感染性病既機會高唔高?

我係男,25歲,前日去左邪骨出火,女技師推油個時,佢用下面磨我陰莖,當時並無帶安全套,應該有接觸過技師下體既體液。好擔心會有性病,想問問感染性病既機會高唔高?搞完之後陰莖有少少痕。如果去做檢驗,要係性事後幾多天做先準確?

補充:當日冇插入亦冇口交。

hello 你好啊 :smiling_face_with_three_hearts:,依照你分享嘅情況,如果雙方嘅體液並沒有接觸開放性傷口(例如:淌血傷口),其實感染嘅風險好微,唔需要太擔心。再者,需再確認到對方都喺性病患病,至有可能喺性接觸嘅時候,將性病傳染。而性病嘅傳染方式喺身體比較薄嘅黏膜組織,例如肛門、口腔、陰道,接觸到比較高風險嘅體液,例如如精液、腸液、尿道球腺分泌(Pre-cum)、陰道分泌、血液,至會有比較高嘅感染風險。所以依照你分享嘅情況,如果過程當中沒有插入性行為、沒有口交、雙方體液冇接觸開放性傷口,感染嘅機會都比較微,可以放心。

回應你提到感覺到「陰莖有少少痕嘅問題」,都可以有好多因素引起,例如衛生欠佳、皮膚敏感、細菌感染、又式者心理因素等等,唔一定係性病引致。 雖然今次嘅性行為會感染性病嘅風險好低,但如果你以往都冇進行過性病檢查嘅話,都不妨趁呢次機會去做一個全面嘅檢查。一般全面嘅檢查都會建議係過咗空窗期(例如愛滋病病毒係發生性行為後3個月)後先做,可以考慮去衛生署嘅社會衛生科(合資格人士費用全免亦毋須預約)、家計會或者坊間有提供免費測試嘅機構(機構嘅服務有時會限制係某啲群體先可以使用,事前都要自己上網了解一下先)。而空窗期嘅長短,都會因為唔同嘅性病而唔同。空窗期喺指「由身體感染咗性病後,身體內嘅病毒量可被醫學檢測嘅水平」,所以唔同嘅性病,都有唔同長短嘅空窗期。唔同機構/私家診所都會提供比較高敏性嘅測試,可以喺性行為後過咗14日之後,即喺第15日就可以完成個快速測試,得出初步嘅結果。除咗快速測試之外,一段都需要等到性接觸後3個月再進行檢查,咁樣就可以得出比較準確同可靠嘅結果。如果你真喺擔心同焦慮,都不妨可以考慮一下進行快速測試。

以下都可以俾少少例子你參考翻:

  • 淋病:最長14日
  • 非淋病性尿道炎(如衣原體): 1-3星期,某部份患者可能沒有病徵
  • 梅毒:10-90日,某部份患者可能沒有病徵

無論你之後係於社會衛生科做測試,還是去家計會、私家診所、化驗所做測試都好,都鼓勵你問醫生多D問題,了解自己嘅情況同埋測試方面嘅資訊。有時問多一問醫生有關嘅情況,例如問問醫生用緊邊一套測試工具、呢套測試工具嘅空窗期係幾耐、幾時做測試嘅結果會係最準確等,都可以保障多D自己,同埋掌握自己嘅狀況。但喺正如上面所講,依照你分享嘅情況,其實感染性病嘅風險比較低,希望可以解答到你。 :smile: