今日去咗家計會買單一荷爾蒙避孕藥(Zelleta)，我第一次食，姑娘話服用初期可能經期會亂咗/停經，想問下如果靠避孕藥避孕嘅話，避孕藥令到月經冇黎/點狀出血，點樣知道有冇懷孕？唔該
你好呀 @cherrie 
其實係月經期間食咗事前避孕藥之後，藥物就會係身體發揮功效架啦，不過我地都會建議一開始嘅7日都用安全套嘅，避免萬一出現有嚴重副作用嘅出現令你要停藥，都有另一個保障。如果頭7日都OK嘅話，藥效都建立到架啦。因為避孕藥當中嘅人造荷爾蒙會抑制排卵、改變子宮內膜嘅環境同埋增加子宮頸液嘅粘稠度，從而達致避孕嘅功效。如果有定時定候食藥同埋無漏食嘅話，會導致懷孕嘅風險係好低架，唔洗擔心。 
而且食避孕藥都會有一段時間會有經血流出嘅，但只係子宮內膜脫落嘅出血，都係好正常嘅，當中有卵子嘅情況好少，所以都唔洗擔心嘅。單一荷爾蒙嘅避孕藥係每一日都食緊有藥性嘅藥丸，因此會比較大嘅機會導致經期變得比較亂甚至停經嘅情況嘅。
都想知道有無咩特別原因，例如身體嘅情況會令你想用單一荷爾蒙嘅避孕藥？如果有無月經呢件事真係你比較注重嘅，你都可以考慮下會唔會轉食其他嘅荷爾蒙藥物，例如一啲混合型或者低劑量嘅荷爾蒙藥物，通常對月經嘅影響都比較少嘅。你可以係下一次去家計會覆診嘅時候同姑娘提出，睇下可唔可以幫你轉藥嘅。 
基本上身體開始適應避孕藥嘅話，係身體建立咗避孕嘅功效，基本上懷孕嘅風險都係好低嘅。如果真係擔心懷孕嘅話，都建議你紀錄自己發生性行為嘅日子然後按照日子去驗孕，而無論係咩情況下，想知道自己有無懷孕，最好都係喺性行為7日後驗孕得到初步結果，11日後再驗得到比較準確嘅結果，用科學嘅方式驗證自己有無懷孕。不過如果一直都有定時食藥嘅話，基本上懷孕嘅風險真係好低嘅。 
因為你食緊事前避孕藥，會出現一啲副作用，例如乳房脹痛、噁心、 暗瘡、頭痛和情緒轉變等等，而呢啲徵狀未必一定係懷孕或者食避孕藥而導致嘅，例如噁心咁，有可能係因為胃唔舒服而導致，所以我地都唔可以靠徵狀去判斷自己有無懷孕，最好都係使用驗孕棒啦，咁就唔洗心掛掛啦。 
1個讚