想問下咁樣會唔會大肚

同女朋友7/9做咗一次 之後發現個套甩咗第二日8/9就食咗事後丸 (個牌子係Anlitin
之後隔咗一排18/9同女朋友嗰日嘅第一次全程都有帶
之後嗰日夜晚又做咗一次冇套嘅 不過好及時咁射咗喺出面 同埋都射咗好少 一兩滴左右
想問下咁樣嘅懷孕機會大唔大 因為事後上網睇話會有可能延遲排卵期 而家睇完有啲驚

補充返 app話9/10-9/15係排卵期
冇套嗰次係事前打咗陣 插咗大概一分鐘左右就即刻抆咗出嚟射

首先,想你哋知道,陰莖喺受到刺激嘅時候,會分泌透明嘅尿道球腺液,當中有機會含有少量嘅精子,所以即使冇內射,但係陰莖同陰道/陰道口有接觸,咁都會有一定嘅風險。而且,射精有時好難控制,未必可以確保每次都係射精前抽出陰莖。所以,唔建議使用體外射精作為安全可靠嘅安全措施。所以你哋9月18號夜晚嘅性行為都有一定嘅懷孕風險。 :persevere:

都想了解返你哋喺邊度買事後藥食?因為喺香港緊急避孕藥係處方藥物,要有醫生處方先得,有時藥房買到嘅避孕藥並冇保障,甚至會俾冇有效成份嘅藥物。如果要得到緊急避孕藥,要去家計會/母嬰健康院/醫院急症室/部分私家診所呢啲地方睇醫生,醫生認為身體適合使用先可以服藥。 :woman_health_worker:t2: :man_health_worker:t2:

由於女朋友呢個月經週期內已經服用過一次緊急避孕藥,所以唔可以再食。所以通常家計會醫生會建議服用完緊急避孕藥之後,直至月經出現,都唔建議發生性行為,以免再出現可能導致懷孕嘅風險。如果你哋擔心,想進行緊急嘅話,可以喺120小時內,由醫生放置子宮環進入體內,達致緊急避孕嘅效果。你哋可以盡快去家計會診所/母嬰健康院/部分診所進行緊急避孕。關於子宮環嘅資訊,可以參考:子宮環 - 香港家庭計劃指導會

而如果你哋衡量完風險,覺得唔想使用子宮環進行緊急避孕,而你哋又擔心嘅,你哋可以進行驗孕。驗孕係檢驗尿液中嘅hCG水平,hCG係卵子受精著床之後身體會產生嘅一種荷爾蒙,而卵子受精著床需要大概6-9日嘅時間。所以,喺最後一次性行為7日後(9月25號)驗孕會得到初步結果,而11日之後(9月29號)就會得到相對比較準確嘅結果啦。 :blush:

另外都想同你哋解釋返,緊急避孕藥係通過高劑量嘅荷爾蒙去抑制排卵、干擾受精過程、改變子宮內膜環境干擾著床,從而有緊急避孕嘅功效。所以,一旦服用完緊急避孕藥,排卵就會受到干擾,而月經週期亦都因此會受到影響,相比平時嘅平均情況可能會提前/推遲咗。

另外,見到你話女朋友有用app記錄月經同預測排卵期嘅習慣。都想你哋知道,月經同排卵其實係受好多唔同身體因素影響嘅,例如荷爾蒙水平、飲食、作息、壓力、生病、藥物等等。而排卵其實係要等月經出現之後先可以推算返幾時排卵。所以,除非喺醫生嘅指導之下每日用排卵試紙測試著,否則我哋好難準確咁知道究竟幾時會排卵。一啲app嘅紀錄或者日曆推算並唔準確,因為app通常係以你過往嘅月經週期pattern去估計,預算你幾時會排卵,但係app並唔會知道你成個週期/將來嘅身體狀況,正例如今次女朋友有服用緊急避孕藥,app係唔會考慮呢個因素,但係呢啲因素都會對月經同排卵造成影響。 :blush:

不過有紀錄月經嘅習慣係好嘅,方便女朋友如果將來需要做一啲婦科檢查嘅時候可以清楚咁話俾醫護人員聽自己嘅月經情況;或者如果連續幾個月經週期嘅情況都有好大嘅轉變,都可能值得我哋留意去搵醫生檢查下身體。而有時睇醫生進行緊急避孕,醫護人員都會問返對上一次月經嘅日期嘅。 :wink:

建議你哋下次再發生性行為嘅時候,全程使用安全套,喺正確使用嘅情況下,一嚟可以避免懷孕,二嚟可以減低性病傳播或者其他感染嘅風險(例如尿道炎/陰道炎)。關於正確使用安全套嘅方法,可以參考:https://www.instagram.com/p/B4EX0FVFLUf/?utm_source=ig_web_copy_link