個dom甩咗係入面⋯

事緣我差少少滿16歲,但係忍唔住係中秋節,同男朋友book咗酒店一齊住一晚,夜晚就做咗三四次有帶condom,但係朝頭早做最後一次嘅時候有帶好condom,男朋友去到射果下可能係大力得滯個condom成個甩咗係入邊,搞到中出左。男朋友量係減少咗,我尋日同埋今日都係安全期,我同男朋友就驚中獎,諗緊要唔要去家計會拎事後丸,但係驚佢報警或者通知家長⋯點算好

補充番,上兩個月都有食事前丸,想知會唔會有影響?:pray:t5:

你好 @Totztotzy :wave:t2:

如果你嘅情況係安全套甩咗,同時亦都內射咗,懷孕嘅風險都係比較高嘅。

雖然你話係安全期,但係月經同埋排卵係好容易受到其他因素影響嘅,例如荷爾蒙分泌、飲食習慣、休息、壓力、藥物等等。即使你平時嘅月經週期都相對比較穩定嘅係28-30日,但如果你今個月經週期身體狀況有改變,例如瞓得比較少或者情緒比較緊張,可能排卵日期同月經週期都會受到影響㗎。而排卵日其實要等月經出現咗之後,先可以推算返邊日排左卵。所以,除非每日都喺醫生嘅指導下用排卵試紙測試著有冇排卵,否則我地好難知道究竟邊日排卵,一啲app嘅紀錄估計或者日曆推算都唔能夠好準確咁預計到排卵期。而正正因為排卵同月經好容易受到影響,無論喺月經週期嘅邊一日,只要陰莖/陰莖嘅分泌物同陰道有直接接觸,咁都會有一定嘅風險嘅,所謂嘅「安全期」/「避開危險期」嘅方法並唔係安全可靠嘅避孕措施。

如果係中秋翌日發生性行為,因為都未超過5日,都可以去家計會拎事後丸嘅。事後丸主要分為兩種,一種嘅服食時限係性行為後嘅72小時內,而另一種係性行為後嘅120小時內,因為事後丸喺香港係法律規定必須經醫生處方嘅,而且亦都唔係每個人嘅體質都適合服用,所以如果決定服食嘅話建議盡快去家計會/母嬰健康院/私家診所向醫生拎取。有關事後丸嘅詳細資訊可以參閱以下網站: 緊急避孕 - 香港家庭計劃指導會 3

你可以放心,即使你係未夠16歲,意外懷孕或者有其他生殖健康嘅事需要醫療協助,家計會都仍然可以為你提供服務,理論上家計會唔會喺未經你同意嘅情況下通知家長或者報警,唔洗擔心嘅。

不過可能要同男朋友傾返甩套嘅情況,因為出現咁嘅情況,好多時都係因為安全套嘅尺寸唔太啱,如果想搵自己合適嘅安全套尺寸,其實都好簡單。 安全套嘅闊度一般都有分M size、L size、XL size等唔同尺寸,一般以mm為單位(例如52mm ± 2mm)。如果過往買安全套之前,都未試過度陰莖尺寸的話,建議可以先度度陰莖嘅圓周。

量度嘅方法,就係當陰莖勃起嘅時候,可以用一個卷尺(或類似嘅物件,如繩),圍陰莖一圈,去得出陰莖嘅圓周。然後將 圓周除2,就係安全套所指嘅闊度 。因為安全套係有彈性,所以就可以選擇比實際尺寸細少少嘅安全套款式,比較可以避免安全套滑落嘅情況~

至於「事前丸」,你係指食咗避孕藥?同埋你上兩個月有食到,但係今個月有無食架?因為事前避孕藥係需要長時間服用先會維持到避孕嘅功效,一旦停藥身體就會漸漸恢復排卵架啦。如果你上兩個月有食,停咗藥嘅話,對今次嘅懷孕風險係無咩影響嘅,但係你都可以去見醫生嘅時候拎埋俾醫生睇下嘅。 :blush: