洗唔洗食事後

今日係離完M第五日,發生性行為個時男朋友未射之前甩左個套,當佢射個陣個套仲係裏面,之後射係我pat pat附近,我都即刻拎返個安全套出離同埋啲精液係哂床,男朋友就話無精液流入去,想問仲洗唔洗食事後藥。

你好呀, @lalalalala :wave:t2:

都想知道當時射嘅時候安全套仲係唔係完整包住陰莖架?

如果係完整包住陰莖,抽出嚟先射,懷孕嘅風險係相對比較低嘅。

如果男朋友係未射之前甩咗個套入去陰道裡面,雖然射嘅時候有抽出嚟射,但係陰莖係興奮狀態下都會流出一啲透明液體(尿道球腺液),裡面含有少量精子,都會有導致懷孕嘅風險。

如果宜家距離呢次性行為未超過5日嘅話,建議向醫生拎取事後丸。事後丸主要分為兩種,一種嘅服食時限係性行為後嘅72小時內,而另一種係性行為後嘅120小時內,因為事後丸喺香港係法律規定必須經醫生處方嘅,而且亦都唔係每個人嘅體質都適合服用,所以如果決定服食嘅話建議盡快去家計會/母嬰健康院/私家診所向醫生拎取。有關事後丸嘅詳細資訊可以參閱以下網站: 緊急避孕 - 香港家庭計劃指導會 3

其實出現咁嘅情況,好多時都係因為安全套嘅尺寸唔太啱,如果想搵自己合適嘅安全套尺寸,其實都好簡單。 安全套嘅闊度一般都有分M size、L size、XL size等唔同尺寸,一般以mm為單位(例如52mm ± 2mm)。如果過往買安全套之前,都未試過度陰莖尺寸的話,建議可以先度度陰莖嘅圓周

量度嘅方法,就係當陰莖勃起嘅時候,可以用一個卷尺(或類似嘅物件,如繩),圍陰莖一圈,去得出陰莖嘅圓周。然後將 圓周除2,就係安全套所指嘅闊度 。因為安全套係有彈性,所以就可以選擇比實際尺寸細少少嘅安全套款式,比較可以避免安全套滑落嘅情況~

1個讚

射個陣安全套已經甩左,但唔知道透明液體係抽出個下有無直接接觸到陰部,因為個時仲有安全套係陰道裏面,安全套裏面都有透明液體,所以仲考慮緊食唔食事後藥。