冇谷M=有左?

女朋友近呢兩個月都係1號泥M(9月,10月)
咁今個月淨係10月8號就汁左一次,有帶套帶到射為左,亦都冇穿
App 就預計佢19號會排卵,但係佢好似17/18 號就吾舒服,吾清楚係咪排卵痛?因為21號又好返D,但係佢今日同我講話應該差唔多泥但係我Feel 5到有谷M。咁想問下,衣家代表咩意思?係有左定係點

Hello
如果你同女朋友發生性行為嘅時候有全程正確咁使用安全套,安全套冇穿冇漏,咁其實懷孕風險係好低迷嘅。 :wink:

首先想同你解釋返,月經同排卵其實係受好多唔同身體因素影響嘅,例如荷爾蒙水平、飲食、作息、壓力、生病、藥物等等。而排卵其實係要等月經出現之後先可以推算返幾時排左卵。所以,除非喺醫生嘅指導之下每日用排卵試紙測試著,否則我哋好難準確咁預測究竟幾時會排卵。一啲app嘅紀錄或者日曆推算並唔準確,因為app通常係以女朋友過往嘅月經週期pattern去估計,預算幾時會排卵,但係app並唔會知道女朋友成個週期/將來嘅身體狀況,例如有冇休息得唔好,或者有冇病過食過藥,有冇特別大壓力等等,但係呢啲因素都會對月經同排卵造成影響。所以其實每人每次月經嘅情況(例如月經週期長度、流血量、流血日數、經血顏色/質地、經痛程度、經前不適情況等等)都有可能有所不同。即使月經週期長度相對穩定,都唔代表下一次月經一定同之前一樣。 :blush:

而排卵期前後有啲人係會因為荷爾蒙水平變化,而身體會有唔舒服;亦有人會有經前不適嘅情況,喺月經前兩星期至2日左右出現,隨著月經出現而消退。而通常不適嘅情況可能會有肚脹、肚痛、頭痛、頭暈、胸部脹痛、情緒波動等等。而呢啲情況亦可能會每次月經週期都唔同。有或者冇呢啲情況都唔代表啲咩,如果想準確知道有無懷孕就要驗孕。 :relaxed:

驗孕係檢驗尿液中嘅hCG水平,hCG係卵子受精著床之後身體會產生嘅一種荷爾蒙,而卵子受精著床需要大概6-9日嘅時間。所以,喺最後一次性行為7日後(10月15號)驗孕會得到初步結果,而11日後(10月19號)驗孕就會得到相對比較準確嘅結果啦。你可以同女朋友商議,睇下想唔想進行驗孕。

首先多謝你嘅解答
不過而家都唔知點算
前日女朋友去廁所嗰陣時候發現有血
咁就用左M巾
不過出血比較少 佢個經期計埋今日先得三日
今朝冇血樓出嚟但係晏晝又忽然之間感覺到有啲嘢流出黎
今日買咗支驗孕棒俾佢結果係得一條線
不過唔知準唔准確
唔肯定佢係咩事:lying_face:

Hello你好啊:smiling_face_with_three_hearts:明白女朋友遲遲未嚟月經會令你地都好擔心,想問吓女朋友呢幾日出血係咩顏色?因為唔少人係經期前都會流出少量啡色血,通常幾日後就會嚟月經,但並唔係所有人月經周期都會出現呢個症狀,可以觀察多幾日。不過見到你有提及女朋友「出血比較少」,唔知你所指嘅係出血量比較少還是係出血日數比較少呢?因為一般月經日數為3-7日,所以其實3日嘅月經日數唔算特別少。如果經血顏色係偏紅色,同埋呢3日都有持續嘅出血,咁都好大機會已經係月經嚟。

至於驗孕方面,如果有跟從說明書準確使用驗孕棒,基本上都唔使太擔心:ok_woman:t2:,因為你地係性行為後11日以上先進行驗孕,相對會得到較準確嘅結果。如果以你女朋友嘅上兩個月嘅月經周期為指標的話,依家亦係接近會嚟月經嘅日子,所以依家驗孕嘅結果都係可靠嘅。

最後想問吓女朋友近呢幾個星期有冇服用藥物,或者生活作息同飲食定唔定時,大唔大壓力等,因為呢啲因素會影響月經同排卵周期、出血量、流血日數、分泌物、經前症狀等等。如果女朋友身體有其他不適,例如有嚴重嘅肚痛、頭痛、頭暈等,再加上今次月經日數同埋出血量比之前異常地少,可能搵醫生做一個詳細嘅身體檢查會比較好,女朋友都會較安心~

