你好，
我係琴日（10月15號）發生左性行為，伴侶頭三十秒無帶套，之後先帶。 知道左之後我真係腦海一片空白，但係佢一直堅持自己射既時候有戴套，所以唔會有事。
我因為太驚搞到自己成晚都失眠，所以再搵番你地之前既回覆，我今日去左家計會食事後丸（黃體酮），食既時候係發生左之後既15小時，宜家覺得下面有種谷住谷住既感覺。
經期就之前都係一直穩定，上一次係9月26號，每次大概6日；app 三年以黎我每一次經期都會入資料，check app其實都知道自己係安全期入面。
可能係我第一次，就已經發生呢件事，我覺得好無助…
同朋友講，佢哋覺得我有小小“小事化大”既感覺，因為我係安全期入面同埋之後真係有用套；
我唔知我仲可唔可以做任何野防止懷孕，或者可以減少呢種無助感？
我只係覺得好驚同埋真係好恐懼日後發生性行為再要食藥。
唔知可唔可以比小小意見？ 真係好多謝你地。
仲有一條問題：
我當時無將安全套充水，只係打結跟住fing, 發現無任何野流/滴出黎，其實係咪都可以證明到個套無穿無爛？
Hello~ 男性性興奮時陰莖會自動分泌一啲透明而黏黏地嘅液體，叫做尿道球腺液，當中都有少量精子，所以如果唔係喺整個插入嘅過程中都有配戴安全套，的確係有懷孕嘅風險嘅，而且安全期並唔係一個有效嘅避孕方法，因為經期本身會受好多唔同因素影響，有時即使生活上無大轉變月經亦都有機會比預期提早/延遲，往往要到月經出現嘅時候先可以準確推算返排卵期，所以你絶對唔係小事化大阿！
好欣賞你有主動參考返我地過往類似情況嘅post
的確事後丸係可以有效減低懷孕嘅風險，而到家計會向醫生領取都係一個可靠嘅途徑
服食事後丸之後腹痛都係一個常見嘅副作用，一般唔會持續超過24小時。而事後丸亦都有機會令下次經期提早/延遲，所以如果遇到呢個情況都唔需要太擔心啊
另外亦都想你知道，你嘅男朋友喺無了解你嘅意願嘅情況下無使用安全措施係唔岩嘅，無論處身於仼何關係，都唔應該假設對方必須滿足自己，所以即使係處於親密關係，要唔要性行為、使用邊種安全措施等方面都要喺經過雙方討論達至共識，所以都建議你同男朋友討論下依個問題
而回應返你有關其他安全措施嘅問題，除左安全套之外，你可以選擇使用口服避孕藥、避孕針等荷爾蒙避孕方法，依啲方法唔需要伴侶配合，可以避免因伴侶拒絕使用安全措施而造成嘅懷孕風險，不過就只有安全套先可以同時達至避孕同預防性病及細菌感染嘅效用。依啲避孕措施都可以喺家計會嘅診所獲取，詳細資訊可以參考返佢地嘅網站: 香港家庭計劃指導會
最後有關檢查安全套有無破損方面，其實一般只要有正確配戴安全套，破損嘅機會係好低嘅，而你事後有觀察過精液無從安全套漏出，都可以確認安全套無破損 有關安全套使用上嘅注意事項，可以參考下我地IG嘅post: https://www.instagram.com/p/B4EX0FVFLUf/?utm_medium=copy_link
你好Ana, 好多謝你既回覆。
我仲想問若果事後丸延遲經期，如果我真係唔知係咪懷孕，大概幾時要驗孕先會有比較高既準確性？ 家計會有同我講3個禮拜要返去，但係我真係唔想驚多三個禮拜…
同埋我唔知係咪因為呢件不愉快既事搞到成個人真係好唔開心，甚至有少少對性行為產生恐懼… 因為我覺得食藥對自己好大傷害，同埋真係因為對方先搞到呢個地步… 所以我已經覺得如果今次無事，我決定要同男朋友分手。 不過分手都好，我唔知可以點先令自己無咁緊張…
再一次好多謝你既回覆。 
Hello
首先想你知道，如果你不安全性行為之後72小時／120小時內服用左緊急避孕藥，避孕成功率其實好高嘅，可能你知道咗呢個資訊之後會安心啲。而緊急避孕藥係通過高劑量嘅荷爾蒙抑制排卵，或者當身體排卵之後抑制卵子受精，亦會改變子宮內膜嘅環境令到受精卵難以著床，從而達致避孕功效；而高劑量嘅荷爾蒙的確會造成一啲副作用，不過只要唔係經常用嚟作為避孕嘅方法，其實對身體嘅傷害並唔大。而事後藥其中一個副作用係有機會會影響1－2個月經週期，可能你嚟緊嘅月經周期長度、經血量、流血日數、經痛程度等等會同平時嘅平均水平有所不同。1－2個週期之後會相對穩定返。
其實驗孕係測試尿液中有冇hCG，hCG係卵子受精著床之後身體會產生嘅激素，而卵子受精著床呢個過程需要6－9日。所以，喺性行為7日後（10月22日）驗孕會得到初步結果，而11日後（10月26號）驗孕會得到比較準確嘅結果。你可以等到相應日子自行驗孕先。 
明白你而家好不安好憂慮，但都想你嘗試放鬆下心情呀。如果有任何問題，好歡迎你隨時問返我哋！ 
我今日發現自己有一兩滴啡色… 會唔會係 流啡，真係有左？
見你都係家計會度食咗藥，其實藥物都係身體裡面生效緊架啦，唔洗擔心。另外緊急避孕藥都會有一啲副作用嘅，其中一個情況就係可能會流啡。同埋家計會同你約咗三個星期去覆診，到時就會有個最終結果，但係呢段時間都需要等待呀，因為都要俾藥效發揮架。
另外月經到來之前都有可能會流啡嘅，所以我哋唔可以單憑一個情況去推斷有無懷孕嘅，所以最好都係聽日（10月22號）去買驗孕棒驗下，得到初步結果，11日後（10月26號）驗孕會得到比較準確嘅結果。