想問下黎左m係咪就可以排除懷孕既風險？
之前都驗過孕係negative既
但係網上見過有d人話有左3個月都驗唔到或者有左都照黎m
同埋想知懷孕初期岀血或者宮外孕岀血係點既？
Hello
首先解釋咗驗孕呢樣嘢先：驗孕係檢驗尿液中嘅hCG水平，hCG係卵子受精著床之後身體會產生嘅一種荷爾蒙，而卵子受精著床需要大概6－9日嘅時間。所以，喺最後一次性行為7日後驗孕會得到初步結果，而11日之後就會得到相對比較準確嘅結果啦。而現時市面上嘅驗孕棒都有好高嘅靈敏度（sensitivity）同特異性（specificity），所以喺正確使用嘅情況下驗孕結果都有好高嘅準確度。 如果你有依照驗孕棒包裝／說明書嘅指示正確咁驗孕，你進行驗孕嘅日子係可以得到準確可靠嘅結果嘅。 
而月經係受到荷爾蒙週期變化產生嘅現象：每個週期都會有一粒卵子有卵巢排出，同時子宮內膜會增厚，而如果卵子沒有受精，便會連同增厚嘅子宮內膜組織，通過陰道排出體外，呢個就係經血。如果驗孕結果係陰性，而且你有月經出現，咁就要嘗試相信呢個結果。 
「網上見過有d人話有左3個月都驗唔到或者有左都照黎m」，其實呢啲例子我哋都好難去求證係咪真實準確，會唔會係有其他因素導致呢啲事例，例如冇正確使用驗孕棒所以未能夠驗到，或者所謂「黎m」係陰道出血而唔係月經。有啲人會經歷「著床性出血」，即係卵子受精著床嘅時候，因為荷爾蒙變化而導致陰道出血，不過其實係比較少見嘅情況。而且通常著床性出血嘅血量會比較少（一個護墊可以裝到嘅量），而且流血日數較短（2日左右）。如果你嘅月經同平時比較冇太大嘅分別，咁都可以唔需要太擔心。而宮外孕期間出血嘅情況都比較少見，而且通常都會伴有腹痛，而且血量有機會比平時月經多，顏色有機會較深。而且，宮外孕都可以用驗孕棒驗到尿液中嘅hCG嘅。所以唔會係你嘅情況。