9月中既時候同男朋友發生左第一次性行為,然後個個月月經冇黎,一直都擔心懷孕
係性行為後第16日,亦都係月經遲黎既第8日驗左第一次孕,結果顯示一條線冇懷孕既
但因為個日係夜晚驗,驚唔準,同埋又一直都仲未黎m,所以係8日後既朝早用左晨尿驗多左一次,結果都係顯示一條線冇懷孕既
係10月9號左右終於黎m,但淨係黎左3日而且流量好少,有時第二日起身見到訓左成晚既m巾一滴血都冇,覺得好唔正常,擔心呢3日黎咪真係黎m
同埋覺得個肚好似有舊嘢係到頂住咁,有時又會feel到刺痛既感覺,之前嚴重d既時候直程覺得有嘢係到郁咁,彈下彈下既感覺,好擔心自己係咪有左或者有d咩問題
求解答
同埋個肚腩好似長期都好大咁
Hello
首先想你知道，其實冇任何身體症狀係可以準確咁俾我哋去判斷有冇懷孕，如果想知道準確嘅情況係需要驗孕嘅。驗孕係檢驗尿液中嘅hCG水平，hCG係卵子受精著床之後身體會產生嘅一種荷爾蒙，而卵子受精著床需要大概6－9日嘅時間。所以，喺最後一次性行為7日後驗孕會得到初步結果，而11日之後就會得到相對比較準確嘅結果啦。而現時市面上嘅驗孕棒都有好高嘅靈敏度（sensitivity）同特異性（specificity），所以喺正確使用嘅情況下驗孕結果都有好高嘅準確度。 如果你有依照驗孕棒包裝／說明書嘅指示正確咁驗孕，你進行驗孕嘅日子係可以得到準確可靠嘅結果嘅。所以，嘗試放鬆下心情，相信呢個冇懷孕嘅結果。 
而月經係由幾個繁複嘅身體系統互相配合而形成，所以好容易受到唔同身體因素影響，例如荷爾蒙分泌、飲食習慣、作息、壓力、藥物、生病等等。所以其實每人每次月經嘅情況（例如月經週期長度、流血量、流血日數、經血顏色／質地、經痛程度、經前不適情況等等）都有可能有所不同。所以每人每次嘅月經週期都可能有所不同，即使月經週期長度相對穩定，都唔代表下一次月經一定同之前一樣。所以如果月經有變化／相對唔穩定，都唔代表係懷孕，尤其如果驗孕結果係陰性，就要嘗試相信個結果。 
而有觀察留意自己月經狀況嘅習慣都係好嘅，如果連續幾個月經週期都唔穩定嘅話，都應該盡快去睇醫生，睇下有無一啲病理性嘅原因（例如荷爾蒙分泌系統問題，子宮／卵巢疾病等等）。
不過因為你有提及「覺得個肚好似有舊嘢係到頂住咁,有時又會feel到刺痛既感覺,之前嚴重d既時候直程覺得有嘢係到郁咁,彈下彈下既感覺」，我哋單憑文字都唔能夠好確實咁去判斷係咪有啲特別嘅身體情況導致呢種唔舒服嘅感覺出現，而且你今次嘅月經的確有比較明顯嘅變化。所以建議你都可以去睇下醫生，清楚咁了解下自己嘅身體狀況，唔使「估估下」令到自己咁擔憂。有需要就盡快去家計會診所／母嬰健康院／部分專科診所或醫療機構預約睇醫生呀。 
記得下次再發生性行為嘅時候，全程正確咁使用安全措施，咁就可以更加安心啦！ 
有用安全套既,不過都仲係擔心
咁想問下如果有之前提到既個種唔舒服嘅感覺,仲可唔可以排除懷孕既可能性？
因為一直都仲係好擔心,所以之前都有去過家計會驗多次孕既,驗岀黎都係negative,不過想問下因為我岀門口去過一次廁所既,咁去家計會大概一個鐘多少少,會唔會因為尿液係體內既時間太短所以結果唔準？
個時有同醫生講m既份量係平時既四分一左右,都有提到有肚痛既問題,之後個醫生就話仲有四分一都算係正常同埋持續再有肚痛先再去睇下,所以就算見完醫生都唔算係好放心
不過個時就好似冇提到好似有嘢un住個肚咁
其實係咪應該去睇多次醫生做下檢查點解會有呢d唔舒服既感覺？
hello 你好啊 ，你已經有採取唔同補救措施嚟減低意外懷孕嘅風險，例如驗孕兩次，每次都得出同樣「negative」嘅結果。希望你可以放心相信，驗孕嘅準確率喺有97%-99%，所以只要確保跟足驗孕棒說明書嘅指示，就可以相信驗孕嘅結果。至於你提及到「因為尿液係體內既時間太短所以結果唔準」，呢個情況未必會發生。因為依家市面上嘅驗孕棒都有足夠敏感度來檢測尿液內嘅HCG水平。正如同ching 所講，「hCG係卵子受精著床之後身體會產生嘅一種荷爾蒙，而卵子受精著床需要大概6－9日嘅時間。所以，喺最後一次性行為7日後驗孕會得到初步結果，而11日之後就會得到相對比較準確嘅結果啦」。所以依照你嘅分享，你都驗孕兩次，兩次都得出 negative 嘅結果，當中更加有一次喺家計會驗孕，就可以放心相信結果。
至於你形容嘅肚痛嘅症狀， 可能喺好多因素下影響嘅結果，未必一定喺懷孕導致。所以都建議搵翻醫生，做進一步嘅詳細檢查比較穩陣～ 希望可以解答到你。 