點樣可以令男朋友冇咁快射
有咩技巧
首先都想了解返多啲資訊，你覺得男朋友太快射精所以有呢個疑問？定係有其他原因？ 
你所講嘅「快」係指大概幾耐？同埋點解你會覺得咁樣係為之快呢？係因為你喺過程中未得到滿足對方就已經射精？定係曾經見過其他人嘅情況，而男朋友比起其他人所需嘅時間快？ 
因為其實性行為或受到刺激幾耐之後射精嘅時間並冇一個統一嘅標準。只要唔係完全控制唔到／無意識嘅情況之下就射咗精，都唔會係性功能方面嘅問題。
至於射精需要嘅時間，其實有時同其他身體因素都有關嘅，例如當時嘅環境氣氛、當日嘅身體休息得夠唔夠、性刺激有幾強烈、心情、飲食狀況等等。其實都可以同男朋友商討下，點樣嘅環境同氣氛會令到你哋放鬆啲、更加享受啲？佢鍾意你點樣刺激佢、刺激嘅部位、力度、頻率？用你嘅手嘅邊一啲部位去刺激？有時太過激烈／刺激到特別敏感嘅地方，都會相對容易射精㗎。 
同埋現時都有一啲增加持久度嘅產品嘅，例如有加入可以降低陰莖敏感度嘅成份嘅潤滑劑。如果有需要，都可以去一啲性用品商店選購下。
最後都想你或者你同伴侶一齊思考下、交流下，性行為嘅時長係咪最緊要嘅因素？有時可能一啲其他嘅因素都可以帶嚟歡愉同滿足咁㗎。 
1個讚
我所講嘅「快」係指大概一分鐘
同埋點解我會覺得咁樣係為之快因為佢講過覺得未滿足就已經射精，佢想handjob嘅時間長啲
我知道唔係性功能方面嘅問題，我只係想佢舒服啲，滿足啲
我都有同男朋友商討過，每次都係佢想要嘅時候我就幫佢，每次都好好，唔會話特別緊張，例如唔使擔心屋企突然有其他人返嚟，所以都好放鬆，好享受，我都feel到佢每次都好硬，亦都唔需要靠藥物，純粹係自然嘅反應
佢鍾意我不停刺激佢嘅敏感部位，佢覺得咁樣好舒服，刺激嘅部位包括但不限於龜頭同埋冠狀溝，力度就冇乜所謂，頻率就相對快。亦都冇話特別要求用我嘅手嘅邊一啲部位去刺激。我知道有時太過大力/太過快/刺激到特別敏感嘅地方例如龜頭同埋冠狀溝，都會相對容易射精。所以我都有試過其他方法，例如細力啲/慢啲/唔密集刺激特別敏感嘅地方，隻手亦都唔揸太實，令佢唔好因為太緊而好快就射，但係我見到佢比起之前好似係冇咁享受，而且就算我已經咁樣做，射精嘅時間都係同以前差唔多
我哋都有良好嘅溝通，佢有同我反映過，唔知點解就算性刺激比起以前已經冇咁強烈，但佢都係好快就射精，即係無論我用咩方法，佢都會喺短時間內就會有想射精嘅感覺。
未寫完，撳錯掣。
我哋都有一齊思考過，交流過，性行為嘅時長唔係最緊要嘅因素。有時即使佢淨係攬住我，佢都已經好滿足。
不過佢真係好愛我，就算佢好緊火，佢都唔會逼我，有時我唔舒服或者心情唔好，佢都好關心我，佢重視我仲多佢自己，而我亦都好愛佢，所以我想令佢每次都覺得舒服同埋享受。
其實可唔可以通過訓練嚟延長時間？例如多啲刺激陰莖可唔可以增加佢承受刺激嘅能力？或者有冇其他方法？
唔該。
Hello
好開心你哋有進行過溝通，同埋大家都搵到適合你哋雙方嘅相處模式！ 
如果你哋想用一啲產品輔助，延遲射精，其實市面而家有買相關產品，例如我哋之前所講嘅嗰種潤滑劑，亦有啲可以延遲射精嘅噴霧。呢啲產品嘅原理都係用一啲可以降低陰莖敏感度嘅物質（類似麻醉功效），去減少陰莖感覺到嘅刺激，從而延長射精所需嘅時間。而如果係物理原理嘅，都有陰莖環呢一種產品，不過一定要按照包裝指示嘅時間去使用，以免箍住陰莖嘅時間過長，對身體造成影響。 
如果唔用任何用品嘅，有啲人會通過射精前／想射精嘅時候按住會陰，呢個都係用物理嘅方法阻礙射精。不過要注意嘅係，唔建議長期咁樣做，或者通過呢個方法避免射精、甚至每次都唔射精。以免因為精液逆行而對身體造成影響。有或者可以叫男朋友嘗試下想射精嘅時候諗下其他嘢，分散下注意力，令到自己唔會感受到太多刺激，甚至你可以暫時停低，等佢冷靜落嚟再幫佢手交，可能都會延遲到射精時間嘅。 
如果男朋友願意嘅話，都有啲練習可以嘗試下，循序漸進咁堅持慢慢做，都可能會提升到持久度嘅。
第一種係「斷續刺激」，男朋友可以喺自慰嘅時候試下練習，當想射精嘅時候就暫停刺激，俾啲時間自己冷靜，當想射精嘅感覺消退／減弱嘅時候，再繼續刺激。如此類推重複幾次，然後先射精。但記得唔好強迫自己長期完全唔射精。