如果去廁所用紙巾抹就係鮮紅色,佢M巾上面見到嘅係暗紅。佢正常每個月都嚟六日,通常第二第三日就比較多。但係佢今次就11月3號見紅,嗰陣時一抹成塊紙巾都係血,除咗第一塊M巾比較多啲血之後都好少,去到第三日直情係冇血,但係今日第四日M巾上面有一小達啡色嘅血大概五毫子咁大。所以而家都唔肯定究竟係咩情況,女朋友而家有嘅症狀同Bingo差唔多,好容易變得攰特別係朝頭早同夜晚。啱啱瞓醒又覺得唔係好夠瞓,夜晚大概9點幾就話眼瞓,之後盤骨位又有D痛,係郁動做嘢嘅時候先會咁樣,瞓係張床上面又唔會覺得特別痛。同埋而家變得鍾意食甜嘢。
見到而家咁嘅樣根本就唔知係咩意思,唔知道佢係有左定係有婦科病。雖然星期五嘅時候驗過,但係到而家都仲係覺得有啲驚,驚唔係因為有咗,而係唔知道發生緊咩事。我喺度諗緊係咪應該下個禮拜再驗多一次,因為都見過有好多新聞話,驗孕棒一直都話negative, 但係原來係bingo

Helloo

我相信此時此刻嘅你一定好困惑同好擔心,我諗一日未有一個好確定嘅答案,呢份緊張感都會繼續喺度令你好煎熬。
但係與此同時我都希望你知道:冇任何避孕措施係100%避孕,反之亦然,都唔係話無套性交就100%會懷孕。反而,我更加見到嘅係你好細心留意女朋友嘅狀態,呢一點值得讚賞:sunglasses:
不過,正如@Feii_StickyRiceLove,生活習慣丶壓力大丶飲食作息等等(你都留意到女朋友有啲攰),都會影響經血量呀,所以唔使太擔心呀。退返10000步,其實每個人包括你同我都有機會出現好攰/鍾意食甜野嘅狀況,同懷孕嘅關係只可以話係可能有correlation,但兩者都係以驗孕&俾醫生檢查為準。如果真係好擔心好擔心,不妨帶女朋友睇醫生啊,買個安心都好,自己都舒服啲:)

同時,如果有好似平時咁嚟M嘅話,其實都基本上可以排除懷孕嘅可能,你會唔會都有着床性出血(俗稱「假M」嘅擔憂?)呢個其實係指受精卵着床喺子宮壁時時有機會造成少量出血。通常剩係得幾滴,又或者係一張護墊可以承載嘅血量,而且係一次性唔會連續幾日咁出現,血色同普通月經都唔一樣,一般受精去到着床講緊性行為後6-9日,而呢一個現象亦並非常見,只有少量女性會出現。如果出血嘅日子距離性行為已經超過九日,顏色同平時月經差唔多&keep住咁出血,基本上就可以排除着床性出血嘅可能性。

另外,網上面嘅資訊好多都唔準確,即使係我嘅睇法都好,對比醫生嘅建議都可能會有唔完備嘅地方,所以都真係建議睇醫生攞一個比較安心啲嘅答案。有時候我哋處於好緊張/焦慮嘅狀態時,好容易令我哋更加集中左係一啲令到我哋緊張嘅嘢身上,甚至完全相信咗佢所呈現俾你睇嘅嘢,下次如果再有類似嘅情況時,可以做幾個腹式呼吸,等自己放鬆少少嘅時候再問吓自己,其實佢講嘅嘢有幾真?會唔會有啲位置都值得商榷?

關於驗孕棒結果嘅問題,其實驗孕棒嘅準確度都高,況且你都係喺性行為後7至11日後驗(可靠&檢驗結果會比較準確嘅日子),所以呢度可以放心先。

至於新聞出現嘅情況,可能係因為佢太遲先驗(已經有咗三個月)。但係你檢驗嘅時間同你對上一次性行為相對近,所以唔使太擔心結果嘅準確度呀。如果好擔心都可以試下坊間唔同牌子驗多幾次,結果都係negative 嘅話,應該都會令到你緊張嘅感覺大大減低,同時都相信多啲結果:+1:t6:

有咩問題歡迎隨時再問:raised_hands:t6: