擔心有左 ⋯

本身有食開避孕藥,食左一年,每日都有食藥,大概都係夜晚10點左右食。

因為有食開避孕藥,所以一直經期都好準,28 days,經期4-5日。

對上一次經期係4/10黎,8/10最後一日,12/10有性行為。18/10 「流啡」,到24/10 去廁所又再發現有出現流啡既情況。

想問下會唔會係有左?但我一直都食開藥,亦冇漏食,最近亦都冇食過其他藥。不過見無啦啦流啡,而日子又同d 人講嘅著床出血有d 似,所以有d 擔心⋯

Hello~ 首先喺有持續及定時服食避孕藥嘅情況下,懷孕嘅風險係好低嘅 :blush: 而你提到嘅著床性出血,係指當受精卵着床喺子宮壁嘅時候有機會造成嘅少量出血,通常只會有幾滴或者最多一塊護墊可以承載到嘅血量,而且係一次性,唔會持續地出血幾日,血嘅顏色亦會同月經嘅唔一樣。一般由受精到着床大概係性行為後6至9日就會發生,但係留意着床性出血並唔係一個常見嘅現象,即使真係因為懷孕都係只有少部分女性會出現嘅情況。所以如果好擔心懷孕嘅話,可以喺最近一次性行為嘅7-11日後進行驗孕,因為驗孕棒係透過檢測尿液中嘅hCG (人絨毛膜促性腺激素)含量,呢款激素會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。

至於流啡嘅情況有好多唔同嘅原因造成,例如喺性行為後出現有機會係性行為期間潤滑度不足以致陰道有損口、注射疫苗或服食會影響經期嘅藥物等。不過見你距離上一次性行為都相隔咗一段時間,最近亦都無服食其他藥物,而流啡亦有機會係子宮頸發炎嘅症狀,所以建議你去睇醫生了解下身體情況 :man_health_worker:t2: :woman_health_worker:t2: