hi
我而家好大壓力 希望你哋可以幫到我 我同女朋友喺開始黎M數起第八日扑野 但係只係抽插左一兩分鐘 因為冇帶套 驚會有bb 無射就無再做 但係我望一望佢下面有極微量嘅白色分泌物 我唔知係我嘅精液定係佢嘅白帶 雖然我原本都幾肯定我冇射 因為正常之前打飛機射咗每一次都會有明顯嘅感覺(攰/relived) 但係今次冇感覺到好似平時咁 同埋佢啱啱黎完M 我唔知係咪佢嘅白帶
同埋因為佢而家經期都未算好穩定 大概有一個星期嘅偏差 睇過article精子好似會存活兩至三日 如果我真係不幸射咗 或者漏咗少少分汾物 懷孕嘅機會大唔大 因為呢件事都係今日發生 所以諗緊有冇必要同佢一齊去家計會見醫生睇吓有冇需要事後藥 如果去咗 佢哋會唔會通知我哋屋企人 或者報警 或者使唔使成年人或者監護人陪同睇醫生同食處方藥物 我而家真係好後悔冇套扑野
我哋都係中學生 真係唔可以有bb… 如果我哋真係有咗 我係咪要做監 同埋佢都應該會面對好多方面嘅壓力 我好擔心佢會承受唔到
Hello @hihi123 
首先，陰莖性興奮嘅時候，會分泌出透明嘅尿道球腺液，內含少量精子，係有機會導致懷孕嘅。即使只係抽插左一兩分鐘，不過因為當中嘅插入式性行為期間，彼此嘅性器官都有直接接觸到，所以依然會有導致懷孕嘅風險 
。
建議呢個情況下，因為係今日（22/10）發生，未超過5日（事後丸最長服用時限為120小時），可以考慮去家計會睇醫生（事後丸喺香港係屬醫生處方藥物 ），先諮詢醫生嘅意見，及視乎情況攞埋事後丸或進行驗孕 。咁就可以確保將懷孕嘅機會減到最低。
事後丸主要分為兩種，一種嘅服食時限係性行為後嘅72小時內，而另一種係性行為後嘅120小時內，因為事後丸喺香港係法律規定必須經醫生處方嘅，而且亦都唔係每個人嘅體質都適合服用，所以如果決定服食嘅話建議盡快去家計會/母嬰健康院/私家診所向醫生拎取。詳情可以參閱：
《家計會 - 緊急避孕》
而通知家長方面，都留意番香港嘅合法性交年齡為16歲 。所以如果你地已經大過16歲就可以放心D先。不過，如果求助者細過16歲的話，其實都無需太擔心，家計會係唔會無經過你嘅同意下，就自行報警／通知求助者嘅家長，家計會本身亦唔會有家長嘅聯絡資訊。而你地未夠16歲的話，當求助者填完個人資料表格後，護士就可能同佢面談嘅時候，會傾耐少少，問得詳細D。只要唔係求助者自己想報警，家計會係唔會越過佢，自行去報警或者通知家長
。
不過係細過16歲，又選擇睇私家診所的話，我地就無辦法保證你地所睇嘅私家診所會唔會私下報警，因為原則上16歲以下發生性行為係犯法嘅 。 所以如果擔心私家診所會私下報警嘅情況，而又需要服用事後丸，睇家計會可能你地就會比較安心。
如果最後係去家計會攞事後丸的話，護士應該會約下一次覆診嘅時候（約一個月後），再進行一次驗孕。不過如果好擔心的話，都可以考慮性行為11日後進行一次驗孕，到時嘅結果已經會係準確同埋可靠嘅 。因為一般受精卵著床需要6-9日，所以性行為7日後驗孕已經可以有一個初步嘅驗孕結果，而性行為11日後驗孕，就會較準確及可靠。
提醒未年滿16歲的話，根據香港嘅法例「任何男子與一名16歲以下的女童非法性交，即屬犯罪，一經循公訴程序定罪，可處監禁5年。」所以男方係有法律風險架。建議番等到大家都滿16歲之後，先再考慮系合法嘅情況下，發生安全性行為
安全期方面，見你亦有提及過係來經後第八日發生性行為，都提醒番安全期避孕法失敗率係好高嘅。月經週期有好多原因可以導致出現變化 ，例如最近呢個月有生病服過藥、飲食唔均衡、生活唔定時、情緒有起伏、壓力過大等原因，都會令黎月經週期變長／變短，令我地難以準確預測「安全期 / 危險期」。因此，我地都唔建議盡信或者依賴月經週期計算器／安全期計算法，推測「排卵期／安全期」，去發生唔安全嘅性行為～
正如你提及過咁，無論係來經期間或者來經後發生唔安全嘅性行為，其實都會有懷孕風險。原因係精子可以在體內存活2-3日，有機會於呢段精子存活期間，剛好遇上排卵，就會有機會導致懷孕。特別係部分月經週期較短嘅女性（～21日），因排卵日會比較早（約月經週期的第10日），有機會在黎月經嘅過程中發生嘅無套性行為，讓精子進入體內後，精子於體內存活的2-3日期間剛好遇上排卵，就有機會導致懷孕 
。所以對於月經週期較短嘅女性，於黎月經期間越後嘅日子，發生唔安全嘅性行為，就會有越大機會導致懷孕 。
白色分泌物方面，如果係透明／純白色的話，亦肯定無射精的話，都會有另外兩個可能性：
（1） 排卵期出現嘅白帶 ：排卵期嘅時候，白帶會增多，亦可能會同平日嘅白帶有D唔同，會比較有彈性，甚至出現「白帶拉絲」嘅情況，類似果凍／蛋清狀嘅分泌物。
（2） 巴氏腺液 ：性興奮嘅時候，女性巴氏腺（Bartholin‘s Gland）會分泌出液體，作潤滑作用，係透明或者純白色。
建議下次發生性行為嘅時候，整個過程都戴好安全套，一方面能夠減低懷孕嘅風險，另一方面都可以避免性病傳播嘅機會啊 
咁我想問家計會係邊啲地點會有
我見佢有分 總會 診所 婦女會 嗰啲
同埋大概要幾多錢
同埋食事後藥副作用大唔大🥲🥲🥲
我擔心佢身體
26歲以下的未婚人士，可以去睇家計會嘅青少年保健 
詳情可以參閱以下嘅連結，有服務內容、服務收費、服務地點嘅資訊。
《家計會 - 青少年保健》
而有關事後丸嘅副作用，都可以參閱上面分享過嘅《家計會 - 緊急避孕》連結。 女性服用事後丸後，常見會出現頭痛、噁心、頭暈、疲倦、經痛、腹痛、背痛及乳房脹痛 等嘅現象。喺一般情況下，以上嘅副作用唔會持續超過廿四小時。 服用事後丸之後，亦有機會令下次黎月經嘅日子有所變動，例如提前／延遲幾日 。
我而家有啲擔心家計會會唔會有機會報警🥲
就好似Sze咁講，
所以唔洗太擔心阿 而且宜家距離你提到嗰次性行為已經過左2日，聽日星期日家計會又唔會應診，所以建議星期一盡快打電話去診所，確認可以安排到當日去見醫生領取緊急避孕藥。