多謝你哋之前係我post嘅回覆，就算知道佢有嚟M冇懷孕，但係都擔心，我可以點算
Hello 好多謝你願意同我哋分享你嘅情況，希望我哋之前嘅回覆都有釋除到你對女朋友可能會懷孕嘅疑慮－有如常嚟到月經的話其實已經可以排除懷孕嘅可能性，所以現時我哋可以確定9月所發生嘅性行為係無導致女朋友懷孕嘅，因為女朋友係10月初已經嚟咗月經。同一時間，我哋明白好多人對於自己／伴侶「可能會懷孕」都係抱住好大嘅擔憂，甚至係恐懼，會擔心如果真係懷孕的話自己會無能力去面對同處理呢個情況，而令到自己非常緊張，即時理智上知道風險唔高，或者已經可以完全排除懷孕嘅可能性，都依然感到好擔心。
首先，我哋可以試下搵一啲方法去增加「真係無懷孕」呢件事嘅可信度。如果你覺得嚟咗月經都未能夠令你完全放心，可以同女朋友商量使用驗孕棒去測試一下。因為驗孕棒係透過測試尿液中嘅hCG（人絨毛膜促性腺激素）含量，呢種激素會係卵子受精著床嘅時候開始釋放，而一般受精著床呢個過程需要大概6－9日，所以係性行為後7日驗孕已經會有初步嘅結果，而係11日後或者預計月經嘅日子驗結果就會更加準確。如果真係懷孕，身體會持續釋放呢種激素，直到懷孕12週後先慢慢下跌。現時距離你哋發生性行為已經過咗一個月，如果真係懷孕的話，呢種激素係體內嘅水平應該會好高，正確使用驗孕棒的話係絕對可以驗得出。如果用埋驗孕呢個比較科學嘅方法得出嘅結果可以令你覺得安心的話，都不妨問一問女朋友嘅意願，睇下佢願唔願意進行呢個檢查。你亦可以考慮用電子顯示嘅驗孕棒，因為如果真係懷孕的話，佢亦會顯示懷孕週數，亦可以免卻咗人為失誤而導致無準確咁閱讀驗孕棒上面嘅線，準確度同可靠度都會更加高。
其次，好多時我哋會擔心一件事都係因為有太多未知之數，唔知道自己到時會點處理，或者係可以點處理。嘗試認真諗一諗其實自己咁擔心嘅原因係咩呢。係因為唔清楚自己有咩選擇？擔心唔知點決定要唔要繼續懷孕？擔心要同屋企人交代？擔心伴侶同自己可能係呢件事嘅處理上有分歧？搵出擔心嘅源頭，再嘗試尋找相應嘅資訊或者同伴侶溝通自己嘅想法。例如，係因為唔清楚自己有咩選擇，可以了解多啲係香港如果真係意外懷孕，其實有啲咩服務可以輔助到自己。不論係選擇繼續懷孕定終止懷孕，其實現時都係有不同嘅方案可以選擇。而如果係因為擔心自己同伴會有分歧，不妨就趁呢個機會同對方好好傾下，假如有一日真係意外懷孕，大家嘅取向係點樣？可能你會發現其實大家嘅想法係好一致嘅。而即使係唔一致都唔緊要，大家都可以趁住呢個機會溝通好自己嘅立場，多啲了解大家嘅想法都有助同呢件事真係發生嘅時候作出一個彼此都滿意嘅決定，減少自己因為未知之數而產生嘅擔憂同恐懼。
最後，要為自己訂立一個令自己完全信服女朋友真係無懷孕嘅指標。有啲人會以驗孕次數做標準，例如連續5日，每日都驗1次，如果結果都係無懷孕的話，就要相信真係無懷孕。亦有人會以下一次月經作標準，只要見到下一次月經出現，就完全相信已經無懷孕嘅可能性。有啲人亦會選擇去搵醫生檢查，無論係用驗孕棒、抽血、甚至做超聲波檢查，去真真實實去確認真係無懷孕。如果唔為自己訂立一個指標，好容易就會陷入不斷自我懷疑嘅旋渦，即時見到可以證明係無懷孕嘅理據都不斷推翻自己。咁樣嘅情況下，無論幾頻密去求證（驗孕／尋求其他人意見）其實都係無意義嘅，因為根本就無辦法令自己信服所得返嚟嘅結果。甚至可能會不斷上網搵相關嘅資訊，好多時就會見到有啲人「過咗幾個月先驗到」或者「懷孕到照有出血」。但好多時呢啲資訊都係唔正確嘅，例如對方有無正確地使用驗孕棒去測試？對方所指嘅出血會唔會係早孕期因為胎盤發育未穩定而導致嘅不定期少量出血？或者對方身體有其他情況而導致懷孕期間有出血，例如小產或者子宮發炎？呢啲都係我哋作為旁觀者無辦法查證到嘅資訊，如果單憑呢啲「個人分享」就無視其他有科學根據嘅證據（例如正確使用驗孕棒之下得出嘅結果），其實都只會令自己越來越擔心。而且係過程中你亦會因為呢件事同女朋友有不同嘅磨擦，可能對方已經無再擔心，而你卻不斷想再次求證，其實都會因此而損害雙方嘅關係。
其實會因為「可能會懷孕」而感到擔憂係好常見嘅事，呢樣亦唔係你嘅錯。好多時都係因為一直以來社會／所接受嘅教育都話俾我哋知「意外懷孕=人生玩完」，會講好多「你嘅人生以後點算」「你點同屋企人交代」等等嘅說話去威嚇大家意外懷孕嘅嚴重性。久而久之，好多人都會將「意外懷孕」聯想成洪水猛獸，覺得自己無能力去面對、覺得一定會影響自己未來一生嘅計劃、覺得屋企人一定會好反感甚至會趕自己出門。當然唔係話呢啲情況100%唔會出現，但呢啲都唔係唯一嘅可能性。即使真係發生咗，其實都有好多面對嘅方法，你亦可能會發現其實自己比想像中更有能力去面對同處理呢啲情況。
希望以上嘅資訊同建議都可以幫到你啦～要去放低自己嘅擔憂都唔係一件容易嘅事，需要一啲時間去消化同轉變自己嘅想法都係好正常架。如果覺得自己真係成個腦都係呢件事，不如試下搵多啲唔同嘅活動做下，分散一下注意力，希望可以令自己放鬆一下。
如果經歷咗呢件事，你覺得自己其實真係無辦法承受任何可能會導致懷孕嘅風險，其實都值得反思一下現時係咪一個適合繼續進行陰道交嘅性行為。因為現時無任何方法係可以100%安全，可以完全避免到懷孕嘅可能性，即使係完美地正確使用安全套，都有機會安全套係出廠時已經有缺陷，而令到安全套唔能夠完全100%避孕。當然市面上都有其他避孕功能比安全套更高嘅方法，例如係事前避孕藥或者避孕針，如果同安全套同時使用的話，都可以大大提升性行為嘅安全度。但使用咗呢啲方法都依然唔係代表可以100%避孕，自己係咪都接受到可能會風險，可能會有意外？如果答案都係接受唔到的話，不如考慮一下暫時以無懷孕風險嘅性接觸代替陰莖插入陰道嘅陰道交，例如係口交、指交、或者互相自慰。一樣可以達到性滿足，而又避免性器官之間直接嘅接觸，減低懷孕嘅可能性，長遠而言都係一個減少自己擔憂嘅可行做法。直到自己準備好，可以有能力面對懷孕嘅可能性嘅時候再去嘗試返陰莖插入陰道嘅陰道交。
1個讚