撫、請話、擁抱等等都可以令大家放鬆啲進入狀態。 有足夠嘅前戲同埋舒適嘅環境,可能都會令到陰道更加容易放鬆。雖然你話你哋都有前戲,不過都可以嘗試再探索下前戲,令你可以更加放鬆同埋享受。或者你會發掘到啲唔同嘅睇法。其實對於有啲人嚟講,性行為最享受嘅反而係前戲,而唔係插入嘅行為同過程。 :blush:

同埋你哋都可以嘗試下唔同嘅體位,睇下有邊一啲係令到你哋都覺得舒服嘅。過程中都需要好多嘅溝通同埋共識。亦有可能唔係一次就成功,可能要嘗試幾次先得。例如對於一啲女仔嚟講,初初嘗試性行為嘅時候用女上男下嘅體位會比較容易入到,同埋可以比較容易由女方控制到插入幾多幾深,等陰道可以慢慢適應插入嘅感覺;而有啲人又會覺得後入式會比較適合,因為後入嘅姿勢感覺上陰道會「直啲」,會比較容易入到。又或者可以試下用枕頭墊高臀部,睇下會唔會舒服啲。呢個過程可能需要幾次嘗試,一開始未必成功,但唔好灰心呀! :wink:

見你都有講有試過用手指進入陰道,呢個都係好好嘅方法去了解同埋認知自己嘅身體。你下次再用手指插入嘅時候,可以嘗試感受多啲你嘅陰道,邊啲位會突出啲,邊啲位會凹入啲?用咩姿勢插入你會覺得最容易最舒服?邊啲位你會覺得痛/唔舒服?呢啲唔舒服嘅位會唔會通過改變姿勢而唔同咗?如果覺得手指進入都有困難,都可以試下加埋潤滑劑一齊使用。而自己嘗試指插亦都係一個機會,俾陰道適應下有嘢進入嘅感覺。因為平時陰道/陰道口唔會有嘢進入,可能初頭你嘅身體對於呢一種感覺好唔慣,所以會覺得唔舒服。循序漸進咁去嘗試下,可能身體慢慢適應咗,有痛楚嘅感覺會有所好轉。然後當再同男朋友發生性行為嘅時候,你可以同佢分享你嘅發現。你都可以叫男朋友試下幫你指交,等佢都可以更加清楚啲知道你嘅陰道結構係點樣。不過都想你有心理準備,手指插入陰道嘅感覺會同陰莖唔同,所以即使身體已經適應咗手指插入陰道嘅感覺,唔代表初初嘗試陰莖插入嗰陣都一定會好順利。甚至有啲人嘅陰道本身比較敏感,痛覺比較明顯,連手指指甲接觸到陰道都未必會好接受到,呢個情況下,如果想嘅,都可以嘗試吓一啲材質相對無咁硬嘅性玩具,睇下會唔會感覺好啲。

最後你哋都可以調整下心態,重新思考下性行為係咩,係咪一定要進行到陰莖陰道插入式嘅性行為先得?會唔會有一啲其他嘅性接觸嘅方式可以令到你哋雙方都覺得舒服同埋享受?甚至可能探索性歡愉嘅過程當中你哋都會因為溝通多咗而令到你哋感情加深咗㗎~同埋都可以同伴侶坦誠咁講下你嘅感受,大家講下期望,唔好因為你身體一時嘅不適而令到大家失望或者自責。 :sparkling_heart:

最後提返你哋,發生性行為嘅時候選用返適合你哋嘅安全措施,咁就可以更加安心啦! :smiling_face_with_three_hearts:

用一隻手指插入去摸,好似摸到有個位軟林林好似有啲水係入面包住左咁,好驚唔知咩黎

唔駛驚,裏面應該就係你既愛液,代表你身體既反應

我就係冇濕,係摸落去滑滑地,好似大力啲就會爆咁嘅感覺

如果係滑,好有機會係興奮既愛液,你試吓了解自己多啲,探索自己身體

其實我就咁插入去摸咋,無興奮嘅感覺,但唔知點可以插到兩隻手指,插一隻手指都覺得唔太舒服

Hello
其實陰道並唔係一個「直筆甩」嘅管道,而係好有彈性、好有延展性嘅器官,陰道係由黏膜組織、肌肉層同埋外膜組織組成嘅。所以佢唔會好似水管咁係直嘅,而係會有凹凸同埋摺位。你摸到嘅部位應該係陰道中凸起嘅組織,如果接觸嘅時候冇特別痛楚或者唔舒服,咁係正常嘅。但係如果摸到覺得好唔舒服,咁就可以考慮搵醫生檢查下,睇下有無啲異常。同埋你都可以再去感受下,究竟你所講嘅「有個位軟林林好似有啲水係入面包住左咁」係一啲凸起咗嘅組織位,定係你真係感覺到有水/液體喺入邊。如果你覺得真係有異常嘅結構,咁都值得盡快去睇醫生檢查下。 :blush:

而正正因為陰道有黏膜組織,所以佢唔會好似皮膚咁,係相對乾燥嘅,而係會好似口腔咁,即時你冇受到刺激/唔係性興奮嘅狀態,陰道內都會有濕潤嘅感覺,唔會係好乾燥嘅。而呢個濕潤嘅環境一嚟可以維持陰道嘅酸鹼平衡,令到益生菌可以生存;二嚟都會可以令陰道有自我清潔嘅功能。除此之外,子宮頸黏液、白帶等分泌物都係經陰道流出體外,所以都會令到陰道係濕濕地嘅。 :relaxed:

手指插入唔太舒服嘅原因我哋之前都解釋過。可能因為你嘅陰道口同陰道前端嘅位置相對比較敏感(而科學研究的確發現陰道近陰道口嗰一部分會有相對比較多神經分佈,所以比較容易有感覺;而陰道中後段,即係擺放棉條嘅位置,就相對比較少神經分佈,所以啲人先會覺得用棉條/月經杯呢啲產品會冇乜感覺、好舒服),再加上你之前都好少有插入陰道嘅行為,所以你嘅身體好唔習慣呢種感覺,甚至覺得抗拒。而且你都有講你手指插入嘅時候你冇分泌物去潤滑,即時陰道環境係相對濕嘅,但係軟滑不足嘅情況之下都係會有不適嘅感覺。 :confounded:

陰道嘅彈性同延展性係可以令到初生嬰兒經過陰道嘅,所以理應可以擺入手指/陰莖/棉條呢啲嘢。你可以根據我哋之前所講嘅建議嘗試下,睇下情況有冇好轉,如果都係冇改善,甚至痛楚嘅情況增加,咁都值得去搵婦科醫生或者其他專業人士檢查下呀!同埋你已經發生過陰道陰莖插入式嘅性行為,可以進行恆常嘅子宮頸抹片檢查,了解返自己嘅身體情況,如果你之前都冇做過呢項檢查,你都可以去預約做下,醫生幫你做抹片取樣本嘅同時,都會檢查你嘅陰道,所以如果你有問題,都可以趁個機會詢問返醫生。如果有需要,你可以預約家計會診所/母嬰健康院/部分診所或醫療機構進行呢個檢查呀。 :woman_health_worker:t2: :man_health_worker:t2: