第一次食yaz，發現自己體溫上升，發低燒好攰頭暈，已經持續個幾星期，唔知係唔係副作用？好唔舒服想停咗佢，但先食咗兩個星期，而家停會唔會唔係幾好？
我第一次食係冇睇醫生自己買，而家有小小驚
你好呀 @sss 
係咁嘅情況下，建議你帶埋食緊嘅藥去搵醫生見下，你可以選擇家計會或者私家診所嘅醫生，睇下醫生會有咩建議。
其實唔同嘅人體質都唔一樣，而事前避孕藥都有好多種，所以未必係全部人都係食同一種嘅，而且大部份人都要試幾次先會知道自己啱邊一隻避孕藥嘅，所以試藥發現有副作用呢件事都好普遍下架。 
真係好唔舒服嘅話都唔好勉強自己繼續食，可以同伴侶傾下會唔會呢段時間轉用其他方式嘅安全措施，例如用安全套，商量下俾啲時間身體試一個自己比較適合嘅事前避孕藥。另外，通常事前避孕藥頭三個月都係適應期嚟，身體都不斷適應緊藥物，所以有啲好唔舒服嘅情況就真係要睇醫生啦。 
其實都好建議大家係食事前避孕藥嘅時候去家計會買嘅，一嚟比起坊間價錢會平啲，二嚟佢哋都會幫你檢查下身體情況再俾藥你，之後都會幫你約時間返去覆診，睇下你食藥嘅情況，如果未到覆診時間，出現咗咩問題嘅話，都可以打電話俾佢哋約時間見醫生架，一直有人跟進嘅話，咁就無咁擔心啦。 