想問下家計會需唔需要預約左先上得去架？
同埋我唔知應該揀打避孕針好，定食避孕藥好？
見到好多人都話食避孕藥又痾又嘔咁
好似避孕針無咁辛苦
但又睇到好似話避孕針唔可以打超過兩年，會骨質疏鬆 
咁其實應該點選擇先最好？ 
Hello @jellybeans
- 如果你係26歲以下未婚，係需要去家計會青少年保健中心，係需要預約咗先至上得去嘅，可選擇事前打電話或在網上預約，預約亦都可以清楚知道當日會唔會已經full booking咗，令到你可以預到時間打去其他家計會分部預約。
如果你係26歲以上，不論你係咪已婚，係需要去家計會節育指導診所，可以直接上去而唔使預約。
但係呢對有關第一次避孕嘅情況護士都會要求你黎m嘅時候先至過去做檢查同埋攞藥，所以如果你呢一刻唔係嚟緊月經，但係想查詢有關避孕方法以及預約，都可以打電話去問問護士意見，因為護士都會喺電話同你做一個最初步嘅評估。
- 去選擇究竟係食避孕丸定係打避孕針之前都建議你先留意自己身體嘅狀況。兩者其實非常類似，都係透過人造荷爾蒙去取代身體自己嘅荷爾蒙分泌從而調節月經週期時間，只係進入人體嘅方法以及次數唔同，而兩者都會有機會對身體有不同程度嘅副作用，包括你所講嘅又痾又嘔。最大嘅分別係，喺香港，事前避孕丸嘅牌子比較多，而每隻牌子嘅令你唔舒服嘅嗰種荷爾蒙劑量同種類都會有唔同，所以如果當你試咗一隻嘅避孕丸你嘅副作用比較大，你亦可以嘗試其他嘅事前避孕丸 ; 可惜，避孕針現在喺香港只有一兩個牌子，所以如果你對避孕針嘅副作用反應比較大，就冇其他牌子嘅避孕針可以選擇。
但係其實一般人食避孕藥或者避孕針有副作用，例如有少少想作嘔嘅感覺或者下體出現點狀出血，都係好正常嘅，一般都會需要一至三個月嘅時間去調節，有啲人嘅適應期甚至會長達六個月，相反亦有啲人完全無出現任何副作用。所以其實最主要都係睇下你自己嘅身體接受程度，本身嘅個人習慣（例如會唔會比較善忘唔記得每日差不多時間食藥、怕唔怕打針等等）再去選擇最適合你嘅避孕方法。
如果你係經由家計會接受荷爾蒙避孕，醫生其實亦都會喺評估之後推薦合適嘅選擇。以下係口服避孕丸以及避孕針嘅一啲內容資料，你亦都可以睇完之後再做選擇:
使用口服避孕藥：
每天定時服用避孕藥，但此方法沒有辦法避免通過性接觸傳播的疾病。
使用避孕針：
一個月注射一次的混合荷爾蒙避孕針含有兩種人造荷爾蒙，分別是雌激素和黃體酮，不是每個女性都適合使用，用之前必需徵詢醫生的意見。而避孕針嘅意外懷孕機率只有0.2 - 6%。
而單一荷爾蒙避孕針含單一荷爾蒙，每注射一次即能有效為期三個月。但必須在就診者月經週期首7天內作首次注射而注射後立即有避孕功效。
如注射後有異常情況（例如出血／痕癢），建議盡快與打避孕針的醫生報告再作檢查。
係令月經變得規律化方面，避孕藥嘅效果會比避孕針來得快，但就要每日都記得食藥，服用上比避孕針麻煩少少。以上嘅參考資料未必一定完全適用於你，最重要嘅都係經過醫生檢查之後，聽取醫生嘅建議，再考慮自己嘅日常習慣，選擇最適合自己的方法。
- 有關於你問，避孕針會導致角質疏鬆嘅部分，雖然研究數字上有部分打避孕針嘅人骨質密度會比無打嘅人低，但其實只要有均衡飲食同運動，本身無骨相關嘅疾病，基本上係唔影響身體嘅。不過我哋都提議你，無論係選擇避孕丸或者係避孕針，每年都去返相關嘅診所去做身體檢查，以確保你嘅身體係繼續適合用你選擇咗嘅避孕方法。如果你定期有返去做身體檢查嘅話，都唔需要喺呢方面太過擔心。
希望幫到你。
1個讚