驗孕棒一問 求救

我同女朋友20/10有性行為 然後今日用驗孕棒驗 想問咁樣係咪冇bb​:smiling_face_with_tear:

但係我女朋友用杯裝住d尿液,係朝早第一次排嘅尿液(放左大概30mins)然後用棒浸落去20秒,再平放直至出result

呢度有個疑惑 d尿放左咁耐有冇問題?另外說明書寫1mins就有result,但係我哋等左成7-8mins,咁有冇問題?

Hello @Monk :blush::wave:t2: 首先如果只係單單睇驗孕結果的話,
1)【確認】部分有出現到線,表示今次已正確進行左驗孕檢測
2)【判定】部分並無出現紅線,就代表並無受孕
詳情可以參考番以下dotest官方網站嘅指引。
http://dotest.com.hk/tc/hcg.html?utm_medium=search&utm_source=google&utm_campaign=Generic_Prenancy&utm_term=%2B驗孕棒&utm_content=online_portal+nu+nu+nu+nu+nu&gclid=EAIaIQobChMI-_2m2frv8wIVz9KWCh0oXQ64EAAYAiAAEgJgzPD_BwE&gclsrc=aw.ds#way

而驗孕過程方面,都唔需要擔心尿液擺耐左會否有影響。因為驗孕棒嘅原理係透過檢測尿液中嘅hCG(人絨毛膜促性腺激素)含量嚟判斷有無懷孕,而當hCG排出咗體外就唔會再增長架啦,所以唔會出現尿液排出體外隔咗一陣再去驗嘅時候,hCG嘅水平會突然高咗嘅情況,亦唔會影響驗孕嘅準確度。 :relaxed:

驗孕結果等待時間方面,一般大概3-5分鐘內會出到驗孕結果。如果等左7-8分鐘先出現到檢測線/結果的話,咁就建議重新依指示再次驗孕。而如果只係指你地7-8分鐘後先返去睇驗孕結果的話,咁就基本上當刻嘅驗孕結果都係準確嘅,因為指示係要求測試完成後10分鐘內讀取結果。

不過留意到今次驗孕棒浸左落尿液度20秒,而dotest驗孕棒有指示「浸入小便內2秒,請不要超過5秒鐘」,所以如果下次再做檢測的話,都要留意多少少驗孕棒嘅指示,避免影響到驗孕嘅結果。

最後,留意到性行為係20/10發生,都提醒番一般受精卵著床需要6-9日,所以性行為7日後驗孕,可以得到初步嘅驗孕結果,而性行為11日後進行驗孕,到時嘅結果就會較準確及可靠啦 :blush:

想問第二條紅線係咪唔清晰 定係其實冇嘢:pray:t3:

因為枝棒左上角都染上紅色:pray:t3:

呢個係今晚既結果

圖片

但係隔咗30個鐘 支舊棒又變成咁:pray:t3:但係我見佢兩條線好似有啲受潮咗咁 會唔會係受潮令到兩條線出現:cry:

同埋兩條線唔係一樣粗 咁有冇問題

因為我聽講仲有一樣件野叫蒸發線 想問呢個係咩嚟 同埋我呢條係咪蒸發線:pray:t3::pray:t3:

呢個係今朝嘅結果

Hello @Monk
見到你今日分享嘅驗孕棒,如果你地係驗完即刻影比我地嘅話,係好清晰只有一條深色線係C區,咁樣係代表測試有效而且冇懷孕。

而之前嘅相裏面驗孕棒顏色一深一淺,好大機會係如 @Sze_StickyRiceLove 之前所講,因為驗孕棒浸泡喺尿液嘅時間太長(dotest嘅說明書指引係不能超過5秒,而你哋浸左大概20秒),浸泡嘅時間太長會有機會整濕顯示紙,導致顯示結果有問題,例如你所見到嘅情況出現。

另外,亦都有見到你分享隔咗30小時之後再去睇第一次嗰支驗孕棒。其實說明書上都有寫清楚係唔可以超過10分鐘之後再睇結果,因為喺指定時間過後尿液可能會同顯示紙產生其他化學作用,而導致顯示結果有誤差。所以你係測試後30小時再睇嘅結果並唔能夠反映正確嘅測試結果。

如果你今日所用嘅驗孕棒係有跟足晒盒內說明書指引去使用的話,其實結果已經代表係冇懷孕。但如果你依然好擔心,又或者今日再做測試嘅時候都冇跟足指引去做,可以考慮聽日再買另一知驗孕棒,跟足說明書嘅指示再驗一次孕。因為每個牌子嘅指引都會有啲唔一樣所以使用之前務必要睇清楚。你可以考慮買電子顯示嘅驗孕棒,一方面佢唔係靠睇線,會容易啲知道結果,另一方面如果真係懷孕的話亦會顯示懷孕週數,喺使用上都比較方便同準確。