第二種係「凱格爾運動」，呢個係一種鍛煉骨盤底肌嘅運動嚟嘅，因為骨盤底肌同陰莖其他嘅器官都有關聯，當你訓練咗骨盤底肌就會可以較為容易啲控制自己肌肉，咁就可以比較容易控制射精嘅時間啦。現時網上都有唔少鍛煉呢組肌肉嘅訓練方法，有啲可能係瑜伽動作，有啲會係健身work-out嘅做法，男朋友可以嘗試下，睇下邊一種運動鍛煉嘅方式最適合佢。不過都有啲更加簡單、隨時隨地都可以做到嘅鍛練方法。首先要識得搵到呢一組肌肉，其實收縮呢組肌肉嘅感覺係類似忍尿嘅感覺，甚至男朋友可以去小便嘅時候真係試下中途忍住，感受下嗰種感覺。然後就可以隨時隨地去做，做嘅pattern可以因應身體情況去制定。例如一開始可以嘗試收縮嗰組肌肉5秒，然後放鬆5秒，咁樣為之一組，重複呢組動作10次。然後當身體適應咗，可以再加長加多鍛煉嘅時間同次數。
不過要記得嘅係，呢兩種方法同其他鍛煉身體嘅練習一樣，都係要循序漸進唔可以太強求自己嘅身體第一日就做得好好，同埋都需要持之以恆堅持練習呀。當身體覺得唔舒服就要作出相應嘅調整，減少訓練嘅強度／暫停練習，以免傷害到身體呀！ 
最後，如果你哋覺得呢件事對你哋有困擾，或者依然好擔心，如果去搵醫生／性治療師諮詢下會令你哋更加安心啲，你哋都可以考慮咁做嘅～ 
1個讚
咁喺手法上有冇乜嘢要注意
hello 你好啊，都想了解下你意思嘅「手法」喺咩 ？如果喺指延遲射精嘅手法，都可以睇上我地上一位同事@ ching 好詳細嘅回覆。如果你嘅意思喺指一般情況下handjob嘅手法，都可以嘗試避免刺激龜頭、冠狀溝等等比較刺激嘅位置，但喺記得你以往嘅post 都有分享過同男朋友進行親密行為嘅時候都有試過以上嘅方式，所以依家可能都需要男朋友去練習一下延遲射精，至能夠更好地配合到。handjob嘅過程除咗手法可以調整，其實男方都需要配合到，至能夠有一個雙方都滿足嘅親密行為嘅經驗。
避免刺激龜頭、冠狀溝等等比較刺激嘅位置
即係點？
淨係刺激根部？
如果想持久啲就只係撫摸陰莖嘅「莖部」，咁樣會無咁刺激，變相就可以耐啲先射精。
通常自慰嘅時候會上下「chok」刺激整個陰莖嘅部分，你可以試下當你向上「chok」嘅時候停止，隻手試下唔好掂到三個非常敏感嘅地方，即係包皮連住龜頭嘅包皮繫帶、龜頭下面蘑菇底嘅地方（呢度就係冠狀溝）同埋埋龜頭，只要去到冠狀溝嘅位置就即刻向下「chok」，不斷重覆就可以架啦，不過如果包皮比較長就可能要係包皮接觸到冠狀溝果度就要停止啦。
自慰嘅快感係慢慢累積嘅，所以就算覺得唔夠撫摸龜頭刺激，都唔洗擔心無快感嘅，最主要係要練習延遲射精嘅感覺。當然，要配合上面 @Ching_StickyRiceLove 講嘅「斷續刺激」同埋「凱格爾運動」，練習忍住唔射嘅感覺，咁樣就會持久啲架啦。
當然，呢啲都係一啲長期嘅練習嚟，唔係做一兩次就可以達到目的架，要持之以恆架。
試過只係撫摸陰莖嘅「莖部」，去到冠狀溝嘅位置就即刻向下，但唔知點解佢都係好敏感
hello 你好啊，因為handjob嘅過程都喺雙向嘅，單憑一方嘅喺手法上嘅改變，其實未必可以好快咁改變目前嘅狀況。而你都嘗試過低刺激度嘅方式去改變幫伴侶嘅手法，但喺可能都需要對方嘗試上面建議嘅方式，例如「斷續刺激」，同埋「凱格爾運動」，雙方一齊改善，成效會更加顯著。
Hello
我都遇到類似嘅問題
請問如果我隻手比較大 一隻手就已經握住晒陰莖嘅莖部嘅話 呢個時候上下chok就無可避免一定會掂到三個非常敏感嘅地方
1
呢個情況應該要點做？
淨係用兩隻/三隻手指做個
手勢去chok？
但係包皮嘅移動應該都係會刺激到冠狀溝甚至繫帶
2
定係應該要用另一隻手放喺冠狀溝嗰個位 限制包皮嘅移動
然後另一隻手再用手指去上下chok
3
如果呢個同時用兩隻手嘅方法都唔得嘅話
用包皮復阻環又得唔得呢？
跟住就應該無論點chok都唔會太刺激到冠狀溝？
唔該晒
其實你嘅情況主要係因為太過刺激陰莖同埋龜頭部分，令到 比較敏感嘅地方容易受到強烈刺激，令到你感覺會比較快就射精。其實自慰時間長短都可以由自己掌握，你可以嘗試唔好全程都用套弄嘅方式去刺激陰莖，可以用嘗試下先套弄一陣，當感覺到比較興奮嘅時候，轉換其他方式，例如：用手撫摸陰莖、陰囊等部位，都可以減低當時嘅興奮程度。過程中作嘗試不停轉換唔同嘅方式去刺激陰莖，直到覺得有想射精既感覺時，再轉換用套弄嘅方式達至性高潮，又或者喺速度上面控制一下，可以減慢速度，又或者有時會速度快啲，都可以幫助減慢性高潮來臨嘅時間，你先試一下，希望可以幫到你。