未滿16歲使用家計會緊急避孕服務會通知家長、報警或學校社工嗎？過程是否全程保密？
hello 你好 @blc
家計會唔會未經你嘅同意之前，就擅自通知你嘅家人、報警或學校社工。**而且家計會唔會無端端有你家人或學校社工嘅聯絡方法。**到咗家計會嘅時候其實你需要填一張你個人資料嘅表格，表格上面會問你有冇需要留一個警急聯絡人嘅電話。你有權選擇1) 填邊個嘅電話，或者2) 選擇填或者唔填。
如果未滿16歲，而只係向家計會尋求緊急避孕服務，家計會係會保持中立，唔會主動通知家長或者主動報警檢舉16歲以下性行為個案，黎保障返求助者嘅私隱，但會鼓勵返求助者將件事講比家長聽。
亦都提提你，雖然家計會緊急避孕服務無需預約(打電話或喺網上面預約)，但我哋建議你先打電話去查詢輪流情況同預約狀況，避免當日發現名額已滿，或者需要輪流好長時間。如果當你致電嘅時候發現診所冇即日嘅名額，可以嘗試向另外其他地區嘅家計會診所查詢。
事後丸如果唔係長期服用嘅話，對於女性身體唔係有好大嘅影響，但提提你，食事後丸有機會有以下副作用，例如係嘔心，頭暈，肚痛等，亦有可能令陰道出血。而且事後丸亦有可能會影響下次經期，令佢提早或者延遲幾日都係正常合理嘅。不過始終事後丸唔係一個長期可以用嘅避孕方法，都希望你下次選擇返適合你嘅安全措施，避免使用緊急嘅避孕。
最後提醒番，根據香港嘅法例，**同未滿16歲嘅女童發生性行為都係犯法㗎! 希望你之後都小心啲呢個法律嘅限制。**建議番等到大家都滿16歲之後，先再考慮係合法嘅情況下，發生安全性行為。希望可以解答到你!
1個讚