以前月經多數33日左右就會來
6月23來左M之後
中間7月25試過一次同男友做
佢有全程戴套 事後檢查都應該冇穿冇漏
之後去到8月8先再來 成46日都係第一次
不過來嘅血量都正常所以都冇擔心
但呢兩個月又係勁耐都冇來 明明呢兩個月都冇做過
早幾日有少少出血 但今次唔係正常嘅量
究竟呢個情況會唔會有機會係7月底果次已經有左⋯⋯
上網睇有啲人話岩岩開始有左果陣頭幾個月都有機會來正常量嘅M
究竟係咪真⋯⋯？
8月8之後都冇再來
直至早幾日先有少量出血
如果7月25日發生性行為時都有全程正確使用安全套，事後亦有檢查過係無穿的話，會因此而導致懷孕嘅可能性係非常微，基本上都可以排除懷孕嘅風險。再加上你係8月8日有正常嚟咗月經，咁已經可以完全排除7月25日嘅性行為可能會導致懷孕嘅可能性。
有啲人係受精著床嘅時候（性行為發生後6－9日）會出現少量出血，但血嘅顏色同量同一般月經到唔太一樣（通常係一張護墊可以承載到嘅量，亦唔會持續幾日都有血），但呢個現象並唔係非常常見。另外，有啲人係懷孕初期都會有出血嘅情況，可能係因為黃體素不足而導致胎盤發育唔穩定（通常會間斷地持續一段時間）、子宮頸糜爛、宮外孕或者流產。但總括而言如果真係懷孕而初期又有大量出血情況都係需要盡快去搵醫生檢查嘅，唔能夠講話係「正常」嘅情況。
你提及前幾日有過少量出血嘅情況，其實月經本身可以被好多唔同嘅外在同內在因素影響到，病過、食過藥、生活作息有改變、壓力大、情緒起復或者打過疫苗都有機會影響到荷爾蒙水平同身體內部嘅運作，從而影響到月經。無論係嚟月經嘅日子、月經嘅顏色同血量都有機會因為以上嘅原因而產生變化嘅。所以你可以回想一下最近呢幾個月有冇發生過以上嘅事，有機會就係導致月經周期變長同埋月經血量產生變化嘅原因。
如果想準確地知道自己有冇懷孕，可以透過驗孕棒驗孕。除非係性行為發生7日後已經可以得到初步結果，係11日後／預計月經嘅日子驗結果就會更準確。距離7月25日嘅性行為至今已經超過2個月嘅時間，如果真係懷孕，驗孕棒已經可以準確地驗出結果。既然已經擔心咗一段時間，不如聽日買支驗孕棒測試一下，咁就可以盡早放下自己嘅心頭大石啦。
如果測試結果係陰性，但月經仍然未來，特別係以上提及可能會影響月經嘅原因最近都無發生過的話，可以考慮去睇醫生，例如普通家庭醫生、婦科醫生或者家計會嘅醫生，進一步檢查最近月經出現變化嘅原因。有好多唔同嘅身體狀況都有機會引起月經變化，比較嚴重嘅可能係子宮或者陰道內出現變化，咁就要盡早去治療啦。如果檢查完身體係一切安好的話，醫生亦會按需要考慮要唔要處方荷爾蒙藥物俾你催經。
總括而言你嘅情況會係懷孕嘅可能性係非常之微，唔駛太擔心！聽日就買支驗孕棒檢查一下，盡早知道結果自己都可以快啲放心！如果有其他問題都歡迎繼續同我哋傾架，我哋會一直係度陪住你！