好擔心會唔會中左

同男朋友9月23發生過性行為,有戴套,不過見到精液係側邊而唔係射係前端位,但又好似無穿無移位,純粹流左係側邊位。而近呢幾日同男朋友有親密行為,男朋友隔住我條底褲連續咁「插入」,但隔左底褲應該唔會入到?做完呢啲之後底褲好濕,好擔心男朋友嘅pre-cum同我流出黎嘅水mix埋,之後會入到陰道… 會唔會有機會中?

9月23到而家期間有打過疫苗
到而家都未黎m,平時一向好準。。。對上嗰次黎m係九月頭…好擔心會唔會有左。

補充返上個星期男朋友用手指插入嗰陣,突然間發現有血,但兩日都係好少,血嘅顏色都係偏啡,係唔係著床嘅徵象?好擔心:disappointed::disappointed:

如果你哋9月23號嘅性行為有全程都正確使用安全套,而且安全套冇穿冇漏,咁懷孕嘅機率係好低嘅。而你所講嘅「同男朋友有親密行為,男朋友隔住我條底褲連續咁「插入」,但隔左底褲」,都想問返多少少,係男朋友同你隔住底褲體外摩擦,陰莖冇進入陰道?定係陰莖都有同陰道有接觸? :face_with_monocle:

想你哋知道,陰莖喺受到刺激嘅時候,會分泌透明嘅尿道球腺液(pre cum),當中有機會含有少量嘅精子,所以即使冇內射,但係如果陰莖同陰道/陰道口有接觸,咁都會有一定嘅風險。 :confounded:
但係如果你哋陰道口同陰莖接觸嘅全程都有隔住底褲,咁風險都好低嘅。因為精子離開咗身體之後要靠媒介提供養份先生存到,而呢啲媒介就係精液同尿道球腺液,當呢啲液體暴露喺空氣中或者接觸到衣物之後,液體會開始乾,精子亦唔會生存到,更加唔會喺衣物到移動去陰道再遊向子宮。
所以,你可以嘗試回想返當時性行為嘅情況。 :thinking:

如果你真係好擔心嘅,你都可以進行驗孕。驗孕係檢驗尿液中嘅hCG水平,hCG係受精卵著床之後身體先會產生嘅一種物質,而卵子受精著床需要大約6-9日時間,所以,喺性行為7日後驗孕會有初步結果,11日後驗孕就會有比較準確嘅結果。你可以睇返最後一次性行為嘅日期,計算時間進行驗孕。 :blush:

而想你了解返,其實月經係由身體幾個繁複嘅系統互相配合而形成,所以月經會受好多唔同身體因素影響嘅,例如荷爾蒙水平、飲食、作息、壓力、生病、藥物等等。即使你平時嘅經期相對比較穩定「好準」,但唔代表每次嘅月經情況都一定會一樣,其實每人每次月經週期嘅情況都有機會唔同。如果你今個週期休息得唔好/病過食過藥/打過針/特別大壓力等等都可能會對月經造成影響。而你有講你有打過針,其實打完疫苗之後免疫系統好努力咁幫你建立緊抵抗能力,身體其他系統都可能會被影響(例如你可能或多或少有啲副作用),而月經都可能因此受到影響。而的確有個案表示打完疫苗之後月經嘅情況同平時嘅平均情況唔同(可以參考:Do COVID-19 vaccines affect periods? Expert calls for investigation )不過月經改變同疫苗嘅關係仲有待科學研究。

而「男朋友用手指插入嗰陣,突然間發現有血,但兩日都係好少,血嘅顏色都係偏啡」其實比較有機會係手指甲令到陰道有輕微嘅損傷,所以指插期間突然有流血。下次可以考慮用指套(可以參考: https://www.instagram.com/p/B57ZtvGlckR/?utm_source=ig_web_copy_link ),同埋養成修剪指甲嘅個人衛生習慣。而「著床性出血」通常血量較少而且流血日數較短,而且呢個現象並唔常見,所以都唔能單憑有流啡去判斷自己有冇懷孕。

建議你與其估估下擔心,不如計算返日期驗孕,如果排除咗懷孕嘅可能,就可以放鬆下心情,耐心等月經出現呀。 :sparkling_heart:

如果下次再發生性接觸,即使唔係陰道陰莖插入式嘅性行為,你哋都可以考慮使用安全套,避免陰莖/陰莖分泌物意外地同陰道/陰道口接觸到,咁就可以更加安心啦。 :smiling_face_with_three_hearts:

我同男朋友係隔住底褲咁有摩擦,但途中佢有做好多下連續「插入」嘅動作,有條底褲隔住我估陰道同陰莖應該無接觸到? :see_no_evil:

hello 你好啊 :smiling_face_with_three_hearts:,依照你分享嘅情況,精液/ 男性喺性興奮嘅時候分泌嘅尿道球腺液其實無辦法穿透衣物進入陰道,所以精子與陰道喺好間接接觸,無直接接觸嘅情況下,其實精子同卵子結合嘅機會好微。再加上精液流出,再暴露喺空氣當中,好快就死亡。精子需要精液提供環境同養分至能夠生存(精液= 媒介),換言之精液一旦變乾、被衣物或皮膚吸收,就會失去生存環境、好快就會死亡。所以依照你分享嘅情況,「連續插入」如果隔內衣物進行,就算有精液流出,都會被衣物吸收,最後死亡。所以意外懷孕嘅機會比較微。

除非喺「連續插入」嘅分泌出嘅精液或尿道球腺液比較多——「多」喺指尿道球腺液有機會滲出嚟或滴出嚟,至有機會會接觸到陰道,情況與無套插入,陰莖分泌尿道球腺液嘅原理喺一樣嘅~但喺如果有冇出現呢個情況,意外懷孕嘅機會都比較低。因為正如上面所解釋,精子依賴精液提供媒介至可以生存。或者你嘅感覺以上過程,可能喺親密接觸嘅時候,比較難以判斷,到底當中嘅分泌物喺多少,同埋分泌物喺尿道球腺液、定還喺陰道分泌物等等。所以為咗避免再一次發生以上令人擔心同焦慮嘅情況,都好建議你同伴侶可以商量使用其他避孕措施,例如男用安全套、又或者荷爾蒙避孕方法,包捨服用事前避孕藥,又或者打避孕針等。如果正確地使用安全套同荷爾蒙避孕法,意外懷孕嘅機會就進一步降低。 :smiling_face_with_three_hearts:

最後,正如@ ching 所講,我地唔能夠單憑身體症狀判斷冇/有意外懷孕一最為準確可靠嘅方式,都喺用翻驗孕棒。如果你真喺比較擔心同焦慮,建議你直接驗孕,俾一個準確嘅答案自己,令自己更加安心。 :smiling_face_with_three_hearts:

多謝你地咁詳細回答!!唔該曬你地呀:pleading_face::pleading_face:

1個讚