今日兩點左右同男朋友進行性行為，一開始陰莖有流透明嘅液體，我就用紙巾抹乾淨咗，之後就即刻戴套
戴安全套嗰陣唔小心戴反咗，但係淨係掂到嗰龜頭一陣（大約5秒），之後都掉返轉戴，戴咗之後都用紙巾抹咗嗰套嘅頂端先再有插入嘅行為
想問咁樣懷孕嘅機率高唔高？我今日經期14日，分泌物喺三日前明顯增多，應該都係準備緊排卵，平時月經週期大約33～37日左右
都好擔心所以上嚟問下，聽日會一早去家計會食事後藥
Hello你好啊
首先好欣賞你同男朋友進行性行為會使用安全套，但有以下幾點需要留意：
-
喺性行為發生期間，陰莖係性興奮時會流出透明嘅尿道球腺液，尿道球腺液有機會含有少量精子，所以如果尿道球腺液直接接觸到陰道都係會有懷孕嘅機會。雖然你係戴安全套前有用紙巾去抹走液體，不過其實尿道球腺液係整個陰莖性興奮期間都會持續分泌，所以即使抹走咗一部份，係戴安全套嘅過程，或者安全套反轉後你哋嘗試處理期間都可能會再有分泌，所以都冇辦法確定安全套上有冇沾有尿道球腺液。
-
如果帶安全套嗰陣唔小心戴反左，其實會建議開一個全新嘅安全套。因為我哋唔能夠用肉眼去肯定係咪抹得乾淨，如果有殘餘嘅尿道球腺液留左喺陰莖，當你調返轉戴安全套嘅時候，嗰啲殘餘嘅尿道球腺液有機會依附喺安全套嘅正面，呢個時候再進行插入式嘅性行為，都會有懷孕嘅機會。而且用紙巾去抹安全套表面嘅時候亦有機會令安全套破裂或出現缺口，增加安全套失效嘅風險。如果想了解多啲戴安全套嘅正確使用方法，可以睇翻我地嘅ig post: https://www.instagram.com/p/B4EX0FVFLUf/?utm_medium=copy_link
-
至於你提及最近可能係排卵期，如果以28日嘅月經周期計算通常排卵期會喺下一次月經嚟之前兩個星期。不過呢個只係一個科學計算嘅數字，好多人都唔係28週期，而月經週期亦好常會被不同嘅因素影響到，例如有食過藥、生活作息唔定時、情緒波動等等。而且大概嘅排卵日子需要喺下一次月經出現，知道周期長短後先可以計返轉頭，無辦法預計排卵。所以其實單靠計算日子去估算排卵期或者懷孕風險都唔算係一個好有效嘅避孕方法。而且亦有好多原因可以導致分泌物量出現變化，所以唔能夠憑呢一點去推斷係咪一定係接近排卵期呀。
-
提提你
事後丸有分兩種：性行為後72小時或120小時內服用，如果家計會醫生認為你嘅情況適合透過事後丸緊急避孕的話都會處方俾你，而你係處方下食咗事後丸的話會意外懷孕嘅機率都好微，所以都唔需要太擔心。不過，家計會嘅醫生通常都會建議食藥後直到月經嚟之前都盡量唔好發生唔安全嘅性行為。而且服食事後丸之後都有機會出現唔同嘅副作用，亦有可能會影響下一次月經嘅日子同血量等等，都要做好心理準備呀～
我會話自己應該準備緊排卵係因為每次分泌物都會暴增，兩個星期後就會嚟M
同埋都感謝你嘅專業意見呀，令我嘅憂慮減低咗唔少
而且家計會嘅事後藥服務係咪唔洗預約？可以直接walk-in？
如果你係26歲以下就要去返青少年保健診所，如果你係26歲以上就去節育指導診所。原則上緊急避孕服務係唔需要預約，但因為聽日係星期六，可能會比較多人。建議朝早可以打電話去問一問walk-in情況先，但你要有心理準備未必打幾次就會通
。因為診所電話得一條線，有人講緊你就會打唔通。
青少年保健中心
節育指導診所
今朝10:30左右食咗事後藥啦
都想問下一般72小時嗰隻事後藥係幾時開始生效？同埋食咗事後之後下一個月經週期開始嗰陣可唔可以食避孕藥？
Hello
性交後72小時內食嗰隻事後丸屬於單一荷爾蒙系列。理論上食咗已經會開始有藥性，完美使用嘅話成效都有成97-99%（期間冇因為嘔吐副作用而將藥物排出），希望呢度有令到你安心少少啦，不過都正如@Feii_StickyRiceLove所講，食完事後丸有機會有唔同嘅副作用，例如係頭暈丶噁心丶疲倦丶經痛等等… 甚至影響下一次月經嘅日子同埋血量。
如果都係好擔心嘅話，可以喺性行為11日後驗孕 。一般受精卵著床需要6-9日，所以性行為7日後驗孕已經可以有初步結果。而性行為11日後驗孕，就會比較準確&可靠，到時攞埋多個參考就更加放心啦
至於食咗事後下一個月經週期可唔可以食避孕藥，答案係可以的。因為你嗰隻屬於單一荷爾蒙，兩隻一齊食唔會減低個藥效。不過又咁講，因為市面上有好多唔同牌子，荷爾蒙嘅劑量同種類都會唔同，未必係每一隻都啱自己，再者唔係每個人嘅身體狀況都啱用事前藥去避孕。如果係初期食嘅話，都要比自己身體去適應下，頭1至6個月有機會出現唔穩定嘅狀況，同埋係月經頭五日之內開始食事前避孕藥先會即時有效，但因為唔肯定會唔會有副作用所以最穩陣都係7日內唔建議喺冇安全套嘅情況下發生性行為啦；如果唔係月經頭五日之內食嘅話，就建議頭14日如果發生性行為都要用安全套，同埋俾多啲時間身體去適應隻藥。
所以最最最穩陣都係去搵返相關嘅醫生查詢，睇吓自己適唔適合！
希望解答到你嘅疑難：）