平時33日黎一次period… 正常今個月應該14號左右黎…
同男朋友8月22同9月5都有安全性行為。
9月頭睇左一次醫生食左3日感冒藥，呢幾日仲未好又睇多次醫生又食多3日
但到宜家仲未黎m…點解會咁？係咪有左？
Hello
如果你哋嘅兩次性行為都有全程正確咁使用安全措施，咁懷孕風險係好低嘅。 
同埋想你了解返，其實月經係由身體幾個繁複嘅系統互相配合而形成，所以月經會受好多唔同身體因素影響嘅，例如荷爾蒙水平、飲食、作息、壓力、生病、藥物等等。即使你平時嘅經期相對比較穩定，但唔代表每次嘅月經情況都一定會一樣。如果你今個週期休息得唔好／病過食過藥／特別大壓力等等都可能會對月經造成影響。至於你所講，你今個週期有感冒亦都有食過藥，有時一啲消炎藥／抗生素係會影響月經嘅；即使醫生冇俾消炎藥／抗生素你食，感冒期間免疫系統好努力咁幫你對抗緊個病，身體其他系統都可能會被影響（例如通常病咗會無乜胃口），而月經都可能因此受到影響。所以，一啲app嘅紀錄並唔準確，因為app通常係以你過往嘅月經週期pattern去估計你將來嘅經期，但係app並唔會知道你成個週期／將來嘅身體狀況（例如佢唔會知你呢幾日病咗食過藥），所以唔會一定好準確咁話俾你知究竟幾時月經肯定會出現。同樣道理，日曆推算到唔會準確咁推算到你幾時會有月經。 
如果你擔心嘅話，都可以進行驗孕。驗孕係檢驗尿液中嘅hCG水平，hCG係卵子受精著床之後身體會產生嘅一種荷爾蒙，而卵子受精著床需要大概6－9日嘅時間。所以，喺最後一次性行為7日後（9月12號）驗孕會得到初步結果，而11日之後（9月16號）就會得到相對比較準確嘅結果啦。 