需唔需要食事後丸..

16/10 與女朋友做愛時有戴套,而女朋友剛處於嚟m嘅第四日,但射完後在體外除套時唔小心將精液彈到女朋友,唔清楚有冇彈到陰道口附近的位置,但見到女朋友陰部附近有白色液體 所以唔清楚係精液定係分泌嘅黏液,咁樣需唔需要食事後丸?

Hello
首先想你哋明白。無論喺月經嘅邊一日,只要陰莖/陰莖分泌物(包括精液同尿道球腺液{pre-cum},陰莖受到刺激嘅時候會分泌透明嘅尿道球腺液,當中有機會含有少量精子)同陰道/陰道口有接觸,咁都會有一定嘅風險。因為月經同排卵會受到唔同因素影響,例如荷爾蒙分泌、壓力、飲食、作息、藥物等等,當身體狀況發生改變嘅時候,排卵嘅日期都會改變,有機會月經週期比較短嘅時候,月經期間已經排咗卵。

女朋友陰部嘅白色液體可能係精液,亦可能係陰道分泌物係磨擦之後變咗白色(有啲類似拂蛋白咁)。如果你唔清楚嗰啲白色分泌物係咩,而你哋好擔心嘅,可以喺性行為後72小時/120小時內服用緊急避孕藥。緊急避孕藥喺香港係處方藥物,一定要睇醫生先可以食,如果有需要嘅話,就盡快去家計會診所/母嬰健康院/部分私家診所預約睇醫生食藥啦。 :woman_health_worker:t2: :man_health_worker:t2:
如果你哋衡量完風險決定唔想食藥嘅,而你哋擔憂嘅,都可以考慮自行驗孕。驗孕係測試尿液中有冇hCG,hCG係卵子受精著床之後身體會產生嘅激素,而卵子受精著床呢個過程需要6-9日。所以,喺性行為7日後(10月23日)驗孕會得到初步結果,而11日後(10月27號)驗孕會得到比較準確嘅結果。你哋可以等到相應日子進行驗孕。 :blush:

建議你哋下次再發生性行為嘅時候,除咗全程都正確咁使用安全套,除套嘅時候可以遠離女朋友下腹、大髀、臀部呢啲位置,同埋用紙巾包住除,咁就可以避免陰莖分泌物同陰道口意外接觸到,可以更加安心呀! :smiling_face_with_three_hearts: