女友原本下個禮拜先黎m 但係早左一個禮拜 星期二黎左 我地琴日有性行為 係未做之前我有射前液排出 用手整走左之後就幫佢自慰 做嘅時候有戴安全套 但係無擠出空氣 帶上之後有少少空氣 做完之後安全套無漲起 做嘅時候都無射到 安全套會唔會穿？但係怕射前液會懷孕 請問懷孕機會高嗎 有無需要食事後丸
我地琴日係衝紅燈咁做
Hello~ 照你所講嘅情況，懷孕嘅機會唔大
首先你提到用手抹走左尿道球腺液 (男性性興奮時陰莖嘅分泌物)後，再用手接觸女朋友嘅陰部，雖然尿首球腺液當中都有少量精子，但係因為精子接觸到空氣後通常幾分鐘內就會死亡，而接觸到皮膚後，精液會被吸收，所以會進一步減低精子嘅存活率，如果真係好擔心嘅話，下次可以用紙巾代替用手抹掉分泌物。
另外，的確配戴安全套時如果無擠出儲精囊嘅空氣嘅話，係有機會令安全套喺性行為期間因為氣壓而破裂嘅，不過如果事後無發現安全套有破裂或者鬆脫嘅話，懷孕嘅機會都唔大。如果想確認安全套無破裂嘅話，可以喺性行為注水入套內，如果無發現漏水就代表無破損啦
有關正確使用安全套嘅注意事項可以參考下我地IG依個post : https://www.instagram.com/p/B4EX0FVFLUf/?utm_medium=copy_link
至於有無需要服食事後丸，就視乎你地嘅考慮，有關事後丸嘅服用方法同可能出現嘅副作用可以參考家計會嘅網頁 : 緊急避孕 - 香港家庭計劃指導會
因為事後丸喺香港係必須經醫生處方嘅藥物，所以如果決定服用嘅話，就必須去家計會、母嬰健康院或者私家診所向醫生領取。
另外，因為事後丸喺同一個月經周期內唔可以服用多於一次，所以如果使用安全套對你地講唔安心嘅話，可以考慮使用其他避孕措施，例如避孕藥、避孕針、子宮環等等，不過就只有安全套可以同時達致避孕以及預防性病嘅作用。
戴上嘅時候套入面有少少空氣 做完之後唔知係因為做嘅時候上下郁 前面無漲起 多左少少空間 想問下咁嘅情況有無穿到🥲
我地做完之後無檢查 所以怕 同埋想問下係月經時做同埋無射係咪可能性低啲？
因為無射精，所以儲精囊位置無漲起都係好合理嘅。但亦並唔能用呢一點去判斷當時嘅安全套有冇破損。
係月經期間發生性行為並唔代表完全無風險，因為有啲人會係月經期間已經排卵（特別係週期比較短或者唔規律嘅人），另一方面精子一定進入體內最長可以生存2－5日，如果咁啱係性行為發生後身體排卵的話，精子一樣有機會可以同卵子接觸，亦有機會受孕。
雖然全程都有使用安全套，因為今次使用嘅時候並無完全正確咁使用（無擠出儲精囊嘅空氣），所以唔能夠話完全無風險。不過，會唔會導致懷孕其實都係一個機率，無話「一定會」或者「一定唔會」。而月經本身可以被好多唔同嘅外在同內在因素影響到，就好似今個月咁，女朋友嚟月經嘅日子都比預期嘅早咗，所以都好難準確計算到下次月經係會幾時來。如果到時比起自己預計嘅有變化，可能亦會聯想起呢次性行為嘅風險，令自己變得好緊張。
所以都不妨同伴侶好好溝通一下，評估有無需要做緊急避孕措施呀～如果你地評估過覺得風險唔高的話，可以係性行為發生7日後驗孕，到時已經可以得到初步結果，而係11日後／預計月經嘅日子驗結果就會更準確。
想問下如果安全套無擠出空氣 穿嘅時候多數會係點？ 係會成個爛左定係得一個窿 因為我完左之後佢無爛到 我怕有個窿
1個讚
見你喺另外一個post有問同樣嘅問題，我哋已經回覆咗你 ，可以睇返：安全套穿嘅樣
我哋都好難單憑你講嘅情況去好準確咁判斷你當日嘅安全套有無破損，所以你可以同伴侶溝通，商量下需唔需要進行緊急避孕。因為緊急避孕藥喺香港係處方藥物，一定要有醫生處方；而且緊急避孕藥要喺性行為後72／120小時內服用。所以如果你哋決定進行緊急避孕，就要盡快預約睇醫生食藥。
而如果你哋衡量完風險，決定唔需要進行緊急避孕，而你哋又擔心嘅，都可以計算返日期進行驗孕。
如果你有其他問題，歡迎你隨時提問。 