安全套穿左

最近同男朋友發生左兩次性行為都有全程帶套,但呢兩次個套都穿左:thinking:,想知道究竟咩原因

第1次 8/9發生,個次完事後發現個套穿左,應該係冇擠出空氣而穿,即刻有係當日去家計會食事後藥,而亦都係13/9就嚟左M

第2次 啱啱30/9發生,今次中途有一下我發出左好似放屁嘅聲,之後轉體位嘅時候都冇見到佢穿,但後入之後就發現穿左,不過今次有擠出空氣,但都穿左,事後亦即刻係當日去私家診所食事後藥

而呢2次嘅性行為入面都有進行一個後入嘅體位,咁究竟係唔係因為後入呢個體位有高度磨擦而導致破裂?因為以往性行為都係用一同款安全套都冇事 :thinking:定潤滑不足?

求解答thx​:sob:

而亦都因為咁同男朋友好驚下次又會再穿,所以嚟緊打算打避孕針(單一荷爾蒙)作為避孕方法,不過打避孕針好似都有好多副作用咁,好擔心:cry:,但始終今次都食左事後藥,係咪嚟緊嘅月經週期唔可以打住?要再等下一次月經週期?

Hello @Coward :relaxed: :wave:t2: 首先好欣賞你同男朋友在整個性行為過程中,都有戴好安全套 :smiling_face_with_three_hearts: :+1:t2:。當發現安全套失效嘅時候,亦有儘快到家計會/私家診所服用事後藥,減低導致懷孕嘅機會。

安全套爛嘅原因,主要係因為(1)戴嘅時候可能未有確保完全按實安全套上嘅儲精囊,令空氣有機會喺套入面,喺磨擦同埋擠壓嘅過程中就會令安全套穿左;(2)安全套嘅表面唔夠濕潤,磨擦力太強嘅時候,就會令安全套磨穿;(3)安全套正反面調轉左;(4)安全套尺寸唔合適;(5)安全套已經過左期。

不過如果一直以黎都係無咩事發生,亦唔係試緊新款的話,都可以排除(3)、(4)嘅原因 :blush: 亦都可以檢查一下安全套嘅有效日期,睇下有無過左,過左有效日期就唔好再繼續使用啦~

見你都有講起潤滑劑嘅使用需要,想問問係咪過往性行為過程間都係無使用潤滑劑?

因為使用潤滑劑,係有助避免安全套因為表面乾燥、磨擦力過高,而導致破裂嘅情況發生嘅機會 :relaxed: :blush: 可以試下使用潤護劑之後,安全套破裂嘅情況會唔會有所改善~

不過都提醒番,油性潤滑劑(例如凡士林、BB油)係唔適合配合乳膠安全套使用,因為會侵蝕乳膠安全套嘅表層。不過並唔係每一款安全套嘅製造物料都係乳膠,有部分比較常見嘅0.01安全套嘅製造物料就選擇左用PU/PI物料。0.01嘅安全套會比較容易穿嘅原因,除左因為PU/PI物料比乳膠彈性較低之外,亦因為0.01安全套一般包裝上嘅潤滑劑都會比較少,如果無搽額外嘅潤護劑,就會比較容易出現安全套破裂嘅情況。如果你自己都唔太肯定自己用緊嘅安全套係咩質地的話,都可以先揀水性/矽性潤滑劑使用先。

有需要的話,可以留意番我地糖不甩介紹潤滑劑嘅文章~

《Stickypedia系列-安全性行為:第二寶》-潤滑劑

如果嘗試使用潤滑劑之後,安全套破裂嘅情況都係無改善的話,可能就要考慮一下會唔會選擇試下其他牌子/款式嘅安全套。一方面可以當做試下新野,另一方面都可能身體狀況有所改變,未必再適合使用一直用開嘅安全套款式 :blush:

體位方面,相信如果有使用合適尺寸嘅安全套,並配合足夠嘅潤滑劑,不論係咩體位都唔會特別導致安全套嘅破裂,所以都無需太擔心係咪體位嘅影響,而令安全套失效嘅機會增加啊 :relaxed:

安全套嘅正確使用(Perfect use)避孕率都係98%,未到100%,有時意外嘅野真係好難預料。可以做嘅就係盡量避免發生人為導致嘅原因,希望透過試下用埋潤滑劑,或者轉用其他牌子/款式嘅安全套,會令安全套破裂嘅情況減低啦 :relaxed: :blush:

而注射避孕針方面,原則上服用事後丸後,依然可以考慮注射避孕針。不過需留意一般會建議下次來經後,先開始打避孕針。所以建議可以考慮下次來經後,打電話聯絡家計會 / 其他婦科診所時,主動提及你嘅情況,睇下有無特別需要顧慮嘅地方。

特別針對今次嘅情況,都提醒番緊急避孕藥本身有機會會影響下一次嘅月經週期(例如提早/延遲來經)。而注射避孕針初期(約頭3-6個月), 身體喺適應階段時,有機會因為體內荷爾蒙嘅改變,而出現不規律嘅陰道出血,或者月經週期日數會比較唔穩定。但係隨著慢慢適應,經期一般就會變得穩定~

不論之前有無服用緊急避孕丸都好,如果考慮打避孕針嘅話,建議先諮詢醫生意見,一方面可以透過評估你依家嘅身體狀況、生活習慣、現階段生育計劃等等,再決定呢款避孕措施係咪適合你 :smiling_face_with_three_hearts:;另一方面亦都可以趁呢個機會問清楚醫生,了解清楚避孕針常見嘅副作用。同埋都可能需要有定心理準備,始終今次情況係安全套失效嘅情況,打避孕針之前,醫生有機會需要先安排你進行一次驗孕,確認陰道出血情況係屬月經,確保無懷孕,先會可以注射第一針避孕針。

最後,都提醒番打避孕針本身,係無法有效減低性病傳播嘅風險,建議配合埋安全套使用,減低性病傳播嘅風險啊~ :wink:

多謝你咁詳細嘅解答:sob:

1個讚